ഗള്‍ഫില്‍ നിന്ന് അനധികൃതമായി കൊണ്ടുവന്ന പൂച്ചയെ ഉദ്യോഗസ്ഥര്‍ കസ്റ്റഡിയിലെടുത്തു. കൊച്ചി നെടുമ്പാശ്ശേരി വിമാനത്താവളത്തിലാണ് ഇത്തരത്തിലൊരപൂർവ്വ സംഭവം അരങ്ങേറിയത്. നടപടി ക്രമങ്ങൾ പാലിക്കാതെയാണ് പൂച്ചയെ കൊണ്ടുവന്നെതെന്നു ചൂണ്ടിക്കാണിച്ചാണ് ഉദോഗസ്ഥരുടെ നടപടി.

ഈ മാസം രണ്ടിന് ജിദ്ദയില്‍ നിന്ന് വന്ന സൗദി എയര്‍ലൈന്‍സിലാണ് പൂച്ചയെ കൊണ്ടുവന്നത്. എന്നാൽ വിമാനത്താവളത്തിലെത്തിയപ്പോള്‍ കസ്റ്റംസ് വിഭാഗം പൂച്ചയെ കസ്റ്റഡിയില്‍ എടുക്കുകയായിരുന്നു.

വിദേശത്ത് നിന്നു വളര്‍ത്തു മൃഗങ്ങളെ കൊണ്ടുവരുന്നതിന് പ്രത്യേക നടപടിക്രമങ്ങള്‍ ഉണ്ട്. പൂച്ച എവിടെയാണോ ജനിച്ചത് അവിടത്തെ ആരോഗ്യ വകുപ്പിന്റെ സര്‍ട്ടിഫിക്കറ്റ് ഉണ്ടായിരിക്കണം. എന്നാല്‍, പൂച്ചയുടെ ഉടമസ്ഥരുടെ കൈയില്‍ ഇതൊന്നും ഇല്ലായിരുന്നു.

എന്നാൽ ഇത് മാത്രമല്ല പ്രശ്‍നം, പൂച്ചയെ എവിടേക്കാണോ കൊണ്ടുവരുന്നത് അവിടെത്തന്നെ പരിശോധിക്കുകയും വേണം. പൂച്ചയെ പരിശോധിക്കാനുള്ള സംവിധാനം നെടുമ്പാശ്ശേരിയിൽ ഇല്ല. തുടര്‍ന്ന് പൂച്ചയെ ജിദ്ദയിലേക്ക് തന്നെ തിരിച്ചയച്ചു.

നിലവില്‍ ഡല്‍ഹി, മുംബെ, കൊല്‍ക്കത്ത, ചെന്നൈ, ബംഗളൂരു, ഹൈദരാബാദ് വിമാനത്താവളങ്ങളില്‍ മാത്രമാണ് ഇന്ത്യയില്‍ വളര്‍ത്തു മൃഗങ്ങളെ കൊണ്ടുവരാനുള്ള അനുമതിയുള്ളത്. നിയമവിരുദ്ധമായി കൊണ്ടുവരുന്നത് പിടിക്കപ്പെട്ടാല്‍ പിഴ ലഭിക്കാവുന്ന കുറ്റമാണ്. ഇത് നിലനിൽക്കെയായിരുന്നു യാത്രക്കാരന്റെ ഇത്തരത്തിലൊരു സാഹസം.