സിപിഎം നേതൃത്വത്തില്‍ ഭരണത്തിലുള്ള ഏക സംസ്ഥാനമായി കേരളം മാറുമ്പോള്‍ ഇനിയുള്ള നാളുകള്‍ മൂന്ന് മുന്നണികള്‍ക്കും നിര്‍ണായകമാകുന്നു. ഭരണത്തുടര്‍ച്ച ലക്ഷ്യമിട്ടുള്ള പ്രവര്‍ത്തനങ്ങള്‍ നടത്തുമ്പോള്‍ വിലങ്ങുതടിയായി പല ഘടകങ്ങളുമുണ്ട്. അക്രമ രാഷ്ട്രീയം വെടിഞ്ഞ് ജനക്ഷേമ പ്രവര്‍ത്തനങ്ങള്‍ നടത്തിയില്ലെങ്കില്‍ കേരളത്തില്‍ പിടിച്ചുനില്‍ക്കാനാകില്ലെന്ന ശക്തമായ സന്ദേശമാണ് എല്ലാ പാര്‍ട്ടികള്‍ക്കും ത്രിപുര നല്‍കുന്ന പാഠം.

മുന്നണികളെ ചാക്കിട്ട് പിടിച്ച് പരമാവധി സീറ്റുകള്‍ നേടുക എന്നതാണ് എല്‍ഡിഎഫിന്റേയും യുഡിഎഫിന്റെയും എന്‍ഡിഎയുടേയും ശ്രമം. ഇതില്‍ ബാങ്ക് ഡെപ്പോസിറ്റ് പോലെയുള്ള മാണിയുടെ 10 ല്‍ കുറയാത്ത സീറ്റുകളാണ് എല്ലാ മുന്നണികളും നോട്ടമിടുന്നത്. ഇക്കാര്യത്തില്‍ മാണിയുടെ മനസിലിരുപ്പ് ഇടതുമുന്നണിയിലേക്ക് ചേക്കേറാനാണ്. സിപിഎമ്മിനും മാണി വരുന്നതിനോട് എതിര്‍പ്പില്ല. എന്നാല്‍ സഖ്യകക്ഷിയായ സിപിഐയുടെ ഒളിഞ്ഞും തെളിഞ്ഞുമുള്ള ആക്രമണമാണ് മാണിയുടെ പ്രവേശനം വൈകിപ്പിക്കുന്നത്.

എന്നാല്‍ മാണിയെ എടുത്താല്‍ സിപിഐ മുന്നണി വിടുമെന്ന ആശങ്കയുമുണ്ട്. അങ്ങനെ വന്നാല്‍ സിപിഐയെ യുഡിഎഫ് ചാക്കിട്ട് പിടിച്ച് മറ്റൊരു സമവായമുണ്ടാക്കും. അത് വരാതിരിക്കാനായി സിപിഐയെ അനുനയിച്ച് മാണിയെ കൊണ്ടു വരാനാണ് സിപിഎമ്മിന്റെ ശ്രമം.

ഈയൊരു രാഷ്ട്രീയ സാഹചര്യം പരമാവധി മുതലെടുക്കാനാണ് അമിത്ഷായുടെ ശ്രമം. വെള്ളാപ്പള്ളിയെ കൊണ്ട് വന്നിട്ട് ഒരു ഗുണവും കിട്ടിയില്ല. സ്വന്തം അനുയായികള്‍ പോലും വോട്ട് ചെയ്തില്ല. പക്ഷെ ക്രൈസ്തവ സഭ അങ്ങനെയല്ല തീര്‍ച്ചയായും വിശ്വസിക്കാം. മാത്രമല്ല നൂനപക്ഷവുമായി അടുത്ത് പേരുദോഷവും മാറ്റം. അങ്ങനെയാണ് അല്‍ഫോണ്‍സ് കണ്ണന്താനത്തെ മന്ത്രിയാക്കിയത്.

ഇനി ബിജെപി നോട്ടമിടുന്നത് മാണിയെയാണ്. മാണിയ്ക്കായി എന്ത് ചെയ്യാനും ബിജെപി കേന്ദ്ര നേതൃത്വം മടിക്കില്ല. മാണിക്ക് ഗവര്‍ണര്‍ പദവി, മകന്‍ ജോസ് കെ മാണിക്ക് കേന്ദ്ര മന്ദ്രി പദം അങ്ങനെ... ഇതാണ് യുഡിഎഫിനേയും എല്‍ഡിഎഫിനേയും അങ്കലാപ്പിലാഴ്ത്തുന്നത്. അവര്‍ പറഞ്ഞാല്‍ പറഞ്ഞത് പോലെ ചെയ്യും. ഇനിയും മാണിയെ പിണക്കി നിര്‍ത്തിയാല്‍ സംഭവം കൈവിട്ടു പോകുമെന്ന് കോണ്‍ഗ്രസ് നേതാക്കള്‍ക്ക് തന്നെ മനസിലായി. പ്രശ്‌നത്തില്‍ രാഹുല്‍ ഗാന്ധി നേരിട്ടിടപെടാനാണ് സാധ്യത.

എന്തായാലും തൃപുര വലിയൊരു പാഠമാണ് മുന്നണികള്‍ക്ക് നല്‍കുന്നത്. ത്രിപുരയില്‍ 25 വര്‍ഷത്തെ തുടര്‍ച്ചയായ ഇടതുമുന്നണി ഭരണമാണ് അവസാനിച്ചിരിക്കുന്നത്. ഇന്ന് ത്രിപുരയാകാമെങ്കില്‍ എന്തുകൊണ്ട് നാളെ കേരളമായിക്കൂടാ എന്നാണ് ഇപ്പോള്‍ മൂന്ന് മുന്നണികളും ചിന്തിക്കുന്നത്.