ഓണത്തിന് ദിവസങ്ങള് ബാക്കിനില്ക്കേ കേരളം കരയുന്നു; ഓണം വെള്ളത്തിലാകുമോ ഈശ്വരാ…?
ഓണത്തിന് ഇനി ദിവസങ്ങള് ബാക്കി നില്ക്കേ കേരളം മഴക്കെടുതിയില്. അപ്രതീക്ഷിതമായി തുടര്ച്ചയായി പെയ്ത മഴ ഓണ സ്വപ്നങ്ങളെ തച്ചുടയ്ക്കുകയാണ്. മഴ ശക്തമായതിനെ തുടര്ന്ന് താഴ്ന്ന ഭാഗങ്ങള് വെള്ളത്തിനടയിലായി. മഴ കനത്തതിനാല് സാധാരണക്കാര്ക്ക് ജോലിയില്ല. കെട്ടിടപ്പണിക്കാരും കൂലിപ്പണിക്കാരും പണിയില്ലാതെ ആശങ്കയിലാണ്. ഈ കിട്ടുന്ന പണിക്കൂലിയില് നിന്നു വേണം ഓണക്കോടിയും മറ്റു സാധനങ്ങളും വാങ്ങേണ്ടത്. ജോലിയില്ലാത്തതിനാല് പല കൂലിപ്പണിക്കാരും ബോണസ് കിട്ടുമോ എന്ന ആശങ്കയിലുമാണ്.
മഴ കച്ചവടക്കാരെ മൊത്തത്തില് ബാധിച്ചു. മഴകാരണം സാധാരണക്കാര്ക്ക് വരുമാനം കുറഞ്ഞത് ഒരു കാരണമായി. നാട്ടിന് പുറങ്ങളിലെ സാധാരണ കടക്കാരെ മുതല് സര്ക്കാര് നിയന്ത്രണത്തിലുള്ള സപ്ലൈകോയെ വരെ മഴ ബാധിച്ചു. ഓണം ആഘോഷിപ്പിക്കാനായി സപ്ലൈകോ തിരുവനന്തപുരത്ത് ഒരുക്കിയിരുന്ന സ്റ്റാള് പൂര്ണമായും മഴയില് കുതിര്ന്ന് നശിച്ചു. അങ്ങനെ പാവപ്പെട്ടവന് നല്കാനായി കരുതി വച്ചിരുന്ന അരിയും മറ്റ് ഭക്ഷ്യ സാധനങ്ങളും മഴയില് കുതിര്ന്നു.
മഴ ഒന്നു മാനത്ത് വന്നാല് യാത്ര ചെയ്യാന് മടിക്കുന്നവരാണ് മലയാളികള്. അത് കൊണ്ട് തന്നെ മഴയാത്ര ഒരു ദുരിതയാത്രയായി മാറുമെന്നതിനാല് മിക്കവര്ക്കും പുറത്തിറങ്ങാന് മടിയാണ്. ഇത് ഏറ്റവുമധികം ബാധിക്കുന്നത് കച്ചവടക്കാരേയാണ്. വാങ്ങുന്നവനും വില്ക്കുന്നവനും ഒരുപോലെ ലാഭം കിട്ടുന്ന വഴിയോര കച്ചവടക്കാരെയും ഈ മഴ വെള്ളം കുടിപ്പിക്കും.
ഓണത്തിനായി തയ്യാറെടുപ്പ് നടത്തുന്ന സാധാരണ വീട്ടമ്മമാരും ഈ മഴയെ ശപിച്ചു തുടങ്ങി.
അത്തത്തിന് ഇനി ദിവസങ്ങള് മാത്രമാണ് ഉള്ളത്. മഴ ഈ നിലയില് തുടര്ന്നാല് പൂക്കളം ഒരുക്കുന്ന ക്ലബ്ബുകാരും തരുണീ മണികളും വെള്ളത്തിലാകും.
ഈ ആഴ്ച കൂടി മാത്രമാണ് വിദ്യാഭ്യാസ സ്ഥാപനങ്ങള് പ്രവര്ത്തിക്കുന്നത്. അത് കഴിഞ്ഞാല് ഓണ അവധിയാണ്. എല്ലാ കാമ്പസുകളും സര്ക്കാര് സ്ഥാപനങ്ങളും മറ്റ് സ്വകാര്യ സ്ഥാപനങ്ങളും ഓണം ആഘോഷിക്കുന്നത് ഈ വേളയിലാണ്. ഈ മഴ തുടര്ന്നാല് കാമ്പസുകളിലെ ഓണം നനഞ്ഞു പോകും. കേരളീയ വേഷമായ സെറ്റുസാരിയുടുക്കാനോ ഊഞ്ഞാലാടാനോ തരുണീമണികളെ മരുന്നിന് പോലും കിട്ടില്ല എന്നത് സത്യം.
എന്തായാലും കനത്ത വരള്ച്ചയും പവര്കട്ടും കണ്ട് കേരളം മഴയ്ക്കായി പ്രാര്ത്ഥിച്ച നിമിഷങ്ങളുണ്ട് എന്നത് സത്യമാണ്. എന്നുകരുതി കാത്തുകാത്തിരുന്ന ഓണത്തിന് മീതെ മഴ വീണാല് മലയാളിക്കത് സഹിക്കുമോ. അവര് മുഖത്തോട് മുഖം ചോദിക്കുകയാണ്. ഓണം വെള്ളത്തിലാകുമോ ഈശ്വരാ.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
