ചെന്നിത്തലയുടെ മകന് സിവില് സര്വീസ് റാങ്ക് കിട്ടിയതോടെ രാഷ്ട്രീയ ഭേദമന്യേ എല്ലായിടത്തു നിന്നും അഭിനന്ദന പ്രവാഹങ്ങള്
രാഷ്ട്രീയ നേതാവായ ചെന്നിത്തലയുടെ പ്രിയപുത്രന് സിവില് സര്വ്വീസ് ഉദ്യോഗസ്ഥനായി ഉടന് കേരളത്തിലെത്തും. അച്ഛന് പ്രതിപക്ഷനേതാവായി വിലസുമ്പോള് മകന് എത്തുന്നതാകട്ടെ പോലീസുദ്യോഗസ്ഥനായും. അങ്ങനെ സ്വാഭാവികമായും അച്ഛനെ സല്യൂട്ടടിക്കേണ്ടിവരും. മകന് സിവില് സര്വ്വീസില് റാങ്ക് കിട്ടിയതോടെ പ്രതിപക്ഷ നേതാവ് ചെന്നിത്തലയുടെ വീട്ടിലേക്ക് അഭിനന്ദന പ്രവാഹമെത്തുന്നത് ഇങ്ങനെയാണ്.
രമിത്തിന്റെ കുട്ടിക്കാലം മുതലുള്ള സ്വപ്നമായിരുന്നു സിവില് സര്വീസ്. അവനതു നേടിയെടുത്തതില് അഭിമാനമുണ്ട്. പ്രതിപക്ഷ നേതാവ് രമേശ് ചെന്നിത്തല ഏറെ സന്തോഷത്തിലാണ്. മകന് രമിത് ചെന്നിത്തല സിവില് സര്വീസ് പരീക്ഷയില് 210ാം റാങ്കോടെയാണ് പാസായത്. ഏറെ തിരക്കുള്ള പൊതു പ്രവര്ത്തകനു മക്കളുടെ പഠന കാര്യത്തില് ശ്രദ്ധിക്കാന് കഴിയില്ല എന്നത് ഉറപ്പാണ്. ഭാര്യ അനിതയാണ് രമിത്തിന്റെയും സഹോദരന് രോഹിത്തിന്റേും പഠന കാര്യങ്ങള് നോക്കിയിരുന്നത്.
ഡല്ഹി സെന്റ്പോള്സ് സ്കൂളിലാണ് രമിത് പഠിച്ചത്. നാലാഞ്ചിറ മാര് ബസേലിയോസ് എന്ജിനീയറിംഗ് കോളേജില് നിന്ന് കംപ്യൂട്ടര് സയന്സില് ബിടെക് നേടി. സ്കൂളില് പഠിക്കുന്ന കാലം മുതലേ രമിത്ത് സിവില് സര്വീസ് നേടണമെന്ന ലക്ഷ്യത്തിലായിരുന്നു. ബിടെക് പൂര്ത്തിയാക്കിയ ശേഷം ഇന്ഫോസിസ് സണ്ടെക് തുടങ്ങിയ അനേകം മികച്ച സ്ഥാപനങ്ങളില് ജോലി ലഭിച്ചെങ്കിലും സിവില് സര്വ്വീസ് പരിശീലനം തിരഞ്ഞെടുക്കുകയായിരുന്നു. തിരുവനന്തപുരത്തായിരുന്നു പരിശീലനം.
സ്കൂള് പഠനകാലം ഡല്ഹിയിലായിരുന്നതില് ഹിന്ദി നന്നായി വഴങ്ങും . അതു കൊണ്ട് ഹിന്ദിയാണ് രമിത്ത് പരീക്ഷയ്ക്കു തിരഞ്ഞെടുത്തത്. പബ്ലിക് അഡ്മിനിസ്ട്രേഷനായിരുന്നു മുഖ്യവിഷയം. മൂന്നാമത്തെ ശ്രമത്തിലാണു രമിത് റാങ്ക് പട്ടികയില് എത്തുന്നത്. റാങ്ക് അനുസരിച്ച് ഐപിഎസ് കിട്ടാനാണു സാധ്യത. ഇത്തവണ ഏതു വിഭാഗത്തില് ജോലി ലഭിച്ചാലും പ്രവേശിക്കാനാണു തീരുമാനം. ജോലിക്കൊപ്പം പരിശീലനവും തുടരും. അടുത്ത തവണ ആദ്യ പത്ത് റാങ്കിലെത്തണം എന്നതാണു രമിത്തിന്റെ ലക്ഷ്യം.
https://www.facebook.com/Malayalivartha
