കെ.എസ്.ആര്‍.ടി.സിയില്‍ കളക്ഷന്‍ വഴി കിട്ടിയ നോട്ടുകളുടെ കൂട്ടത്തില്‍ കള്ളനോട്ടുകളും. തമ്പാനൂരില്‍ വെള്ളിയാഴ്ചച മാത്രം കളക്ഷനില്‍ ലഭിച്ചത് പുതിയ 200 രൂപയുടെ 26 വ്യാജനോട്ടുകള്‍. ഇതു സംബന്ധിച്ച് ഡിപ്പോ അധികൃതര്‍ തമ്പാനൂര്‍ പൊലീസില്‍ പരാതി നല്‍കി.

അടുത്തടുത്ത നമ്പരുകളിലുള്ള നോട്ടുകളാണ് കണ്ടെത്തിയിട്ടുള്ളത്. മാത്രമല്ല, ഒരേ നോട്ടിന്റെ നമ്പര്‍ തന്നെ ആവര്‍ത്തിച്ചിട്ടുമുണ്ട്. അതേ സമയം കളക്ഷന്‍ വഴിയല്ലാതെ മറ്റേതെങ്കിലും മാര്‍ഗത്തിലാണോ നോട്ട് എത്തിയിട്ടുള്ളത് എന്നും സംശയിക്കുന്നുണ്ട്. ഇക്കാര്യം വിശദമായി അന്വേഷിക്കുമെന്ന് പൊലീസ് പറഞ്ഞു. വ്യക്തതയ്ക്കായി കണ്ടക്ടറെ ചോദ്യം ചെയ്യും. പത്ത് രൂപ മുതല്‍ 200 രൂപയുടെ വരെ പുതിയ നോട്ടുകളാണ് സമീപകാലത്ത് വിനിമയത്തിലെത്തിത്. അതുകൊണ്ട് തന്നെ പുതിയ നോട്ടുകളുടെ കാര്യത്തില്‍ യാത്രക്കാര്‍ക്കെന്ന പോലെ ജീവനക്കാര്‍ക്കും പരിചയക്കുറവുണ്ട്.

തിരക്കുള്ള ബസുകളില്‍ വിശദമായ നോട്ടുപരിശോധനയും നടക്കില്ല. ഈ സാഹചര്യങ്ങള്‍ മുതലാക്കി കള്ളനോട്ടുകള്‍ നല്‍കി കെ.എസ്.ആര്‍.ടി.സിയെ കബളിപ്പിച്ചിരിക്കാമെന്നതാണ് ഒരു നിഗമനം. എല്ലാ ഡിപ്പോകളിലും കളക്ഷന്‍ സ്വീകരിക്കുന്നതിന് നോട്ടെണ്ണല്‍ യന്ത്രമുണ്ട്. ഇതിലൂടെയല്ലാതെ നോട്ട് എണ്ണിയിട്ടുണ്ടോ എന്നും പരിശോധിക്കുന്നുണ്ട്. 

എന്തായാലും പുതിയ നോട്ടുകള്‍ സ്വീകരിക്കുന്നതില്‍ സൂക്ഷ്മത പുലര്‍ത്തണമെന്ന് കെ.എസ്.ആര്‍.ടി.സി കണ്ടക്ടര്‍മാര്‍ക്ക് നിര്‍ദേശം നല്‍കിയിട്ടുണ്ട്.