ജയിലുകളില് പെട്രോള് ബങ്കുകള് തുടങ്ങുന്നു; ഇനി പെട്രോളടിക്കാനായി ജയിലില് കയറി ഇറങ്ങാം
സംസ്ഥാനത്തെ ജയില് വകുപ്പുകളുടെ നേതൃത്വത്തില് പെട്രോള് ബങ്കുകള് വരുന്നതോടെ പെട്രോളടിക്കാന് ഇനി ജയിലില് കയറി ഇറങ്ങാം. തടവുകാരുടെ തൊഴില് പരിശീലനത്തിന്റെയും വരുമാനം വര്ദ്ധിപ്പിക്കുന്നതിന്റെയും ഭാഗമായാണ് ജയിലിനോട് ചേര്ന്ന് പെട്രോള് ബങ്കുകള് തുടങ്ങുന്നത്.
ആദ്യഘട്ടത്തില് പൂജപ്പുര സെന്ട്രല് ജയില്, തൃശ്ശൂര് വിയ്യൂര് ജയില്, കണ്ണൂര് സെന്ട്രല് ജയില്, കാസര്കോട്, ചീമേനി തുറന്ന ജയില് എന്നിവിടങ്ങളിലാണ് ബങ്കുകള് സ്ഥാപിക്കുക. പൂജപ്പുരയില് പരീക്ഷാഭവനോട് ചേര്ന്നിരിക്കുന്ന ഭാഗത്തും, വിയ്യൂരില് കെ.എസ്.ഇ.ബി ഓഫീസിന് എതിര്വശത്തും ഇതിനായി സ്ഥലം കണ്ടെത്തിക്കഴിഞ്ഞു.
കണ്ണൂരില് ജയില് കോമ്പൗണ്ടിനോട് ചേര്ന്നും ചീമേനിയില് ജയിലിനടുത്തുള്ള 50 സെന്റ് സ്ഥലത്തുമാണ് ബങ്കുകള് വരിക. റവന്യൂ വകുപ്പിന്റെ അനുമതി ലഭിച്ചാലുടന് പണി തുടങ്ങും. ഇന്ത്യന് ഓയില് കോര്പറേഷനുമായി സഹകരിച്ചാണ് പദ്ധതി. 75 ലക്ഷം മുതല് ഒരു കോടി വരെയാണ് പദ്ധതി ചെലവ്. ആഭ്യന്തര വകുപ്പിന്റെ അനുമതി ലഭിച്ചെങ്കിലും ഫയര് ആന്ഡ് സേഫ്ടി, പി.ഡബ്ല്യു.ഡി വകുപ്പുകളുടെ അനുമതിപത്രം ലഭിക്കാനുണ്ട്.
ആന്ധ്രാപ്രദേശ്, തെലുങ്കാന തുടങ്ങിയ സംസ്ഥാനങ്ങളിലെ ജയിലുകളില് വിജയകരമായി നടപ്പിലാക്കിയ മാതൃകയാണ് കേരളത്തിലും കൊണ്ടുവരുന്നത്. ഒരു പമ്പില് 13 മുതല് 15 വരെ തടവുകാര്ക്ക് ആദ്യഘട്ടത്തില് തൊഴില്. പിന്നീട് വിപുലമാക്കും. തുടക്കത്തില് പകല്സമയത്ത് മാത്രമായിരിക്കും പ്രവര്ത്തനം.
സര്ക്കാര് വകുപ്പുകളുടെ എന്.ഒ.സി ഉടന് കിട്ടും. ബങ്കുകള് സ്ഥാപിക്കാന് ഉദ്ദേശിക്കുന്ന സ്ഥലത്തിന് റവന്യൂ വകുപ്പിന്റെ അനുമതി ലഭിക്കുന്ന മുറയ്ക്ക് നിര്മ്മാണം തുടങ്ങും. നടപടി വേഗത്തിലാക്കാന് ജില്ലാ കളക്ടര് നിര്ദ്ദേശിച്ചിട്ടുണ്ട്.
https://www.facebook.com/Malayalivartha
