മാസങ്ങള്‍ക്കു മുമ്പ് എറണാകുളത്തുവച്ച് ഗതാഗതം നിയന്ത്രിക്കുന്നതിനിടയില്‍ മര്‍ദനമേറ്റ ട്രാഫിക് വാര്‍ഡന്‍ പത്മിനിക്ക് മര്‍ദനം. ഇടപ്പള്ളി ടോള്‍ ജംഗ്ഷനിലുള്ള സ്വകാര്യ സെക്യൂരിറ്റി ഏജന്‍സിയായ ബ്രൈറ്റിന്റെ ഓഫീസില്‍വച്ച് ഐ.എന്‍.ടി.യു.സി. നേതാവായ സൂപ്പര്‍വൈസറും സഹപ്രവര്‍ത്തകയും ചേര്‍ന്ന് ഇന്നലെ രാവിലെ മര്‍ദിക്കുകയായിരുന്നു.

ട്രാഫിക് വാര്‍ഡന്‍മാരുടെ യൂണിഫോം മാറ്റുന്നതു സംബന്ധിച്ചുള്ള തര്‍ക്കത്തെ തുടര്‍ന്നാണ്‌ പത്മിനിയെ സര്‍വീസില്‍ നിന്നും പിരിച്ചു വിട്ടത്‌. തുടര്‍ന്നാണ്‌ സ്വകാര്യ സെക്യൂരിറ്റി ഏജന്‍സിയില്‍ പത്മിനി ജോലി നോക്കുന്നത്‌.

മെട്രോ റെയിലിന്റെ കരാറുകാരായ എല്‍ ആന്‍ഡ് ടിക്ക് സ്വകാര്യ വാര്‍ഡന്മാരെയും മറ്റും നല്‍കുന്ന സ്ഥാപനമാണ് ബ്രൈറ്റ്. ഇന്നലെ രാവിലെ ഓഫീസില്‍ ഒപ്പിടാന്‍ എത്തിയപ്പോഴയായിരുന്നു മര്‍ദനം. കഴിഞ്ഞ ശനിയാഴ്ച ഇടപ്പള്ളി പോസ്റ്റ് ഓഫീസ് ഭാഗത്ത് ഡ്യൂട്ടിയിലുണ്ടായിരുന്ന സുമയെ വൈകിട്ട് അഞ്ചരയോടെ ഇവിടെ കാണാത്തതിനെ തുടര്‍ന്ന് ഏജന്‍സിയുടെ എം.ഡിയെ വിളിച്ചു സുമ ഉച്ചയ്ക്ക് 2.30 നാണ് ഡ്യൂട്ടിയില്‍ കയറിയതെന്നും സമയംകഴിയുന്നതിനു മുമ്പു ഡ്യൂട്ടിയില്‍നിന്നു പോയെന്നും പത്മിനി പരാതി പറഞ്ഞതാണ് പ്രശ്‌നമായത്. ഇതില്‍ പ്രകോപിതനായ സൂപ്പര്‍വൈസര്‍ ലതീഷ് കഴിഞ്ഞദിവസം പത്മിനിയെ അസഭ്യവര്‍ഷം ചൊരിയുകയും ഭീഷണിപ്പെടുത്തുകയും ചെയ്തു. പത്മിനി ഇന്നലെ വീണ്ടും ഓഫീസിലെത്തിയപ്പോള്‍ എം.ഡിയോടു പരാതി പറയാന്‍ എത്തിയതാണെന്നു കരുതിയാണ് മര്‍ദിച്ചതെന്നു പരാതിയില്‍ പറയുന്നു.

മര്‍ദനത്തെത്തുടര്‍ന്ന് ഓഫീസില്‍ നിന്ന് ഇറങ്ങിയോടി ഇടപ്പള്ളി ടോള്‍ ജംഗ്ഷനില്‍നിന്നു ഓട്ടോയില്‍ കയറി കളമശേരി പോലീസ് സ്‌റ്റേഷനിലെത്തി പരാതി തയ്യാറാക്കുന്നതിനിയടെ പത്മിനിക്കു ദേഹാസ്വാസ്ഥ്യം അനുഭവപ്പെടുകയും തുടര്‍ന്ന് കളമശേരി ഗവണ്‍മെന്റ് മെഡിക്കല്‍ കോളജില്‍ പ്രവേശിക്കുകയും ചെയ്തു. പത്മിനിയുടെ പരാതിയെ തുടര്‍ന്ന് കളമശേരി പോലീസ് കേസെടുത്ത് അന്വേഷണമാരംഭിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha