എത്രയാളുകളെ വാഹമിടിച്ച് മരിക്കുന്നു, ഇയാള്‍ വാഹനമിടിച്ച് മരിക്കുന്നില്ലല്ലോ എന്ന് പറയുന്ന മാധ്യമപ്രവര്‍ത്തകരുണ്ടെന്ന് മുഖ്യമന്ത്രി പിണറായി വിജയന്‍. ചെന്നൈ അപ്പോളോ ആശുപത്രിയിലെ പതിവ് പരിശോധനകള്‍ക്ക് ശേഷം വിമാനത്താവളത്തിലെത്തിയ അദ്ദേഹം മാധ്യമപ്രവര്‍ത്തകരോട് സംസാരിക്കുകയായിരുന്നു. പൂര്‍ണ ആരോഗ്യവാനാണ്. തന്റെ മരണം ആഗ്രഹിക്കുന്നവരാണ് കഥകള്‍ മെനഞ്ഞത്. കഴിഞ്ഞ 15 വര്‍ഷമായി ചെന്നൈ അപ്പോളോ ആശുപത്രിയില്‍ മൂന്ന് മാസത്തിലൊരിക്കല്‍ പിണറായി പരിശോധനകള്‍ നടത്തുന്നുണ്ട്. ഇത്തവണ പോയതും അങ്ങനെയാണ്. അതില്‍ അസാധാരണമായി ഒന്നുമില്ല.

ത്രിപുരയിലെ പരാജയത്തെക്കുറിച്ച് ചോദിച്ചപ്പോഴാണ് വേറൊരു കാര്യമാണ് പറയാനുള്ളതെന്ന് പ്രതികരിച്ചത്. പതിവ് പരിശോധനയ്ക്കാണ് ചെന്നൈയിലേക്ക് പോയത്. ഒരിക്കല്‍ എകെജി സെന്ററിലേക്കു പോകുമ്പോള്‍ ഒരു മാധ്യമപ്രവര്‍ത്തകന്‍ അവിടെ ഉണ്ടായിരുന്നു. അയാള്‍ അടുത്ത സുഹൃത്തിനോടു പറയുകയാണ് ഇയാള്‍ വാഹനമിടിച്ചു മരിക്കുന്നില്ലല്ലോയെന്ന്. അങ്ങനെയുള്ളവരാണ് തന്റെ പ്ലേറ്റ്‌ലറ്റ് കൗണ്ട് കുറഞ്ഞെന്ന വാര്‍ത്തകള്‍ പ്രചരിപ്പിച്ചത്. അവര്‍ ആഗ്രഹിച്ചത് കൊണ്ടുമാത്രം തനിക്ക് ഒന്നും സംഭവിക്കില്ലെന്നും മുഖ്യമന്ത്രി വ്യക്തമാക്കി.

പതിവു പരിശോധന മാത്രമാണെന്ന് ആശുപത്രി പുറത്തിറക്കിയ മെഡിക്കല്‍ ബുള്ളറ്റിനിലും പറയുന്നു. സി.പി.ഐയുടെ മലപ്പുറം സമ്മേളന വേദിയില്‍ നിന്ന് കൊച്ചിയിലെത്തിയ മുഖ്യമന്ത്രി നെടുമ്പാശേരി വഴിയാണ് ചെന്നൈയിലേക്ക് പോയത്. ശനി വൈകിട്ട് ആശുപത്രി വിട്ട അദ്ദേഹം ചെപ്പോക്കിലെ സര്‍ക്കാര്‍ അതിഥിമന്ദിരത്തിലാണ് താമസിച്ചത്. കമലാഹാസന്‍ മുഖ്യമന്ത്രിയെ സന്ദര്‍ശിച്ചിരുന്നു. രാഷ്ട്രീയ പാര്‍ട്ടി രൂപീകരിച്ച ശേഷം പിണറായിയുമായുള്ള ആദ്യ കൂടിക്കാഴ്ചയായിരുന്നു.