വി.എം സുധീരന് പ്രസിഡന്റ് സ്ഥാനം ഒഴിയുമ്പോള് ഇന്ദിരാഭവനിലെ വെള്ളക്കരവും വൈദ്യുതി ചാര്ജ്ജും പോലും അടയ്ക്കാനാകാതെ കെ.പി.സി.സി കുത്തുപാളയെടുത്തിരുന്നു; എം.എം ഹസന് വന്നതോടെ കോണ്ഗ്രസ് കടക്കെണിയില് നിന്ന് കരകയറി
കുലംകുത്തി സി.പി.എമ്മിന്റെ ഔദ്യോഗിക നിഘണ്ടുവിലെ പദമാണെങ്കിലും അത് അര്ത്ഥമാക്കിയത് വി.എം സുധീരനാണ്. അദ്ദേഹം ആദര്ശ ധീരത വിളമ്പി അധ്യക്ഷനായി വാണ കാലത്ത് കെ.പി.സി.സി മുടിഞ്ഞ് കുത്തുപാളയെടുത്തു. ഇന്ദിരാഭവനിലെ ജീവനക്കാര്ക്ക് ശംമ്പളമില്ല, വെള്ളക്കരവും വൈദ്യുതി ചാര്ജ്ജും കുടിശിഖയായി, പാര്ട്ടി മുഖപത്രമായ വീക്ഷണവും ചാനലായ ജയ്ഹിന്ദും ദുരവസ്ഥയിലായി. ശംമ്പളം പോലുമില്ലാതെ ജീവനക്കാര് നെട്ടോട്ടമോടി. രാജീവ് ഗാന്ധി സ്റ്റഡി സെന്റര് രണ്ട് കോടിയുടെ ജപ്തി നടപടി നേരിട്ടു. അങ്ങനെ സര്വത്ര സാമ്പത്തിക പ്രതിസന്ധിയിലായി. പാര്ട്ടിയെ സഹായിച്ചിരുന്ന ബാര് മുതലാളിമാരുടെ കടയ്ക്കല് ഉമ്മന്ചാണ്ടി കത്തിവയ്ക്കാന് പ്രധാന കാരണം സുധീരന്റെ മദ്യവിരുദ്ധനയമായിരുന്നു.
സുധീരന് പ്രസിഡന്റായിരുന്നപ്പോള് ഇന്ദിരാഭവനിലെ ജീവനക്കാര്ക്കോ സ്ഥിരം എത്തുന്ന പ്രവര്ത്തകര്ക്കോ അവിടേക്ക് വരാന് താല്പര്യമേ ഇല്ലായിരുന്നു. അതിനിടെ സുധീരന് ഒരു യാത്രകൂടി നടത്തിയതോടെ കെ.പി.സി.സിയുടെ ട്രഷറി കാലിയായി. ഹസന് കെ.പി.സി.സി പ്രസിഡന്റായി എത്തിയപ്പോള് ഖജനാവില് അഞ്ചിന്റെ നയാ പൈസയില്ലായിരുന്നു. ഗള്ഫില് ഉള്ള ബന്ധം ഉപയോഗിച്ച് ഹസന് ഫണ്ട് സംഘടിപ്പിച്ചു. അപ്പോഴേക്കും ചെങ്ങന്നൂര് ഉപതെരഞ്ഞെടുപ്പ് എത്തി. പ്രചരണത്തിന് പോയിട്ട് പ്രവര്ത്തകരുടെ വട്ടച്ചെലവിനുള്ള പണം കണ്ടെത്താനാവാത്ത സ്ഥിതി. വീണ്ടും ഹസന് കളത്തിലിറങ്ങി. ഫണ്ട് ശേഖരണം ലക്ഷ്യമിട്ട് ജനമോചന യാത്ര നടത്താന് തീരുമാനിച്ചു. താഴേ തട്ടില് നിന്ന് പാര്ട്ടിയെ പുനരുജ്ജീവിപ്പിക്കുകയും ചെയ്യാം. രണ്ടും ഏതാണ്ട് ലക്ഷ്യത്തിലെത്തിയിരിക്കുകയാണ്. കടക്കെണിയില് നിന്ന് കേരളത്തിലെ കോണ്ഗ്രസ് കരകയറി.
അധികാരം കയ്യിലില്ലാത്തതിനാല് ആരുടെയും മുന്നില് കൈനീട്ടാനൊക്കില്ലെന്ന് അറിയാമായിരുന്നു. അതിനാല് പാര്ട്ടിയെ ശക്തമാക്കുന്ന രീതിയിലുള്ള പ്രായോഗിക സമീപനമാണ് ഹസന് സ്വീകരിച്ചത്. കേരളത്തില് കോണ്ഗ്രസിന് ഇരുപത്തയ്യായിരം ബൂത്ത് കമ്മിറ്റികളാണുള്ളത്. ഓരോ ബൂത്തും അന്പതിനായിരം വീതം ഫണ്ട് സ്വരൂപിക്കണമെന്ന് നിര്ദ്ദേശിച്ചു. അംഗീകരിക്കാത്ത ബൂത്തുകള് പിരിച്ചുവിടുമെന്നും താക്കീത് നല്കി. അതോടെ പ്രവര്ത്തകര് ഉഷാറായി.
ഒരു ബൂത്തിലെ അന്പതിനായിരം രൂപയില് നിന്ന് പതിനയ്യായിരം രൂപ കെ.പി.സി.സിക്കും പതിനയ്യായിരം രൂപ ജില്ലാ കോണ്ഗ്രസ് കമ്മിറ്റികള്ക്കും മണ്ഡലം കമ്മിറ്റികള്ക്ക് പതിനായിരം രൂപയും ബാക്കി പതിനായിരം രൂപ ബൂത്തുകമ്മിറ്റികള്ക്കും നല്കി. കെ.പി.സി.സിക്ക് മൊത്തം മൂന്ന് കോടി 75 ലക്ഷം രൂപ കിട്ടി. ചെങ്ങന്നൂരിലെ തെരഞ്ഞെടുപ്പ് പ്രവര്ത്തനങ്ങള്ക്കും പാര്ട്ടിയുടെ ദൈനംദിന പ്രവര്ത്തനങ്ങള്ക്കും ഇത് ആശ്വാസമായി. എന്നാല് ജനമോചന യാത്രകഴിഞ്ഞ് വരുമ്പോഴേക്കും ഹസനെ കാത്തിരിക്കുന്നത് യു.ഡി.എഫ് കണ്വീനറുടെ കസേരയായിരിക്കുമെന്നറിയുന്നു.
https://www.facebook.com/Malayalivartha
