മുന്‍ ഹൈക്കോടതി ജഡ്ജിയും വനിതാ കമ്മിഷന്‍ ചെയര്‍പേഴ്‌സണുമായിരുന്ന ജസ്റ്റിസ് ഡി. ശ്രീദേവി അന്തരിച്ചു. 79 വയസായിരുന്നു. പുലര്‍ച്ചേ 2 ന് എറണാകുളം കലൂര്‍ ആസാദ് റോഡിലുള്ള മകന്‍ ബസന്ത് ബാലാജിയുടെ വസതിയിലായിരുന്നു അന്ത്യം.

കരള്‍ സംബന്ധമായ അസുഖത്തെ തുടര്‍ന്ന് രണ്ട്മാസമായി ചികിത്സയിലായിരുന്നു. സംസ്‌കാരം ഇന്ന് വൈകിട്ട് 5ന് എറണാകുളം രവിപുരം ശ്മശാനത്തില്‍ നടക്കും. പ്രമുഖ അഭിഭാഷകനായ യു.ബാലാജിയാണ് ഭര്‍ത്താവ്. മരുമകള്‍:സീമ.

ചിറയിന്‍കീഴില്‍ അദ്ധ്യാപകരായിരുന്ന ദാമോദരന്റെയും ജാനകിയമ്മയുടെയും മകളായ ശ്രീദേവി തിരുവനന്തപുരം എന്‍. എസ്. എസ്. കോളേജിലും കൊല്ലം എസ്. എന്‍. കോളേജിലുമായി പഠിച്ച് സസ്യശാസ്ത്രത്തില്‍ ബിരുദം നേടി. തുടര്‍ന്ന് തിരുവനന്തപുരം ലാ കോളേജില്‍ നിന്ന് ബി. എല്‍. ബിരുദം സമ്ബാദിച്ചു. 1962 ല്‍ തിരുവനന്തപുരത്ത് പ്രാക്ടീസ് ആരംഭിച്ചു.

1997 ജനുവരിയില്‍ ഹൈക്കോടതി ജഡ്ജിയായി. 2001 ഏപ്രിലില്‍ റിട്ടയര്‍ ചെയ്തു. അതിന് ശേഷം രണ്ട് തവണ വനിതാകമ്മിഷന്‍ ചെയര്‍പേഴ്‌സണായി. മികച്ച സാമൂഹിക പ്രവര്‍ത്തകയ്ക്കുള്ള അക്കാമ്മ ചെറിയാന്‍ അവാര്‍ഡും ലഭിച്ചിട്ടുണ്ട്‌.