അന്തിമവിധി വിഎസിന് അനുകൂലമാകുമോ? മഞ്ജുള ചെല്ലൂര് പറഞ്ഞത് ദത്തുവിന്റെ വിധി മറികടന്ന്
കൊല്ക്കത്ത ഹൈക്കോടതിയിലേക്ക് ചീഫ് ജസ്റ്റിസായി സ്ഥലം മാറി പോകുന്ന ജസ്റ്റിസ് മഞ്ജുള ചെല്ലൂര് മൂന്നാര് ഒഴിപ്പിക്കലുമായി ബന്ധപ്പെട്ട് പുറപ്പെടുവിച്ച വിധിയില് ദുരൂഹത തുടരുന്നു. എട്ട് വര്ഷങ്ങള്ക്കു മുമ്പ് കേരള ഹൈക്കോടതിയുടെ ഡിവിഷന് ബഞ്ച് പുറപ്പെടുവിച്ച വിധിയുടെ അടിസ്ഥാനത്തിലാണ് ക്ലൗഡ് നയന് റിസോര്ട്ട് പൊളിച്ചത്. ചീഫ് ജസ്റ്റിസായിരുന്ന ജസ്റ്റിസ് എച്ച്. എല് ദത്തുവും കെ.ജി. ശങ്കരനുമടങ്ങുന്ന ഡിവിഷന് ബഞ്ചിന്റേതായിരുന്നു വിധി. അന്നത്തെ വിധിക്കെതിരെയാണ് ഇന്ന് മഞ്ജുള ചെല്ലൂര് വിധി പറഞ്ഞിരിക്കുന്നത്. ഇതിനുള്ള അധികാരം ഡിവിഷന് ബഞ്ചിനുണ്ടോ എന്ന വിഷയവും ചര്ച്ചയായിരിക്കുന്നു.
വിധി അപ്രതീക്ഷിതവും ഞെട്ടിക്കുന്നതാണെന്നും ആരോപിച്ച് വി.എസ് ഹൈക്കോടതിയെ സമീപിക്കാനൊരുങ്ങുമ്പോള് സര്ക്കാര് അപ്പീല് പോകാന് സാധ്യതയില്ല. സര്ക്കാരിന് വിധിക്കെതിരെ അപ്പീല് നല്കാനും താത്പര്യമില്ല. അപ്പീല് സംബന്ധിച്ച് മുഖ്യമന്ത്രിയുമായി ചര്ച്ച നടത്തിയ മന്ത്രി അടൂര് പ്രകാശ് സെക്രട്ടറിമാരുമായി ആലോചിച്ച് തീരുമാനിക്കുമെന്ന് മാധ്യമങ്ങളോട് പറഞ്ഞു.
സാധാരണഗതിയില് സ്ഥലംമാറ്റ ഉത്തരവ് വന്നശേഷം ജഡ്ജിമാര് വിധി പറയാറില്ല. പുതിയ ബഞ്ചിന് കേസ് കൈമാറുകയാണ് പതിവ്. എന്നാല് ജസ്റ്റിസ് മഞ്ജുള ചെല്ലൂര് ധൃതി പിടിച്ച് വിധി പറയുകയായിരുന്നു. യു.ഡി.എഫ് സര്ക്കാരുമായുള്ള ചീഫ് ജസ്റ്റിസിന്റെ അടുത്ത ബന്ധവും എതിര്പക്ഷം വിമര്ശന വിധേയമാക്കുന്നുണ്ട്.
ക്ലൗഡ് നയന് പൊളിക്കാനുള്ള അന്നത്തെ സര്ക്കാരിന്റെ നീക്കത്തിനെതിരെ ഉടമകള് ഹൈക്കോടതിയെ സമീപിച്ചപ്പോഴാണ് 24 മണിക്കൂറിനകം റിസോര്ട്ട് ഒഴിഞ്ഞു കൊടുക്കാന് കേരള ഹൈക്കോടതി ഉത്തരവിട്ടത്. ഇതിന്റെ അടിസ്ഥാനത്തിലാണ് സര്ക്കാര് റിസോര്ട്ട് പൊളിച്ചത്. എന്നാല് അന്നത്തെ വിധി ഇന്നത്തെ കോടതിയുടെ ശ്രദ്ധയില് പെടാത്തതെന്തുകൊണ്ടാണെന്ന് ഓര്ത്ത് നിയമവൃത്തങ്ങള് അത്ഭുതപ്പെടുന്നു.
ഗ്രീന് ട്രൈബ്യൂണല് നിലവില് വന്ന പശ്ചാത്തലത്തില് കേസ് ട്രൈബ്യൂണലിന്റെ പരിഗണനക്ക് വിടാമെന്നിരിക്കെയാണ് ജഡ്ജി വിധി പറഞ്ഞത്. ഇത് എന്തു കൊണ്ടാണെന്ന് നിയമവൃത്തങ്ങള് അത്ഭുതപ്പെടുന്നു. അതും വാദം കേട്ടു കഴിഞ്ഞ് ഒന്പതു മാസങ്ങള്ക്കു ശേഷമാണ് കോടതി വിധി പറഞ്ഞത്. വാദം കഴിഞ്ഞ് രണ്ടു മാസങ്ങള്ക്കുള്ളില് വിധി പറഞ്ഞില്ലെങ്കില് കക്ഷികള്ക്ക് ബെഞ്ച് മാറ്റി കിട്ടാന് അപേക്ഷിക്കാമായിരുന്നു.
രണ്ട് ഡിവിഷന് ബഞ്ചുകള് ഒരേ വിഷയത്തില് വ്യത്യസ്തമായ വിധി പറഞ്ഞത് നിയമലോകത്തെ ഞെട്ടിച്ചിരിക്കുകയാണ്. അതുകൊണ്ടു തന്നെ വിഎസിന്റെ റിവ്യൂ ഹര്ജിയുടെ ബലത്തില് വിധി പുന: പരിശോധിക്കാനായിരിക്കും ഹൈക്കോടതി ശ്രമിക്കുക.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
