ഉമ്മന്‍ചാണ്ടിയെ മറിക്കാന്‍ ശ്രമം സജീവം; വെളുക്കുമ്പോള്‍ എന്തു സംഭവിക്കുമെന്ന്‌ ആര്‍ക്കറിയാം?
ഉമ്മന്‍ചാണ്ടി സര്‍ക്കാരിനെ അട്ടിമറിക്കാനുള്ള ശ്രമങ്ങള്‍ ഇടതു പാളയത്തില്‍ ആരംഭിച്ചു കഴിഞ്ഞു. ഉമ്മന്‍ചാണ്ടി സര്‍ക്കാരിന്റെ ജനപ്രീതി തങ്ങള്‍ക്കൊരിക്കലും മറികടക്കാനാവില്ലെന്ന്‌ മനസിലാക്കിയ പിണറായി വിജയനും കൂട്ടരുമാണ്‌ സര്‍ക്കാരിനെ അട്ടിമറിക്കാന്‍ ശ്രമങ്ങളാരംഭിച്ചത്‌. എം.എല്‍എമാരെ വിലയ്‌ക്കെടുത്ത്‌ അട്ടിമറിക്കാനാണ്‌ ശ്രമം. കേരള കോണ്‍ഗ്രസ്‌ എമ്മിനെ വിലയ്‌ക്കെടുക്കാനുള്ള ഇടതുമുന്നണിയുടെ ശ്രമങ്ങള്‍ പാളിയതോടെ മറ്റേതെങ്കിലും കക്ഷിയെ വിലയ്‌ക്കെടുക്കാന്‍ കഴിയുമോ എന്നാണ്‌ സിപിഐ എം നോക്കുന്നത്‌. ഉമ്മന്‍ചാണ്ടി സര്‍ക്കാരിനെ അട്ടിമറിക്കാന്‍ ഉന്നത തലങ്ങളില്‍ നടന്ന ഗൂഢാലോചനയുടെ ഫലമാണ്‌ അട്ടിമറിശ്രമങ്ങള്‍.
കേരള കോണ്‍ഗ്രസ്‌ എം ഉമ്മന്‍ചാണ്ടിയുടെ ക്യാബിനറ്റില്‍ നിന്നും മാറുമെന്ന അഭ്യൂഹങ്ങള്‍ ശക്തമാക്കുകയാണ്‌ ഇടതുമുന്നണി. എന്നാല്‍ അത്തരത്തിലൊരു ആലോചനയും കേരള കോണ്‍ഗ്രസിനില്ലെന്ന്‌ പ്രമുഖ നേതാക്കള്‍ വിശദീകരിക്കുന്നു. കെ. പി മോഹനന്‍, അനൂപ്‌ ജേക്കബ്‌ തുടങ്ങിയ മന്ത്രിമാരെ ചാക്കിടാന്‍ ശ്രമങ്ങള്‍ തുടരുകയാണ്‌.
ഉമ്മന്‍ചാണ്ടി സര്‍ക്കാരിന്റെ ജനപ്രീയ നയങ്ങളാണ്‌ പാര്‍ലമെന്റ്‌ തെരഞ്ഞെടുപ്പില്‍ കേരളത്തില്‍ യുഡിഎഫിനെ വിജയിപ്പിച്ചത്‌. ഇത്‌ സിപിഎം പ്രതീക്ഷിച്ചതല്ല. വടകരയില്‍ ടി.പി. ചന്ദ്രശേഖരന്റെ കൊലപാതകം ഉയര്‍ത്തിയ അനുരണനങ്ങള്‍ അവസാനിപ്പിച്ചിട്ടില്ലെന്ന്‌ ആവര്‍ത്തിച്ചുകൊണ്ട്‌ സിപിഎം സ്ഥാനാര്‍ത്ഥി പരാജയപ്പെടുകയും ചെയ്‌തു. തെരഞ്ഞെടുപ്പ്‌ കഴിഞ്ഞതോടെ ഇറാഖിലെ മലയാളി നഴ്‌സുമാരെ ഒരു പോറലുപോലുമേല്‌പിക്കാതെ കേരളത്തിലേക്ക്‌ മടക്കി കൊണ്ടു വന്നതു വഴി ഉമ്മന്‍ചാണ്ടി വീണ്ടും ഗോളടിച്ചു. ഇതും സിപിഎം പ്രതീക്ഷിച്ചതല്ല.
ഉമ്മന്‍ചാണ്ടിക്കെതിരെ സര്‍ക്കാരുണ്ടാക്കാന്‍ 2011 ല്‍ ശ്രമിക്കാത്തതില്‍ പിണറായി വിജയന്‍ ദുഖിതനാണ്‌. സര്‍ക്കാരുണ്ടാക്കിയാല്‍ അച്യൂതാനന്ദന്‍ മുഖ്യമന്ത്രിയാകാന്‍ ശ്രമിക്കുമെന്ന ഭയമാണ്‌ പിണറായി വിജയനെ പിന്തിരിപ്പിച്ചത്‌. പിണറായിക്ക്‌ സംഭവിച്ചത് തന്ത്രപരമായ പാളിച്ചയാണെന്ന്‌ അച്യുതാനന്ദനും അദ്ദേഹത്തെ അനുകൂലിക്കുന്നവരും വാദിക്കുന്നു.
സര്‍ക്കാരിനെതിരെ സമരം ശക്തമാക്കിയിട്ട്‌ കാര്യമില്ലെന്നാണ്‌ സിപിഎം പറയുന്നത്‌. സമരം ചെയ്‌തതുകൊണ്ട്‌ യാതൊരു പ്രയോജനവുമില്ലത്രേ. സോളാര്‍ സമരത്തെ അവര്‍ ഉദാഹരണമാക്കുന്നു . അതുകൊണ്ടു തന്നെ സമരത്തേക്കാള്‍ കൂടുതല്‍ അട്ടിമറിയിലാണ്‌ ഇടതു പക്ഷം ശ്രദ്ധിക്കുന്നത്‌. സര്‍ക്കാരിനെ അട്ടിമറിക്കാന്‍ അച്യുതാനന്ദനും താല്‌പര്യമാണ്‌. മൂന്നാര്‍ കയ്യേറ്റം ഒഴിപ്പിക്കാന്‍ താന്‍ നടത്തിയ ശ്രമങ്ങള്‍ക്കെതിരെ ഉമ്മന്‍ചാണ്ടി തിരിഞ്ഞതാണ്‌ അച്യുതാനന്ദനെ പ്രകോപിപ്പിച്ചത്‌. സര്‍ക്കാരിനെ മറിച്ചിടാനുള്ള എല്ലാ ശ്രമങ്ങള്‍ക്കും വിഎസ്‌ പിന്തുണ നല്‍കുമെന്നാണ്‌ അറിയുന്നത്‌. പ്ലസ്‌ടു കിട്ടാത്തവരും സിപിഎമ്മിനൊപ്പം അണിനിരക്കും.
ഏതു രീതിയില്‍ മറിക്കുമെന്ന്‌ മാത്രമാണ്‌ കണ്ടറിയേണ്ടത്‌. നേരം വെളുക്കുമ്പോള്‍ എന്തൊക്കെ സംഭവിക്കുമെന്ന്‌ ആര്‍ക്കറിയാം.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
