പി.എസ്.സി അംഗം ആര്‍.പാര്‍വതി ദേവി സി.പി.എം പാര്‍ട്ടി കോണ്‍ഗ്രസില്‍ പങ്കെടുത്തത് ഏറെ വിവാദമായിരുന്നു. സി.പി.ഐ.എം. പാര്‍ട്ടി കോണ്‍ഗ്രസില്‍ പങ്കെടുത്ത സംഭവത്തില്‍ പാര്‍വതി ദേവിയെ പിഎസ്‌സിയില്‍ നിന്നും പുറത്താക്കാന്‍ ബിജെപി നേതാക്കള്‍ ഗവര്‍ണര്‍ പി സദാശിവത്തെ ഇന്ന് കാണും. അതേസമയം പാര്‍വതിയെ പാര്‍ട്ടി കോണ്‍ഗ്രസില്‍ പങ്കെടുപ്പിച്ച മുന്‍ എംഎല്‍എയും ഭര്‍ത്താവുമായ വി. ശിവന്‍കുട്ടി വെട്ടിലായിരിക്കുകയാണ്. അതേസമയം പാര്‍ട്ടി കോണ്‍ഗ്രസിന്റെ പേരില്‍ പാര്‍വതിയെ ബലികൊടുക്കില്ലെന്നുറച്ചാണ് പാര്‍ട്ടി.

ഭരണഘടനാ സ്ഥാപനമായ പി.എസ്.സിയില്‍ അംഗമായിരിക്കേ രാഷ്ട്രീയപാര്‍ട്ടി യോഗത്തില്‍ പങ്കെടുത്ത നടപടി നിയമവിരുദ്ധമാണെന്നു കാണിച്ച് കെ.പി.സി.സി സെക്രട്ടറി ജ്യോതികുമാര്‍ ചാമക്കാല രാഷ്ട്രപതിക്ക് നേരത്തെ പരാതി നല്‍കിയിരുന്നു. സുപ്രീംകോടതി മാര്‍ഗനിര്‍ദേശങ്ങളുടെ അടിസ്ഥാനത്തില്‍ പാര്‍വതി ദേവിയെ പുറത്താക്കണമെന്നാണ് ആവശ്യം.

ഈ മാസം 18 മുതല്‍ 22 വരെ ഹൈദരാബാദില്‍ നടന്ന സി.പി.എം പാര്‍ട്ടി കോണ്‍ഗ്രസില്‍ ആര്‍.പാര്‍വതി ദേവി പങ്കെടുത്തിരുന്നു. ഭര്‍ത്താവും മുന്‍ എം.എല്‍.എയുമായ വി.ശിവന്‍കുട്ടിക്കൊപ്പം പാര്‍വതി ദേവി സമ്മേളനത്തില്‍ പങ്കെടുക്കുന്നതിന്റെ ദൃശ്യങ്ങളും ചിത്രങ്ങളും മാധ്യമങ്ങളിലും വന്നു. ഇത് തെളിവായി ചൂണ്ടിക്കാണിച്ചാണ് രാഷ്ട്രപതിക്ക് ജ്യോതികുമാര്‍ ചാമക്കാല പരാതി നല്‍കിയത്. ഭരണഘടനാസ്ഥാപനമായ പി.എസ്.സിക്ക് ചേരാത്ത പെരുമാറ്റമാണ് പാര്‍വതി ദേവിയുടെ ഭാഗത്തുനിന്നുണ്ടായത്.

ഈ സാഹചര്യത്തില്‍ ഭരണഘടനയുടെ ആര്‍ട്ടിക്കിള്‍ 317 ഒന്നില്‍ പറയുന്ന നടപടിക്രമങ്ങള്‍ പ്രകാരം പാര്‍വതി ദേവിയെ പി.എസ്.സി അംഗത്വത്തില്‍ നിന്ന് നീക്കണമെന്നും പരാതിയില്‍ പറയുന്നു. പരാതി നിയമാനുസൃതം സുപ്രീംകോടതിയുടെ പരിഗണനയ്ക്ക് അയക്കണം. ഇക്കാര്യത്തില്‍ സുപ്രീംകോടതി തീരുമാനമെടുക്കുംവരെ പാര്‍വതി ദേവിയെ സസ്‌പെന്‍ഡ് ചെയ്യണമെന്നും പരാതിയിലുണ്ട്.

പാര്‍വതി ദേവി സമ്മേളനത്തില്‍ പങ്കെടുക്കുന്നതിന്റെ ദൃശ്യങ്ങള്‍ സഹിതമാണ് പരാതി നല്‍കിയത്. നേരത്തെ ഇതേ കാര്യം ചൂണ്ടിക്കാട്ടി പാര്‍വതി ദേവിക്കെതിരെ യൂത്ത് കോണ്‍ഗ്രസ് സംസ്ഥാന അധ്യക്ഷന്‍ ഡീന്‍ കുര്യാക്കോസ് ഗവര്‍ണര്‍ക്ക് പരാതി നല്‍കിയിരുന്നു. കഴിഞ്ഞ ജൂലൈ 23നായിരുന്നു പി.ഗോവിന്ദപ്പിള്ളയുടെ മകള്‍കൂടിയായ പാര്‍വതി ദേവിയെ പി.എസ്.സി അംഗമായി നിയമിച്ചത്.