പൊക്കിള്‍കൊടിയോടുകൂടി കോഴി പ്രസവിച്ചെന്ന് റിപ്പോർട്ട് . കമ്പളക്കാട് കെല്‍ട്രോണ്‍ വളവില്‍ താമസിക്കുന്ന പിസി ഇബ്രായിയുടെ വീട്ടിലാണ് കോഴി പ്രസവിച്ചത് പറയുന്നത്. അതും പൊക്കിള്‍കൊടിയോടുകൂടി. ഇദ്ദേഹത്തിന്റെ വീട്ടിലെ വിവിധ ഇനത്തില്‍ കോഴികളെ വളര്‍ത്തുന്ന ഫാമിലെ നാടന്‍ പിടക്കോഴിയാണ് സംഭവ കഥയിലെ താരം.

ദിവസങ്ങള്‍ക്ക് മുമ്പ് 11 മുട്ടകളുമായി അടയിരുത്തിയതായിരുന്നു പിടക്കോഴിയെ. ഇന്നലെ ഉച്ചയോടെ ഫാം ജീവനക്കാരന്‍ കൂട്ടില്‍ പോയി നോക്കിയപ്പോള്‍ പിടക്കോഴിയുടെ അടുത്ത് കറുത്തനിറത്തിലായി ഒരു ചെറിയ ജീവനില്ലാത്ത കോഴികുഞ്ഞ്. എടുത്തുനോക്കിയപ്പോള്‍ പൊക്കിള്‍ കൊടിയുമുണ്ട് അടയിരുത്തിയ 11 മുട്ടകള്‍ അതേപടി അവിടെത്തന്നെ ഉണ്ട്.

സംശയം തീരാതെ കൂട്ടില്‍ മറ്റു വല്ല ജീവികളം കൊണ്ടിട്ടതാണോ എന്ന് കരുതി തെരഞ്ഞപ്പോള്‍ അടുത്തെങ്ങും അങ്ങിനെ ഒരു സാധ്യതയും കണ്ടുമില്ല. മാത്രമല്ല ചെറിയ നെറ്റുകള്‍ കൊണ്ട് അടച്ച കൂട്ടിലാണ് പിടക്കോഴി അടയിരിക്കുന്നത്. ആയതിനാല്‍ കൂട്ടിലേക്ക് മറ്റു ജീവികള്‍ക്ക് പ്രവേശിക്കാനും സാധ്യമല്ല. അതുകൊണ്ടാണ് വീട്ടുകാരും ഇത് പ്രസവിച്ചതുതന്നെയാണെന്നു പറയുന്നത്.

എന്നാല്‍ വാര്‍ത്തയുമായി ബന്ധപ്പെട്ട് പൂക്കോട് വെറ്റിറനറി അധികൃതരുമായി ബന്ധപ്പെട്ടപ്പോള്‍ കിട്ടിയ വിശദീകരണം ഇങ്ങനെയായിരുന്നു. ശാസ്ത്രീയമായി ഇത് സംഭവിക്കാന്‍ 100 ല്‍ ഒരു ശതമാനം സാധ്യത പോലും ഇല്ലെന്നാണ്. മാത്രമല്ല കോഴികള്‍ക്ക് ഗര്‍ഭപാത്രം ഇല്ലെന്ന സത്യം നിലനില്‍ക്കുന്നതിനാലും കോഴി പ്രസവിച്ചു എന്നു പറയുന്നത് അംഗീകരിക്കാനാവില്ലെന്നുമാണ് അവര്‍ അറിയിച്ചത്. എന്തൊക്കെയായാലും കോഴിക്കുഞ്ഞിനെ തള്ളകോഴിയുടെ അടുത്തുനിന്നും ലഭിച്ചതിനാലും കൂടാതെ പൊക്കിള്‍കൊടിയുള്ളതിനാലും നാട്ടുകാരും വീട്ടുകാരും അത്ഭുതത്തിലാണ്.