കഴക്കൂട്ടം ടെക്‌നോ പാര്‍ക്കില്‍ വന്‍ തീപിടുത്തമുണ്ടായി. ഇന്നലെ വൈകുന്നേരം ആറരയോടെയാണ് തീപിടിത്തമുണ്ടായത്. ഫേസ് ടു വിലെ ഗംഗാ ബില്‍ഡിംഗിലെ രണ്ടാം നിലയില്‍ പ്രവര്‍ത്തിക്കുന്ന ആര്‍ എം എഡ്യൂക്കേഷന്‍ സൊല്യൂഷനിലാണ് തീപടർന്നത്. ശുചിമുറിയ്ക്ക് സമീപം മാലിന്യം കൂട്ടിയിട്ടിരുന്ന ഭാഗത്താണ് തീ പിടിച്ചത്. ഇത് പിന്നീട് പടർന്നുപിടിക്കുകയായിരുന്നു. കെട്ടിടത്തില്‍നിന്നും ശക്തമായ പുകയുയർന്നിരുന്നു.

അഗ്നിശമന സേനാ യൂണിറ്റ് ഉടന്‍ എത്തി തീ അണച്ചതിനാല്‍ വന്‍ ദുരന്തം ഒഴിവായി. 7.40ഓടെ തീ അണയ്ക്കാനായതായി ലീഡിംഗ് ഫയര്‍മാന്‍ മധു പറഞ്ഞു. പുകവലിയ്ക്ക് ശേഷം തീപ്പെട്ടിയൊ സിഗരറ്റ് കുറ്റിയോ ഉപേക്ഷിച്ചതാകാമെന്നാണ് അനുമാനം. അതേസമയം വെന്റിലേഷന്‍ സൗകര്യമില്ലാത്ത കെട്ടിടത്തില്‍ ഇത്തരമൊരു അപകടമുണ്ടായതിന് കാരണം അധികൃതരുടെ ഉത്തരവാദിത്വമില്ലായ്മായണെന്നും മധു പറഞ്ഞു. സ്ഥാപനത്തിന് അവധിയായതിനാല്‍ മുപ്പതോളം പേര്‍ മാത്രമാണ് സംഭവസ്ഥലത്ത് ഉണ്ടായിരുന്നത്. പുക പടര്‍ന്നത് പ്രദേശത്ത് പരിഭ്രാന്തിയുണ്ടാക്കി.