വൈകിയോടുന്ന ട്രെയിനുകളെ പിടിക്കാന് റെയില്വേ സ്റ്റേഷനുകളില് ആട്ടോമാറ്റിക് സംവിധാനമൊരുക്കുന്നു
സമയം തെറ്റി ഓടുന്ന ട്രെയിനുകളെ പിടിക്കാന് റെയില്വേ സ്റ്റേഷനുകളില് ആട്ടോമാറ്റിക് സംവിധാനമൊരുക്കുന്നു. പരീക്ഷണാടിസ്ഥാനത്തില് രാജ്യത്തെ 17 പ്രധാന സ്റ്റേഷനുകളില് ഈ മാസവും 41 സ്റ്റേഷനുകളില് അടുത്തമാസവും ഇത് നടപ്പാക്കും.
പിന്നീട് ഘട്ടംഘട്ടമായി സ്റ്റേഷനുകളുടെ എണ്ണം കൂട്ടും. ദക്ഷിണ റെയില്വേയില് ചെന്നൈ സെന്ട്രല് സ്റ്റേഷനിലാണിത് ആദ്യം നടപ്പാക്കുന്നത്. സ്റ്റേഷനുകളില് സിഗ്നലിന് സമീപത്തായാണ് ആട്ടോമാറ്റിക് സംവിധാനം സ്ഥാപിക്കുക. ഡാറ്റാ ലോഗര് എന്ന ഇലക്ട്രോണിക്സ് ഡിവൈസാണിത്. ട്രെയിനുകളെ സെന്സര് ഉപയോഗിച്ച് മനസിലാക്കുകയും റണ്ണിംഗ് ഇന്ഫര്മേഷന് സംവിധാനം, സിംഗ്നല് ബ്രേക്ക്, സെന്ട്രല് സെര്വറിലെ കണ്ട്രോള് ഓഫീസ് ആപ്ളിക്കേഷന് എന്നിവയുമായി ഒപ്ടിക്കല് ഫൈബര് ബാക്ക് അപ്പ് നെറ്റ്വര്ക്ക് മുഖേന ബന്ധിപ്പിച്ച് വൈകിയോട്ടം കണ്ടെത്തി റിപ്പോര്ട്ട് നല്കുകയും ചെയ്യും.
ട്രെയിനുകളുടെ സമയവിവരം ആട്ടോമാറ്റിക്കായി സമാഹരിച്ച് മോണിട്ടറിംഗ് സംവിധാനത്തിലേക്ക് അപ്പപ്പോള് അയയ്ക്കും. ഇത് ഫലപ്രദമായി പ്രവര്ത്തിക്കാന് ഒരു ടെര്മിനേറ്റിംഗ് സ്റ്റേഷനിലും അതിന് ചേര്ന്നുള്ള മറ്റൊരു സ്റ്റേഷനിലും സ്ഥാപിക്കും. ഇത് രണ്ടും സംയോജിപ്പിച്ചാണ് പ്രവര്ത്തിക്കുക.ചെന്നൈയില് ഡാറ്റാലോഗര് സ്ഥാപിക്കുന്നതോടെ കേരളത്തില് നിന്നുള്ള ട്രെയിനുകളുള്പ്പെടെ ഇതുവഴി കടന്നുപോകുന്ന എല്ലാ ട്രെയിനുകളിലും നിയന്ത്രണ സംവിധാനം ബാധകമാകും.
നിലവില് ഓരോ സ്റ്റേഷനിലും ട്രെയിന് എത്തുമ്പോള് കണ്ട്രോള് ഓഫീസര് റണ്ണിംഗ് ഇന്ഫര്മേഷന് സംവിധാനത്തില് വന്ന സമയവും പോയ സമയവും നല്കുകയാണ് രീതി. ഇത് പലപ്പോഴും കൃത്യമായിരിക്കില്ല. അവരുടെ സൗകര്യമനുസരിച്ച് ട്രെയിനിന്റെ സമയവുമായി സാമ്യമുള്ള സമയമായിരിക്കും നല്കുക.
ഇതുമൂലം ട്രെയിന് വൈകുന്നത് സെന്ട്രല് ട്രാഫിക് കണ്ട്രോള് സംവിധാനത്തില് അറിയാതിരിക്കുകയും മറ്റ് ട്രെയിനുകളുടെ കാലതാമസത്തിന് ഇടയാക്കുകയും ചെയ്യും.
https://www.facebook.com/Malayalivartha
