ക്ഷേത്രങ്ങള്‍ കേന്ദ്രീകരിച്ചുള്ള മോഷണം വര്‍ദ്ധിക്കുന്നു. കൊല്ലം നീണ്ടകര കണ്ണാട്ടുകുടി ശ്രീമഹാദേവി ക്ഷേത്രത്തില്‍ നിന്നും സ്വര്‍ണാഭരണങ്ങളും പണവും കള്ളന്മാര്‍ മോഷ്ടിച്ചു. കഴിഞ്ഞ ഒരാഴ്ചക്കുള്ളില്‍ കൊല്ലം നഗരത്തിലും സമീപപ്രദേശത്തുമായി ക്ഷേത്രങ്ങളില്‍ നടക്കുന്ന രണ്ടാമത്തെ മോഷണമാണിത്. കണ്ണാട്ടുകുടി ശ്രീമഹാദേവി ക്ഷേത്രത്തിലെ ദേവീവിഗ്രഹത്തില്‍ ചാര്‍ത്തിയിരുന്ന നാലു പവന്‍ സ്വര്‍ണാഭരണങ്ങളാണ് ഇന്നലെ അപഹരിച്ചത്. നിത്യ ചാര്‍ത്തിനുള്ള നെക്ലസ്, മാല, കമ്മല്‍, മൂക്കുത്തി എന്നിവയാണു മോഷണം പോയത്.
കൂടാതെ ഗണപതി കോവിലിന് മുമ്പിലും സേവാ പന്തലിലുമുണ്ടായിരുന്ന കാണിക്കവഞ്ചികള്‍ കുത്തിതുറന്നു പണവും അപഹരിച്ചു. എഴുന്നള്ളത്തിനുള്ള ശീവേലി വിഗ്രഹവും ദേവിയുടെ ഉടവാളും മോഷ്ടാവ് കവര്‍ന്നു. ക്ഷേത്രത്തിലെ മാനേജര്‍ രാവിലെ ക്ഷേത്രത്തില്‍ എത്തിയപ്പോഴാണു മോഷണം നടന്ന വിവരമറിയുന്നത്. ഓഫീസ് കൗണ്ടറിന്റെ വാതില്‍ തകര്‍ത്ത നിലയില്‍ കാണപ്പെട്ടതിനെ തുടര്‍ന്നു നടത്തിയ അന്വേഷണത്തിലാണു മോഷണം നടന്നതായി മനസിലായത്.

തുടര്‍ന്നു ക്ഷേത്രം ഭാരവാഹികളേയും പോലീസിനേയും വിവരമറിയിച്ചു. ക്ഷേത്രപരിസരം സിസി ടിവി കാമറയുടെ നിരീക്ഷണത്തിലായിരുന്നു. മോഷ്ടാവിന്റെ ദൃശ്യങ്ങളും മോഷണരീതികളും കാമറയില്‍ പതിഞ്ഞിട്ടുണ്ട്.

ഇന്നലെ വെളുപ്പിന് ഒരു മണിക്ക് മോഷ്ടാവ് ക്ഷേത്രത്തില്‍ കയറുന്നത് കാമറാ ദൃശ്യങ്ങളിലു പതിഞ്ഞിട്ടുണ്ട്. ആദ്യം ക്ഷേത്രത്തിലെ ശ്രീകോവിലിന്റെ കതക് കമ്പി പാരക്കു തകര്‍ത്തു മോഷ്ടാവ് ഉള്ളില്‍ കയറുന്നതു ദ്യശ്യങ്ങളിലുണ്ട്. മണിക്കുറുകള്‍ക്കു ശേഷമാണു മോഷ്ടാവ് ക്ഷേത്രത്തില്‍ നിന്നു പുറത്തേക്കുവരുന്നത്. കൈലിയും ഷര്‍ട്ടും തലയില്‍ തൊപ്പിയും ധരിച്ചിട്ടുണ്ട്. ഈ ദ്യശ്യങ്ങള്‍ പോലീസ് പരിശോധിച്ചുവരികയാണ്. ഇതിനു മുമ്പും ക്ഷേത്രത്തില്‍ പല തവണ മോഷണം നടന്നിരുന്നു. തുടര്‍ന്നാണ് ക്ഷേത്രത്തില്‍ കാമറകള്‍ സ്ഥാപിച്ചത്.

ദിവസങ്ങള്‍ക്കു മുമ്പാണു രാമന്‍കുളങ്ങര കൊച്ചുനട ക്ഷേത്രത്തില്‍ മോഷണം നടന്നത്. അവിടെയും ശ്രീകോവില്‍ കുത്തിതുറന്നു ദേവീവിഗ്രഹത്തില്‍ ചാര്‍ത്തിയിരുന്ന ഒന്നരപവന്റെ മാലയാണ് അപഹരിച്ചത്. ഇതിന്റെ അന്വേഷണം നടന്നുവരവെയാണ് അടുത്ത മോഷണം നടന്നത്. ഡോഗ് സ്‌ക്വാഡും, വിരലടയാള വിദദ്ധരും ക്ഷേത്രത്തിലെത്തി തെളിവുകള്‍ ശേഖരിച്ചു. ചവറ പോലീസ് അന്വേഷണം ആരംഭിച്ചു.