കേരള പി എസ് സി അംഗവും മുന്‍ എം എല്‍ എ, വി. ശിവന്‍കുട്ടിയുടെ ഭാര്യയുമായ പാര്‍വതി സി.പി.എം. പാര്‍ട്ടി കോണ്‍ഗ്രസ്സില്‍ പങ്കെടുത്തത് വേണ്ട വിധം ചര്‍ച്ച ചെയ്യപ്പെടാതെ പോകുന്നത് ദൗര്‍ഭാഗ്യകരമാണെന്ന് കെ.പി.സി.സി സെക്രട്ടറി ജ്യോതികുമാര്‍ ചാമക്കാല. ഇതിനെതിരെ നിയമനടപടി സ്വീകരിക്കുമെന്നും അദ്ദേഹം മുന്നറിയിപ്പ് നല്‍കി. മുഖ്യമന്ത്രി നടപടിയെടുക്കണമെന്നും അദ്ദേഹം ആവശ്യപ്പെട്ടു.

ഒരു പക്ഷെ കേരള ചരിത്രത്തിലാദ്യമാണ് ഒരു പി.എസ്.സി അംഗം ഏതെങ്കിലുമൊരു രാഷ്ടീയ പാര്‍ട്ടിയുടെ വേദിയില്‍ പ്രത്യക്ഷപ്പെടുന്നത്. അത് തന്നെ ഒരു ആഘോഷമാക്കാനാണ് മുന്‍ എം.എല്‍.എ ശ്രമിച്ചതെന്ന് ഫോട്ടോ കണ്ടാല്‍ ബോധ്യമാകും (പുള്ളിക്കാരിക്കിട്ട് പണി കൊടുത്തതാണെന്ന് സംശയിക്കുന്നവരും ഇല്ലാതില്ല)

ഭരണഘടനാ സ്ഥാപനമായ പി.എസ്.സി യുടെ ഒരംഗം ഇത്തരത്തില്‍ പാര്‍ട്ടി വേദിയില്‍ നിലവിലെ നിയമങ്ങളെ ധിക്കരിച്ച് അഹങ്കാരത്തോടെ പങ്കെടുക്കുമ്പോള്‍ ആ യോഗത്തില്‍ സംസ്ഥാനത്തെ മുഖ്യമന്ത്രിയും ഒപ്പമുണ്ടായിരുന്നു എന്നത് ഇതിന്റെ ഗൗരവം ഇരട്ടിയാക്കുന്നു.
പി.എശ്.സി മെമ്പറന്മാരായിരുന്നവരെ നിലവിലെ നിയമമനുസരിച്ച് മറ്റൊരു പദവിയിലേക്കും പിന്നീട് നാമനിര്‍ദ്ദേശം ചെയ്യാന്‍ പാടില്ല. അതുകൊണ്ട് ഉദ്ദേശിക്കുന്നത്, ഈ പദവിയിലിരിക്കുന്നവര്‍ പദവി ദുരുപയോഗം ചെയ്യാനുള്ള അവസരം ഇല്ലാതാക്കുക എന്നുകൂടിയാണ്.

പി.എസ്.സി അംഗങ്ങള്‍ ഇന്റര്‍വ്യൂ നടത്തി നിയമനം ലഭിക്കുന്ന സര്‍ക്കാര്‍ അദ്ധ്യാപകരും ജീവനക്കാരും ഒരു രാഷ്ട്രീയ പാര്‍ട്ടിയിലും അംഗങ്ങളാകാന്‍ പാടില്ല. പക്ഷെ ഇവിടെ വേലി തന്നെ വിളവുതിന്നുന്നു. ഇനി ഈ പദവി മടുത്ത് രാഷ്ട്രീയരംഗത്ത് മടങ്ങിയെത്തി മറ്റു പാര്‍ട്ടി സ്ഥാനങ്ങള്‍ നേടാന്‍ നേതാക്കളുടെ അനുകമ്പ പിടിച്ചുപറ്റാനുള്ള 'സ്ഥാനത്യാഗത്തിനാണ് ' ഈ നാടകമെങ്കില്‍ അത് തുറന്നു പറഞ്ഞാല്‍ മതിയല്ലോ! ജടഇ പോലുള്ള സ്ഥാപനത്തിന്റെ വിശ്വാസ്യത തകര്‍ക്കുന്ന നടപടിയെന്തിന്?

മറ്റൊരു ചോദ്യം. വരാനിരിക്കുന്ന കെ.പി.സി.സി.യോഗത്തില്‍ മനുഷ്യാവകാശ കമ്മീഷന്‍ അംഗമായ അഡ്വ: കെ. മോഹന്‍കുമാര്‍ പങ്കെടുത്താല്‍ സര്‍ക്കാരിനെന്തു ചെയ്യാനാവും ? (അദ്ദേഹത്തേയും സഖാവ് പാര്‍വ്വതിയെയും താരതമ്യം ചെയ്യാനുള്ള മൗഢ്യമൊന്നും എനിക്കില്ല. മാത്രമല്ല ഇരിക്കുന്ന പദവിയോട് സത്യസന്ധത കാണിക്കുന്ന കാര്യത്തില്‍ മോഹന്‍കുമാറിനെ ചെറുതായി കാണാനും ഞാന്‍ ആളല്ല.)

കൂടുതലൊന്നും പറയാനില്ല. അറിയാത്ത പിള്ള ചൊറിയുമ്പോള്‍ അറിയും.... നിലവിലെ നിയമമനുസരിച്ച് പി.എസ്.സി അംഗങ്ങളെ പുറത്താക്കാന്‍ നിരവധി കടമ്പകള്‍ കടക്കേണ്ടതുണ്ട്. ഭരണഘടനയുടെ അൃശേരഹല 317 അനുസരിച്ച് നടപടി ക്രമങ്ങള്‍ നിരവധിയാണ്. പല കോടതിവിധികളും ഇതിനു പിന്തുണയായുണ്ട്. ഈ നിയമങ്ങള്‍ക്കുള്ളില്‍ നിന്നു കൊണ്ട് ഇത്തരത്തില്‍ രാഷ്ട്രീയ പ്രവര്‍ത്തനത്തില്‍ ഏര്‍പ്പെട്ട ജടഇ അംഗത്തിനെതിരെ നടപടികളുമായി മുന്നോട്ട് പോവുക തന്നെ ചെയ്യും.

അടിയന്തിരമായി മുഖ്യമന്ത്രി ഈ വിഷയത്തില്‍ ഇടപെട്ട് ഇവരോട് പി.എസ്.സി അംഗത്വം ഒഴിയാന്‍ ആവശ്യപ്പെടണം. ഇല്ലെങ്കില്‍ അദ്ദേഹത്തിന്റെ പിന്‍ബലത്തോടെയാണ് ഈ നടപടിയെന്ന് പൊതുസമൂഹം വിലയിരുത്തും.നിയമസഭയിലെ സ്പീക്കറുടെ ഡയസ് തകര്‍ത്ത കേസ്സ് പിന്‍വലിച്ച് രക്ഷപ്പെടാമെങ്കില്‍ ഇതെത്ര നിസ്സാരം എന്ന് തോന്നിയേക്കാം മുന്‍ എം.എല്‍.എ ക്കും കുടുംബത്തിനും. പക്ഷെ ഒന്നേ പറയാനുള്ളൂ; ചെവിയില്‍ നുള്ളിക്കോളൂ...