ഇടപാടുകാര്ക്ക് മികച്ച സേവനം ഉറപ്പുവരുത്താനൊരുങ്ങി ട്രഷറികള്
ഇടപാടുകാര്ക്ക് മികച്ച സേവനം ഉറപ്പുവരുത്താന് അടിസ്ഥാനസൗകര്യങ്ങള് വര്ധിപ്പിച്ച് മുഖം മിനുക്കാന് ഒരുങ്ങുകയാണ് ട്രഷറികള്. ഇതിനായി വിപുലമായ പദ്ധതി തയ്യാറായി കഴിഞ്ഞു. ട്രഷറികളിലെ അടിസ്ഥാന സൗകര്യ ഓഡിറ്റ് റിപ്പോര്ട്ടിന്റെ അടിസ്ഥാനത്തിലാണ് വികസനപദ്ധതിക്ക് രൂപംനല്കിയത്.
സ്വന്തമായി കെട്ടിടമില്ലാത്ത ട്രഷറികള്ക്ക് കെട്ടിടം നിര്മിക്കുക, പഴകിയതും സൗകര്യമില്ലാത്തതുമായ കെട്ടിടങ്ങള് നവീകരിക്കുക, സൗകര്യമില്ലാത്തവ പുനഃക്രമീകരിക്കുക തുടങ്ങിയവയാണ് നടപ്പാക്കുക. 61 പുതിയ കെട്ടിടങ്ങള് നിര്മിക്കുകയും 100 കെട്ടിടങ്ങള് നവീകരിക്കുകയും ചെയ്യുമെന്ന് മന്ത്രി ടി എം തോമസ് ഐസക് പറഞ്ഞു.ബജറ്റില് 17 കോടി രൂപ നവീകരണത്തിന് നീക്കിവച്ചിട്ടുണ്ട്.
പത്ത് കെട്ടിടങ്ങളുടെ നവീകരണത്തിന് ഭരണാനുമതി നല്കി. വഞ്ചിയൂര് അഡീഷണല് സബ്ട്രഷറി, കൊല്ലം തലശേരി പെന്ഷന് പേമെന്റ് സബ് ട്രഷറികള്, മലയിന്കീഴ് കൊല്ലം ശാസ്താംകോട്ട മാന്നാര് പുല്പ്പള്ളി വടക്കാഞ്ചേരി പഴയങ്ങാടി സബ്ട്രഷറികള്ക്കാണ് ഭരണാനുമതി. പ്രവൃത്തി ഉടന് ആരംഭിക്കും.
പത്ത് ട്രഷറികള്ക്ക് സ്ഥലം ലഭിച്ചു. ചാത്തന്നൂര്, പീരുമേട്, എറണാകുളം, മണ്ണാര്ക്കാട്, പയ്യന്നൂര്, പേരാവൂര്, കാസര്കോട്, ചട്ടഞ്ചാല് സബ്ട്രഷറികള്, മട്ടന്നൂര് അഡീഷണല് ജില്ലാ ട്രഷറി, എറണാകുളം പെന്ഷന് പേമെന്റ് സബ്ട്രഷറി എന്നിവയ്ക്ക് കെട്ടിടനിര്മാണത്തിന് സ്ഥലം ലഭ്യമായി. ചെര്പ്പുളശേരി, കുത്തിയതോട്, പള്ളിക്കത്തോട്, പെരിന്തല്മണ്ണ, നിലമ്പൂര്, കല്ലൂര്ക്കാട്, ചങ്ങരംകുളം, കരുവാരക്കുണ്ട്, എടവണ്ണ സബ്ട്രഷറികള്ക്ക് സ്ഥലം കൈമാറ്റനടപടി പുരോഗമിക്കുന്നു.
മാറ്റങ്ങളെക്കുറിച്ച് ജീവനക്കാര് കൂട്ടായി ചര്ച്ചചെയ്ത് പദ്ധതി തയ്യാറാക്കി നല്കണമെന്ന നിര്ദേശം നല്കിയിട്ടുണ്ട്. സംയോജിത സാമ്പത്തിക മാനേജ്മെന്റ് നടപ്പാക്കിയതിന്റെ ഭാഗമായി ട്രഷറി ഇടപാടുകളിലുണ്ടായ വേഗത്തിനും കാര്യക്ഷമതയ്ക്കും അനുസൃതമായി ട്രഷറികളിലെ അടിസ്ഥാനസൗകര്യവും മുഖച്ഛായയും മാറ്റുകയാണ് ലക്ഷ്യം. എല്ലാ ട്രഷറിയിലും കസ്റ്റമര് ലോഞ്ച് ഏര്പ്പെടുത്തും.
ട്രഷറികളുടെ കംപ്യൂട്ടര് സംവിധാനം നവീകരിച്ച് എണ്ണം ജീവനക്കാരുടെ തുല്യ അനുപാതത്തിലാക്കും. കൂടുതല് ജനറേറ്ററുകളും നോട്ടെണ്ണല് യന്ത്രങ്ങളും ലഭ്യമാക്കും.
https://www.facebook.com/Malayalivartha
