കനത്തമഴ, പിഞ്ചുകുഞ്ഞ്‌ ഉള്‍പ്പെടെ മൂന്നുപേരെ ഒഴുക്കില്‍പ്പെട്ടു കാണാതായി
കനത്തമഴയില്‍ കണ്ണൂര്‍, കാസര്‍ഗോഡ്‌ ജില്ലകളിലായി പിഞ്ചുകുഞ്ഞ്‌ ഉള്‍പ്പെടെ മൂന്നുപേരെ ഒഴുക്കില്‍പ്പെട്ടു കാണാതായി. കാസര്‍ഗോഡ്‌ തുണി അലക്കുന്നതിനിടയില്‍ ഒഴുക്കില്‍പ്പെട്ടു വീട്ടമ്മ മരിച്ചു. മഞ്ചേശ്വരം പൈവളിഗെ പഞ്ചായത്തിലെ ചിപ്പാറിലെ സീനമൂല്യയുടെ ഭാര്യ ദേവകി(55)യാണ്‌ ഇന്നലെ രാവിലെ തോട്ടില്‍ അലക്കുന്നതിനിടയില്‍ ഒഴുക്കില്‍പ്പെട്ടത്‌. കണ്ണൂര്‍ ജില്ലയിലെ കീഴ്‌പള്ളിയില്‍ കോഴിയോട്ടെ കേളോത്ത്‌ സുഹൈ ല്‍-ഫാത്തിമ ദമ്പതികളുടെ മകളായ ഒന്നരവയസുകാരി ദിയ ഒഴു ക്കില്‍പ്പെട്ടു കാണാതായി. ഇന്നലെ രാവിലെ 11ഓടെയായിരുന്നു സംഭവം. വീട്ടുമുറ്റത്തു കളിച്ചുകൊണ്ടിരുന്ന ദിയയെ കാണാതാവുകയായിരുന്നു. സമീപത്തുള്ള കൈത്തോട്ടിലെ ഒഴുക്കില്‍പ്പെട്ടതായാണു സംശയിക്കുന്നത്‌. സംസ്ഥാനത്ത് ഏഴു ജില്ലകളിലെ വിദ്യാഭ്യാസ സ്ഥാപനങ്ങള്‍ക്ക്‌ അതതു ജില്ലാ കളക്ടര്‍മാര്‍ അവധി പ്രഖ്യാപിച്ചു. ഇന്നു നടക്കേണ്ടിയിരുന്ന ഒന്നു മുതല്‍ ഏഴു വരെയുള്ള ക്ലാസുകളിലെ അധ്യാപകരുടെ ക്ലസ്റ്റര്‍ പരിശീലനം 16 ലേക്കു മാറ്റിയതായി എസ്‌എസ്‌എ ഡയറക്ടര്‍ അറിയിച്ചു. കണ്ണൂര്‍ കേളകം ശാന്തിഗിരി രാമച്ചിയില്‍ ഉരുള്‍പൊട്ടി ഏക്കര്‍ കണക്കിനു കൃഷിനശിച്ചു. പുഴകളും തോടുകളും കരകവിഞ്ഞതോടെ ഒട്ടേറെ പ്രദേശങ്ങള്‍ വെള്ളത്തിനടിയിലാണ്‌.
മണ്ണിടിഞ്ഞും മരം വീണും വെള്ളമുയര്‍ന്നും പലേടത്തും ഗതാഗതം തടസപ്പെട്ടിരിക്കുകയാണ്‌. നിരവിധി വീടുകള്‍ തകര്‍ന്നു. കനത്ത മഴയിലും വെള്ളപ്പൊക്കത്തിലും കാസര്‍ഗോഡ്‌ ജില്ലയുടെ വിവിധ ഭാഗങ്ങളില്‍ വ്യാപക നാശനഷ്ടമുണ്ടായി. കാഞ്ഞങ്ങാട്ട്‌ റെയില്‍വേ ട്രാക്കില്‍ വെള്ളം കയറി. റെയില്‍വേ സ്റ്റേഷന്‍ ഒന്നാം നമ്പര്‍ പ്ലാറ്റ്‌ഫോമിനോടു ചേര്‍ന്നുള്ള ലൈന്‍ രണ്ടു കിലോമീറ്ററോളം പൂര്‍ണമായും വെള്ളത്തില്‍ മുങ്ങി. ഇതുമൂലം രാവിലെ ആറിനു സ്റ്റേഷനിലെത്തിയ കുര്‍ള - തിരുവനന്തപുരം നേത്രാവതി എക്‌സ്‌പ്രസ്‌ രണ്ടേമുക്കാല്‍ മണിക്കൂര്‍ സ്റ്റേഷനില്‍ കുടുങ്ങി.
തെക്കുപടിഞ്ഞാറന്‍ കാലവര്‍ഷം ശക്തിയാര്‍ജിച്ചതോടെ സംസ്ഥാനത്ത് കനത്ത മഴ. വടക്കന്‍ കേരളത്തില്‍ 48 മണിക്കൂറായി തോരാതെ പെയ്യുന്ന മഴ ഇന്നലെ തെക്കന്‍ കേരളത്തിലേക്കും വ്യാപിച്ചു. കാലവര്‍ഷം ഇനിയും കരുത്താര്‍ജിക്കുമെന്നും രണ്ടു ദിവസം കൂടി തുടര്‍ച്ചയായി മഴയുണ്ടാകുമെന്നും കാലാവസ്ഥാ നിരീക്ഷ ണകേന്ദ്രം അറിയിച്ചു.
ഈ മാസം പകുതി വരെ മഴ തുടരും. മലയോരമേഖലയില്‍ മഴ ഇനിയും ശക്തി പ്രാപിക്കുമെന്നതിനാല്‍ മണ്ണിടിച്ചിലിനു സാധ്യതയുണ്ടെന്നും ജാഗ്രത പാലിക്കണമെന്നും സംസ്ഥാന ദുരന്ത നിവാരണ അഥോറിറ്റി മുന്നറിയിപ്പു നല്‍കി. പടിഞ്ഞാറന്‍ തീരത്തെ മണ്‍സൂണ്‍ പാത്തിയും ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദവുമാണു മഴ ശക്തിയായി തുടരാന്‍ കാരണം.
https://www.facebook.com/Malayalivartha
