ബിഡിജെഎസിന്റെ നിര്‍ണ്ണായക യോഗം നാളെ നടക്കാനിരിക്കെ. മുന്നണി വിടുന്നതടക്കമുള്ള തീരുമാനത്തിലേക്ക് ബിഡിജെഎസ്സ് കടക്കുമോ എന്ന് ബിജെപി യിലെ ഒരു വിഭാഗം നേതാക്കള്‍ക്ക് ആശങ്ക.എന്‍ഡിഎ ബന്ധം ഉപേക്ഷിക്കുന്ന കാര്യത്തില്‍ ബിഡിജെഎസ്സില്‍ അഭിപ്രായഭിന്നത രൂക്ഷം. നേരത്തെ സ്ഥാനമാനങ്ങളെയും കേന്ദ്രപൊതുമേഖലാ സ്ഥാപനങ്ങളിലെ പദവികളെയും ചൊല്ലി ബിഡിജെഎസ്സ് എന്‍ഡിഎ മുന്നണിയില്‍ നിസ്സഹകരണം പ്രഖ്യാപിച്ചിരുന്നു. എന്നാല്‍ മറ്റ് ഘടകകക്ഷികളെ ഒപ്പം നിര്‍ത്തുന്നതിന് ഒരു പരിധിവരെ ബിജെപി ക്ക് സാധിക്കുകയും ചെയ്തു. ബിഡിജെഎസ് അധ്യക്ഷന്‍ തുഷാര്‍ വെള്ളാപ്പള്ളിയോട് അടുപ്പമുള്ള ജെഎസ്സ്എസ്സ്(രാജന്‍ ബാബു) നേതാവ് മുന്‍ എംഎല്‍എ രാജന്‍ ബാബുവും ജെആര്‍എസ് നേതാവ് സികെ ജാനുവും മുന്നണി വിട്ട് പോകുന്നത് പോലുള്ള തീരുമാനം ബിഡിജെഎസ്സിന്റെ ഭാഗത്ത് നിന്നുണ്ടാകില്ലെന്ന പ്രതീക്ഷയിലാണ്.

എന്നാല്‍ ബിഡിജെഎസ്സിലാകട്ടെ ബിജെപി ബന്ധം ഉപേക്ഷിക്കുന്നതിനെ എതിര്‍ക്കുന്ന നേതാക്കളുമുണ്ട്. എന്‍ഡിഎ ഘടക കക്ഷികളായ പിസി തോമസ് നേതൃത്വം നല്‍കുന്ന കേരളാ കോണ്‍ഗ്രസ്സും പ്രജാ സോഷ്യലിസ്റ്റ് പാര്‍ട്ടിയും ലോക്ജനശക്തി പാര്‍ട്ടിയും ചെങ്ങന്നൂരില്‍ തെരഞ്ഞെടുപ്പ് പ്രവര്‍ത്തനത്തില്‍ സജീവമായി രംഗത്തിറങ്ങാനും തീരുമാനിച്ച് കഴിഞ്ഞു. എന്‍ഡിഎ നിയോജക മണ്ഡലാടിസ്ഥാനത്തില്‍ നടത്തിയ രാപ്പകല്‍ സമരത്തില്‍ ഈ പാര്‍ട്ടികള്‍ പങ്കെടുക്കുകയും ചെയ്തു. 

വരാപ്പുഴയിലെ കസ്റ്റഡി മരണത്തില്‍ ബിജെപി നടത്തിയ പ്രക്ഷോഭത്തില്‍ എന്‍ഡിഎ കേന്ദ്രസമിതി അംഗമായ കേരളാ കോണ്‍ഗ്രസ്സ് നേതാവ് പിസി തോമസ് പങ്കെടുക്കുകയും ചെയ്തു. പാര്‍ലമെന്റ് സ്തംഭനത്തിനെതിരെ ബിജെപി എംപി മാരായ വി മുരളീധരനും സുരേഷ് ഗോപിയും തിരുവനന്തപുരത്ത് നടത്തിയ ഉപവാസത്തില്‍ പിഎസ്പി ചെയര്‍മാന്‍ കെകെ പൊന്നപ്പന്‍ പങ്കെടുത്തു.ആ പരിപാടിയില്‍ പങ്കെടുത്ത ഒരേയോരു ഘടകകക്ഷി നേതാവാണ് കെകെ പൊന്നപ്പന്‍. ഇങ്ങനെ ബിഡിജെഎസ്സ് ഭീഷണിഉയര്‍ത്തുമ്പോഴും മറ്റ് ചെറു പാര്‍ട്ടികളെ മുന്നണിയുടെ ഭാഗമായി നിര്‍ത്താനാണ് ബിജെപി ശ്രമിക്കുന്നത്. ബിഡിജെഎസ്സിന്റെ ആവശ്യങ്ങളില്‍ തീരുമാനമെടുക്കേണ്ടത് കേന്ദ്ര നേതൃത്വമാണെന്ന നിലപാടിലാണ് സംസ്ഥാന ബിജെപി നേതൃത്വം.അതേസമയം മുന്നണിയെ തകര്‍ക്കുന്ന നടപടികള്‍ പ്രോത്സാഹിപ്പിക്കേണ്ടെന്ന നിലപാടിലാണ് പ്രജാ സോഷ്യലിസ്റ്റ് പാര്‍ട്ടിയും എല്‍ജെപി യും കേരളാകോണ്‍ഗ്രസ്സുമടക്കമുള്ള എന്‍ഡിഎ ഘടക കക്ഷികള്‍.