ഉത്തരവിന്റെ ഭാഷ വായിച്ചാല് മനസ്സിലാവില്ലേ? കേസ് എങ്ങനെ മുന്നോട്ടുപോകും? സിറോ മലബാര് സഭാ ഭൂമിയിടപാടില് സര്ക്കാരിനും പൊലീസിനും വീണ്ടും ഹൈക്കോടതിയുടെ വിമര്ശനം
സിറോ മലബാര് സഭാ ഭൂമിയിടപാട് കേസില് സര്ക്കാരിനും പൊലീസിനും വീണ്ടും ഹൈക്കോടതിയുടെ വിമര്ശനം. കര്ദിനാള് മാര് ജോര്ജ് ആലഞ്ചേരിക്കെതിരെ കേസെടുക്കാന് വൈകിയതിലാണ് വിമര്ശനം. ഉത്തരവിന്റെ ഭാഷ വായിച്ചാല് മനസിലാവില്ലേയെന്ന് കോടതി ചോദിച്ചു. സര്ക്കാരിന്റെ മനോഭാവമാണ് കാണിക്കുന്നത്. വിധിപ്പകര്പ്പ് കിട്ടിയ പിറ്റേന്ന് കേസെടുക്കാമായിരുന്നുവെന്നും കോടതി ചൂണ്ടിക്കാട്ടി. അവധി ദിവസങ്ങളായതിനാലാണ് കേസെടുക്കാത്തതെന്നാണ് സര്ക്കാര് വാദം. അവധി ദിവസമായാല് എന്താണ് പ്രശ്നമെന്നും കോടതി ചോദിച്ചു. ഇങ്ങനെ ആയാല് കേസ് എങ്ങനെ മുന്നോട്ട് പോകുമെന്നും കോടതി ആരാഞ്ഞു.
കര്ദിനാളിനെതിരെ കേസെടുക്കാന് വൈകിയതില് ഹൈക്കോടതി നേരത്തെയും അതൃപ്തി രേഖപ്പെടുത്തിയിരുന്നു. നിയമോപദേശം തേടിയത് ആരുടെ നിര്ദേശപ്രകാരമാണെന്ന് കോടതി ചോദിച്ചിരുന്നു. കോടതിയുടെ ഉത്തരവില് എല്ലാ കാര്യങ്ങളും വ്യക്തമാണ്. ഡയറക്ടര് ജനറല് ഓഫ് പ്രോസിക്യൂഷന് കോടതിയില് ഹാജരാകണം. ഡിജി വിശദീകരിക്കണമെന്നും ഹൈക്കോടതി നിര്ദേശിച്ചിരുന്നു.
നിയമോപദേശം തേടിയത് നടപടികള് വൈകിപ്പിച്ചിരുന്നു. കേസില് പരാതിക്കാരനായ ചേര്ത്തല സ്വദേശി ഷൈജു വര്ഗീസ് നല്കിയ പരാതിയില് കേസെടുക്കാന് വൈകിയതാണ് ഡിജി വിശദീകരിക്കേണ്ടത്.
അതേസമയം ഭൂമി വിവാദത്തില് കര്ദിനാള് മാര് ജോര്ജ് ആലഞ്ചേരിക്ക് പിന്തുണയുമായി ചങ്ങനാശേരി അതിരൂപത രംഗത്തെത്തിയിരുന്നു. ഇപ്പോഴത്തെ സംഭവങ്ങള് സഭയെ ആകെ വേദനിപ്പിക്കുന്നുവെന്ന് മാര് പെരുന്തോട്ടം പറഞ്ഞു. ഇടയനെ അടിച്ച് ആടുകളെ ചിതറിക്കുകയെന്നത് പൈശാചിക തന്ത്രമാണെന്നും അദ്ദേഹം പറഞ്ഞു.സ്നേഹവും ഐക്യവും തകരുവാന് അനുവദിക്കരുത്. ഐക്യത്തിനും സമാധാനത്തിനുമായി വെള്ളിയാഴ്ച ഉപവാസ പ്രാര്ഥനയ്ക്കും ആഹ്വാനം ചെയ്തു. തക്കല ബിഷപ്പ് മാര് ജോര്ജ് രാജേന്ദ്രനും പിന്തുണ പ്രഖ്യാപിച്ചിരുന്നു.
https://www.facebook.com/Malayalivartha
