സുപ്രീംകോടതിയുടെ വിമര്‍ശനത്തെ അവഗണിച്ച് ഭരണപക്ഷവും പ്രതിപക്ഷവും കൈകോര്‍ത്ത് കണ്ണൂര്‍, കരുണ മെഡിക്കല്‍ കോളജുകളിലെ മെഡിക്കല്‍ പ്രവേശനം സുഗമമാക്കുന്നതിനുള്ള നിയമം ഐക്യകണ്‌ഠേന പാസാക്കിയത് സുപ്രീംകോടതി സ്‌റ്റേ ചെയ്തു. പ്രവേശനം നല്‍കിയ 181 വിദ്യാര്‍ത്ഥികളെയും പുറത്താക്കണമെന്നും കോടതി നിര്‍ദ്ദേശിച്ചു. ഇത് സര്‍ക്കാരിന് വലിയ തിരിച്ചടിയായിരിക്കുകയാണ്. സര്‍ക്കാര്‍ നടപടി നിയമവിരുദ്ധമെന്നും കോടതി നിരീക്ഷിച്ചു. കോടതി ഉത്തരവ് നടപ്പാക്കിയില്ലെങ്കില്‍ ഗുരുതരമായ പ്രത്യാഘാതമുണ്ടാകുമെന്നും കോടതിമുന്നറിയിപ്പ് നല്‍കി. നിയമവിരുദ്ധ പ്രവര്‍ത്തനങ്ങളും ചട്ടങ്ങളും സര്‍ക്കാരിന്റെ ഭാഗത്ത് നിന്നുണ്ടായി. ഇത് അംഗീകരിക്കാനാവില്ലെന്നും കോടതി പറഞ്ഞു.

സ്വകാര്യ മെഡിക്കല്‍ കോളജുകളെ സഹായിക്കാനാണ് സര്‍ക്കാര്‍ ബില്ല് കൊണ്ടുവന്നതെന്ന് കോണ്‍ഗ്രസ് എം.എല്‍.എ വി.ടി ബല്‍റാം ആരോപണം ഉന്നയിച്ചെങ്കിലും പ്രതിപക്ഷനേതാവ് രമേശ് ചെന്നിത്തല അത് തള്ളിയിരുന്നു. പ്രവേശനത്തെ അനുകൂലിച്ച് സര്‍ക്കാര്‍ പുറത്തിറക്കിയ ഓര്‍ഡിനന്‍സിന്റെ നിയമ സാധുത സംബന്ധിച്ച കേസ് സുപ്രീം കോടതി ഇന്ന് പരിഗണിക്കാനിരിക്കെയാണ് ഇന്നലെ നിയമസഭ ബില്‍ പാസാക്കിയത്. ചട്ടം ലംഘിച്ച് ഇരു കോളജുകളും 135 വിദ്യാര്‍ഥികള്‍ക്ക് നല്‍കിയ പ്രവേശനം ജയിംസ് കമ്മിറ്റി റദ്ദാക്കിയിരുന്നു. ഇതു ഹൈക്കോടതിയും സുപ്രീം കോടതിയും ശരിവച്ചിരുന്നു. തൊട്ട് പിന്നാലെയാണ് സര്‍ക്കാര്‍ ഓര്‍ഡിനന്‍സ് ഇറക്കിയത്. ഓര്‍ഡിനന്‍സ് ചോദ്യം ചെയ്തു മെഡിക്കല്‍ കൗണ്‍സിലാണ് സുപ്രീം കോടതിയെ സമീപിച്ചത്.