ഹോട്ടലുകളിലെ ഓഡിറ്റോറിയങ്ങളില്‍ വച്ച്‌ നടത്തുന്ന വിവാഹത്തിനുള്ള മംഗല്യനിധി സെസ്‌ ഹൈക്കോടതി റദ്ദാക്കി. സെസ്‌ എര്‍പ്പെടുത്താന്‍ സര്‍ക്കാരിന്‌ അധികാരമില്ലെന്ന്‌ ഹൈക്കോടതിയുടെ ഉത്തരവ്‌. ഇതുവരെ ഈ ഇനത്തില്‍ ഈടാക്കിയ തുക തിരികെ നല്‍കേണ്ടെന്നും കോടതി വ്യക്തമാക്കി. കൊല്ലം, കാസര്‍കോട്‌ ജില്ലകളിലെ ഓഡിറ്റോറിയം ഉടമകള്‍ സമര്‍പ്പിച്ച ഹര്‍ജിയിലാണ്‌ കോടതിയുടെ ഉത്തരവ്‌.
2013ലെ ബജറ്റിലാണ്‌ മംഗല്യ സെസ്‌ ഈടാക്കാന്‍ പ്രഖ്യാപനമുണ്ടായത്‌. ത്രീ സ്‌റ്റാറിനു മുകളിലുള്ള ഹോട്ടലുകളിലെ ഓഡിറ്റോറിയങ്ങളില്‍ നടക്കുന്ന വിവാഹ ചെലവിന്റെ മൂന്നു ശതമാനം സെസ്‌ ആയി ഈടാക്കാനായിരുന്നു സര്‍ക്കാര്‍ തീരുമാനം.
കോര്‍പ്പറേഷന്‍, മുനിസിപ്പാലിറ്റി പരിധിയില്‍ വരുന്ന എസി ഓഡിറ്റോറിയങ്ങള്‍ക്ക്‌ 10,000 രൂപയും എസിയില്ലാത്ത ഓഡിറ്റോറിയങ്ങള്‍ക്ക്‌ 5,000 രൂപയും ചാര്‍ജ്‌ ഈടാക്കാനായിരുന്നു സര്‍ക്കാരിന്റെ തീരുമാനം. പഞ്ചായത്ത്‌ പരിധിയില്‍ ആണെങ്കില്‍ ഇത്‌ യഥാക്രമം 7,500, 3,000 എന്ന ക്രമത്തിലാണ്‌.
500 സീറ്റുകള്‍ക്കു മുകളിലുള്ള എല്ലാ ഓഡിറ്റോറിയവും സ്‌റ്റാര്‍ ഹോട്ടലുകളിലെ ഓഡിറ്റോറിയങ്ങളും സെസ്‌ അടയ്‌ക്കണമായിരുന്നു. എന്നാല്‍ ഈ നീക്കം വിവാഹത്തിന്‌ ടാക്‌സ്‌ ഏര്‍പ്പെടുത്തുന്നതാണെന്ന്‌ ഹര്‍ജിക്കാര്‍ വാദിച്ചിരുന്നു.
അതേസമയം, നികുതിയായല്ല സെസ്‌ ഈടാക്കുന്നതെന്നും കല്യാണവുമായി ബന്ധപ്പെട്ടുള്ള ആഘോഷങ്ങള്‍ ഫീസ്‌ ചുമത്തുന്നതാണെന്നും ഇങ്ങനെ ലഭിക്കുന്ന തുക സര്‍ക്കാരിന്റെ മംഗല്യ നിധിയിലേക്ക്‌ ചേര്‍ക്കുമെന്നും ഇതു പാവപ്പെട്ട വീട്ടിലെ കുട്ടികളുടെ വിവാഹത്തിനു ഉപകരിക്കുമെന്നും സര്‍ക്കാര്‍ വാദിച്ചിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha