എറണാകുളം പുത്തന്‍കുരിശ് സ്വദേശിയായ ശിഖ സുരേന്ദ്രന് സിവില്‍ സര്‍വീസ് പരീക്ഷയില്‍ കേരളത്തില്‍ ഏറ്റവും കൂടുതല്‍ മാര്‍ക്ക് ലഭിച്ചതിന്റെ സന്തോഷത്തിലാണ് വീട്ടുകാരും നാട്ടുകാരുമെല്ലാം. വീട്ടുകാര്‍ നല്‍കിയ പ്രോത്സാഹനമാണ് തന്‍ന്റെ വിജയത്തിന് പ്രധാന കാരണമായതെന്ന് ശിഖ പറഞ്ഞു.

പുത്തന്‍കുരിശ് ചൂണ്ടിയിലെ സാധാരണ കുടുംബത്തിലെ അംഗമാണ് ശിഖ സുരേന്ദ്രന്‍. സ്വകാര്യ കമ്പനിയില്‍ അക്കൗണ്ടന്റായിരുന്ന സുരേന്ദ്രന്‍ രോഗം മൂലം ഇപ്പോള്‍ ജോലിക്ക് പോകുന്നില്ല. അമ്മ സിലോ സ്വകാര്യ കമ്ബനിയിലെ ജീവനക്കാരിയാണ്. പഠനത്തില്‍ ചെറുപ്പം മുതലേ മികവ് പുലര്‍ത്തിയിരുന്ന ശിഖ 97 ശതമാനം മാര്‍ക്ക് വാങ്ങിയാണ് പ്ലസ് ടു പാസ്സായത്. പിന്നീട് 89 ശതമാനം മാര്‍ക്ക് കരസ്ഥമാക്കി എന്‍ജീനീയറിംഗും പാസ്സായി. 2015 മുതല്‍ സിവില്‍ സര്‍വ്വീസ് കോച്ചിംഗ് തുടങ്ങി.

ദില്ലിയിലായിരുന്നു പഠനം. 2016 ല്‍ ആദ്യത്തെ തവണ പരീക്ഷ എഴുതിയെങ്കിലും പരാജയപ്പെട്ടു. പിന്‍വാങ്ങാതെ വാശിയോടെ പഠിച്ചാണ് ഇത്തവണ തിളങ്ങുന്ന വിജയം നേടിയത്. ശിഖയുടെ നേട്ടമറിഞ്ഞ് നാട്ടുകാരും അധ്യാപകരുമെല്ലാം അഭിനന്ദനങ്ങളുമായി എത്തിക്കൊണ്ടിരിക്കുകയാണ്.