പുരുഷ തുണയില്ലാതെ (മഹ്‌റം) ഹജ്ജ് നിര്‍വഹിക്കുന്നതിന് കേരളത്തില്‍നിന്ന് 1,124 സ്ത്രീകള്‍ക്ക് നറുക്കെടുപ്പില്ലാതെ അവസരം ലഭിക്കും. 45 വയസ്സിന് മുകളിലുള്ള സ്ത്രീകളുടെ നാല് പേരുടെ സംഘത്തിനാണ് നേരിട്ട് അവസരം ലഭിക്കുകയെന്ന് സംസ്ഥാന ഹജ്ജ് കമ്മിറ്റി ചെയര്‍മാന്‍ തൊടിയൂര്‍ മുഹമ്മദ് കുഞ്ഞ് മൗലവി അറിയിച്ചു.
കേരളത്തില്‍ ഇതുവരെ 281 കവറുകളിലായാണ് 1,124 അപേക്ഷകള്‍ ലഭിച്ചത്. സംസ്ഥാനത്തിനുള്ള ക്വോട്ടക്ക് പുറമെയാണ് ഈ വിഭാഗത്തില്‍ അധികസീറ്റുകള്‍ അനുവദിക്കുക. പുതിയ ഹജ്ജ് നയത്തിലാണ് 45 വയസ്സ് കഴിഞ്ഞ സ്ത്രീകള്‍ മാത്രമുള്ള സംഘത്തിന് അപേക്ഷിക്കുന്നതിന് കേന്ദ്ര ഹജ്ജ് കമ്മിറ്റി അവസരം നല്‍കിയത്. കഴിഞ്ഞ ദിവസത്തെ പ്രധാനമന്ത്രിയുടെ മന്‍ കീ ബാത്തിലും വിഷയം പരാമര്‍ശിച്ചിരുന്നു.