സംസ്ഥാനത്ത് കനത്ത മഴ തുടരുന്നു, പല സ്ഥലങ്ങളിലും ഉരുള്പൊട്ടലും മണ്ണിടിച്ചിലും, 7 പേര് മരിച്ചു
സംസ്ഥാനത്ത് ഇന്നലെ മുതല് തുടരുന്ന കനത്ത മഴയില് വ്യാപക നാശനഷ്ടമാണ് ഉണ്ടായത്. സംസ്ഥാനത്തെ പലസ്ഥലങ്ങളിലും വൈദ്യുതിബന്ധം തകരാറിലായിരിക്കുകയാണ്. മണ്ണിടിച്ചിലില് പലയിടങ്ങളിലും വ്യാപകമായ കൃഷിനാശവും സംഭവിച്ചിട്ടുണ്ട്. തിരുവനന്തപുരത്തെ പൊന്മുടിയില് ഉരുള്പൊട്ടി. വാമനപുരം നദിയുടെ തീരത്തു താമസിക്കുന്നവര്ക്കു ജാഗ്രതാ നിര്ദേശം നല്കിയിട്ടുണ്ട്. മല്സ്യത്തൊഴിലാളികള്ക്കും ജാഗ്രതാ നിര്ദേശം നല്കിയിട്ടുണ്ട്. ആര്യനാട് ഇറവൂര് പേയ്ക്കാവിളയിലെ തങ്കപ്പന് ആശാരി (69) വീടിന്റെ ചുമരിടിഞ്ഞ് വീണു മരിച്ചു. മലവെള്ള പാച്ചില് വീടിലേക്കു വരുന്നത് തടയുന്നിനിടെ തെന്നിവീണ് വയനാട് ആദിവാസി കോളനിയിലെ ചന്ദ്രനും മരിച്ചു.
കോഴിക്കോട് താമരശേരിക്ക് അടുത്ത് ഈങ്ങാപ്പുഴ, അടിവാരം ടൗണുകള് വെള്ളത്തിലായി. കൈതപ്പൊയിലില് പുഴയില് അകപ്പെട്ടവരെ അഗ്നിശമന സേന രക്ഷപ്പെടുത്തി. കുറ്റിയാടി കാവിലുംപാറ പഞ്ചായത്തിലെ നാഗംപാറ, വട്ടിപ്പന, നാഗംപാറ ലക്ഷംവീടു കോളനിറോഡ് എന്നിവിടങ്ങളില് മണ്ണിടിച്ചിലുണ്ടായി. ഒരു വീട് ഭാഗികമായി തകര്ന്നു. മലപ്പുറം ജില്ലയിലെ കാളികാവ് ജംക്ഷനില് നിലമ്പൂര്-പെരുമ്പിലാവ് സംസ്ഥാനപാതയില് വെള്ളം കയറി ഗതാഗതം നിലച്ചു. കാളികാവില് അഞ്ചു കുടുംബങ്ങള് വെള്ളക്കെട്ടില് കുടുങ്ങി.
കനത്ത മഴയില് പൊന്മുടി ഒറ്റപ്പെട്ടിരിക്കുകയാണ്. കല്ലാര് കരകവിഞ്ഞൊഴുക്കുകയാണ്. പൊന്മുടിയില് നിന്ന് ഇന്നലെ വൈകിട്ടു തന്നെ സന്ദര്ശകരെ ഒഴിപ്പിച്ചു.
സംസ്ഥാനത്ത് അടുത്ത മൂന്നു ദിവസം ശക്തമായ മഴ പെയ്യുമെന്നു കാലാവസ്ഥാ നിരീക്ഷണ കേന്ദ്രം അറിയിച്ചു. കന്യാകുമാരിക്കു തെക്ക് ന്യൂനമര്ദം രൂപപ്പെട്ടതിനാല് 26 വരെ കേരളത്തില് ശക്തമായ മഴ പെയ്യാനാണ് സാധ്യത. മുന്കരുതലെടുക്കാന് കലക്ടര്മാര്ക്കു നിര്ദേശം നല്കി.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
