ബ്ലാക്‌ മെയില്‍ കേസ്, ബിന്ധ്യയ്‌ക്കും റുക്‌സാനയ്‌ക്കുമെതിരെ ലുക്ക്‌ഔട്ട്‌ നോട്ടീസ്‌ പുറപ്പെടുവിച്ചേക്കും
കൊച്ചി ബ്‌ളാക്ക്‌ മെയിലിങ്‌ പെണ്‍വാണിഭ കേസില്‍ ബിന്ധ്യയ്‌ക്കും റുക്‌സാനയ്‌ക്കുമെതിരെ ലുക്ക്‌ഔട്ട്‌ നോട്ടീസ്‌ പുറപ്പെടുവിച്ചേക്കും. മുഖ്യപ്രതി വി.ജയചന്ദ്രനില്‍ നിന്നു പിടിച്ചെടുത്ത പെന്‍ഡ്രൈവില്‍ നിന്നാണു നഗ്നചിത്രങ്ങള്‍ കണ്ടെത്തിയത്‌. ജയചന്ദ്രനില്‍ നിന്നു പിടിച്ചെടുത്ത ലാപ്‌ടോപ്‌ കൂട്ടുപ്രതി ബിന്ധ്യ തോമസിന്റേതാണെന്നു സംശയിക്കുന്നു. പണം തട്ടാനുള്ള പദ്ധതി ആസൂത്രണം ചെയ്തതു റുക്‌സാനയുടെ എറണാകുളം ചിലവന്നൂരിലെ ഫഌറ്റിലാണെന്നു ജയചന്ദ്രന്‍ മൊഴി നല്‍കിയിട്ടുണ്ട്. പോലീസ് കസ്റ്റഡിയുടെ സമയപരിധി തീരുന്നതിനാല്‍ ജയചന്ദ്രനെ ഇന്നു വീണ്ടും കോടതിയില്‍ ഹാജരാക്കും. തട്ടിപ്പില്‍ അകപ്പെട്ടു തിരുവനന്തപുരം സ്വദേശി ആത്മഹത്യ ചെയ്ത കേസില്‍, വീണ്ടും അറസ്‌റ്റിലാവാന്‍ സാധ്യത തെളിഞ്ഞതോടെ ബിന്ധ്യയും റുക്‌സാനയും കൊച്ചിയില്‍ നിന്നു മുങ്ങി.
വ്യവസായികളെയാണ് പ്രധാനമായും ഇരകളാക്കിയിരുന്നത്. തിരുവനന്തപുരം, കൊല്ലം, കൊച്ചി നഗരങ്ങളിലെ പല വ്യവസായികളും ഇവരുടെ കെണിയില്‍ വീണെന്നാണ് പോലീസ് നിഗമനം. കോടിക്കണക്കിന് രൂപ ഈ വ്യവസായികളില്‍ നിന്ന് ഈടാക്കിയെന്നാണ് വിവരം. റിയല്‍ എസ്റ്റേറ്റ് ബിസിനസിലെ ഇടനിലക്കാരാണെന്ന് പരിചയപ്പെടുത്തിയാണ് ബിസിനസുകാരെ ഇവര്‍ സമീപിച്ചിരുന്നത്.
പലയിടങ്ങളില്‍ വച്ചും കൂടിക്കാഴ്ചകള്‍ക്ക് അവസരമൊരുക്കും. പിന്നീട് പ്രധാന പ്രതികളായ ബിന്ധ്യയോ റുക്‌സാനയോ കൂടുതല്‍ അടുപ്പം കാണിച്ച് ഇരകളുമായി ഹോട്ടല്‍ മുറികളിലെത്തും. ഇവിടെ വച്ച് ഒളികാമറ ഉപയോഗിച്ച് കിടപ്പറരംഗങ്ങള്‍ ഷൂട്ട് ചെയ്യുകയാണ് പതിവ്. ഏതാനും ദിവസത്തിനുശേഷം ഇതിന്റെ സിഡി തയാറാക്കി വ്യവസായിയെ ഭീഷണിപ്പെടുത്തും. ഇയാളുടെ സ്വത്തുവിവരങ്ങള്‍ പൂര്‍ണമായി മനസിലാക്കിയ ശേഷം നടത്തുന്ന ബ്ലാക്ക് മെയിലിംഗില്‍ വീഴാതെ തരമില്ലാത്ത അവസ്ഥയാകും.
ഫെബ്രുവരിയില്‍ രണ്ടു ദിവസം റുക്‌സാനയുടെ ഫഌറ്റില്‍ താമസിച്ചാണ് ഇരകളുടെ പട്ടിക തയാറാക്കിയതെന്നു ചോദ്യംചെയ്യലില്‍ ജയചന്ദ്രന്‍ വെളിപ്പെടുത്തിയതായി പോലീസ് പറഞ്ഞു. ജയചന്ദ്രനെ ചിലവന്നൂരില്‍ റുക്‌സാനയുടെ ഗാലക്‌സി വിന്‍സ്റ്റണ്‍ ഫഌറ്റിലും ബിന്ധ്യാ തോമസിന്റെ വെണ്ണല ഡിഡി ഗോള്‍ഡന്‍ ഗേറ്റിലെ ഫഌറ്റിലും സനിലന്റെ വീട്ടിലും കൊണ്ടുപോയി തെളിവെടുത്തു.
സംഘം പിടിയിലാകുന്നതിനു തൊട്ടുമുമ്പും ജയചന്ദ്രന്‍ ഇവിടങ്ങളിലെത്തിയിരുന്നു. ജയചന്ദ്രനുമായി പോലീസ് തെളിവെടുപ്പിന് എത്തിയപ്പോള്‍ റുക്‌സാനയും ബിന്ധ്യയും ഫഌറ്റിലുണ്ടായിരുന്നില്ല. ഇരുവരും ഒളിവിലാണെന്നാണു പോലീസ് ഭാഷ്യം. ഇരുവരും പോലീസിനു നല്‍കിയിട്ടുള്ള മൊബൈല്‍ നമ്പറുകള്‍ സ്വിച്ച് ഓഫ് ചെയ്ത നിലയിലാണ്. ബിന്ധ്യക്കും റുക്‌സാനയ്ക്കുമൊപ്പം ജയചന്ദ്രനെ ചോദ്യം ചെയ്യാനാണ് പോലീസ് ഉദ്ദേശിക്കുന്നത്. ഇരുവരും മുന്‍കൂര്‍ ജാമ്യത്തിനായി ഉടനെ കോടതിയെ സമീപിക്കുമെന്നാണ് അറിയുന്നത്. ദൃശ്യങ്ങളിലുള്ള പലരും പരാതി നല്‍കാന്‍ തയാറായാല്‍ ഓരോന്നും വെവ്വേറെ കേസുകളായി റജിസ്‌റ്റര്‍ ചെയ്യാനാണു പദ്ധതി.
https://www.facebook.com/Malayalivartha
