അഞ്ചുവർഷമായി കുടിവെള്ളം ഇല്ലെങ്കിലും വാട്ടർബില്ല് കണ്ട് ഞെട്ടിയിരിക്കുകയാണ് ഇടുക്കി കുമളി റോസാപ്പൂക്കണ്ടം സ്വദേശിയായ രത്നമ്മ. പത്തരലക്ഷംരൂപയാണ് വാട്ടർബില്ല് വന്നിരിക്കുന്നത്. അഞ്ചുവർഷം മുന്‍പാണ് പ്രദേശത്തെ ജില്ലാ സഹകരണബാങ്കിലെ താത്കാലിക ജീവനക്കാരിയായ രത്നമ്മ വാട്ടർ അതോറിറ്റിയുടെ കണക്ഷന്‍ എടുക്കുന്നത്.

അഞ്ചുവർഷമായിട്ടും ആവശ്യസമയത്തൊന്നുംതന്നെ ഈ കണക്ഷന്‍ വഴി പ്രദേശത്തുകാർക്കൊന്നും വെള്ളം ലഭിച്ചിട്ടില്ല. ഇതിനുപുറമേയാണ് കഴിഞ്ഞ ദിവസം 10,64,157 രൂപയുടെ ബില്‍ രത്നമ്മയ്ക്ക് ലഭിച്ചത്. കണക്ഷന്‍ പ്രവർത്തന രഹിതമാണെന്ന് ഈ ബില്ലില്‍തന്നെ രേഖപ്പെടുത്തിയിട്ടുമുണ്ട്. കഴിഞ്ഞ വർഷം കുടിശ്ശികയടക്കം 1500 രൂപ രത്നമ്മ അടക്കുകയും ചെയ്തിരുന്നു. അധികൃതരുമായി ബന്ധപ്പെട്ടപ്പോള്‍ അച്ചടിപ്പിശകാകാനാണ് സാധ്യതയെന്നാണ് വാട്ടർ അതോറിറ്റി അധികൃതർ പറയുന്നത്.