ആണുങ്ങളുടെ കുളിക്കടവില്‍ മുന്‍ എം.എല്‍.എ ശോഭനാ ജോര്‍ജ്ജിന് എന്ത് കാര്യം? കാര്യമായ കാര്യമുണ്ട്. സെറ്റും മുണ്ടും ഉടുത്ത് , കണ്ണെഴിതി പൊട്ടുതൊട്ടാണ് കുളിക്കടവിലെത്തിയത്. അവിടെയതാ ഒരു ചെറുപ്പക്കാരന്‍ മുങ്ങാങ്കുഴിയിടുന്നു... അയാള്‍ പൊങ്ങിവന്നതും മുന്‍ എം.എല്‍.എ നില്‍്ക്കുന്നു. ആദ്യം ഒന്ന് പകച്ചു. എന്തരാണ് സംഭവമെന്ന് ഒരുപിടീമില്ല. പെണ്ണുങ്ങടെ കുളിക്കടവില്‍ ഏതെങ്കിലും പുരുഷന്‍മാര് ചെന്നിരുന്നെങ്കില്‍ സംഗതി പുലിവാലായേനെ. ഇതിപ്പോ അങ്ങനെയൊരു വിവാദത്തിന് സ്‌കോപ്പില്ലതാനും. വായില്‍ കിടന്ന ഒരു കവിള്‍ വെള്ളം തുപ്പി എന്താണെന്ന് യുവാവ് ചോദിച്ചു. നമ്മുടെ സജി ചെറിയാനൊരു വോട്ട് തരണേ... എന്നായി ശോഭനാ ജോര്‍ജ്ജ്. യുവാവിന് ആശ്വാസമായി. വോട്ട് തേടി വന്നതാണ്. 

കടവിലെ കല്ലില്‍ കയറി നിന്ന ശോഭനാ ജോര്‍ജ്ജ് കൈക്കുമ്പിളില്‍ വെള്ളം കോരിയെടുത്ത് യുവാവിന് നേരെ എറിഞ്ഞിട്ട് വോട്ട് തരണേ എന്ന് വീണ്ടും ചോദിച്ചു. താരാമെന്ന് യുവാവ് തലയാട്ടി. കോണ്‍ഗ്രസ് പാളയത്തില്‍ നിന്ന് ഇടത് പാളയത്തിലെത്തിയ ശോഭനാ ജോര്‍ജ്ജ് ഇത്തരത്തിലുള്ള വ്യത്യസ്തമായ രീതികളിലാണ് സി.പി.എം സ്ഥാനാര്‍ത്ഥി സജി ചെറിയാന് വേണ്ടി വോട്ട് തേടുന്നത്. ചെങ്ങന്നൂരിലെ എം.എല്‍.എ ആയിരുന്നതിനാല്‍ മണ്ഡലത്തിലെ ഓരോ സ്പന്ദനവും ശോഭനാ ജോര്‍ജ്ജിനറിയാം. അതുകൊണ്ട് കുറേ എല്‍.ഡി.എഫ് പ്രവര്‍ത്തകരെയും ഒപ്പം കൂട്ടിയിട്ടുണ്ട്. കുളിക്കടവും ചായക്കടകളും കവലകളും വീടുകളും നാടിന്റെ മുക്കും മൂലയും അരിച്ച് പെറുക്കി വോട്ട് തേടുകയാണ് ശോഭനാ ജോര്‍ജ്ജ്.

വ്യാജരേഖാ കേസിനെ തുടര്‍ന്ന് കോണ്‍ഗ്രസുമായി അകന്ന ശോഭനാ ജോര്‍ജ്ജ് പിന്നീട് കരുണാകരന്റെ ഡി.ഐ.സിക്കൊപ്പം ചേര്‍ന്നു. അന്ന് ഡി.ഐ.സി എല്‍.ഡി.എഫിനൊപ്പമായിരുന്നു. പിന്നീട് കരുണാകരന്‍ കോണ്‍ഗ്രസിലേക്ക് മടങ്ങി. ആ സമയം മാപ്പ് എഴുതി കൊടുത്ത ശേഷമാണ് ശോഭനാ ജോര്‍ജ്ജിന് കോണ്‍ഗ്രസ് മെമ്പര്‍ഷിപ്പ് നല്‍കിയത്. എന്നാല്‍ ബാല്യകാല സുഹൃത്തായ രമേശ് ചെന്നിത്തല ഉള്‍പ്പെടെ തഴഞ്ഞതോടെ ശോഭനാ ജോര്‍ജ്ജ് കോണ്‍ഗ്രസുമായി അകന്നു. കഴിഞ്ഞ നിയമസഭാ തെരഞ്ഞെടുപ്പില്‍ കോണ്‍ഗ്രസ് സ്ഥാനാര്‍ത്ഥി പി.സി വിഷ്ണുനാഥിനെതിരെ മല്‍സരിച്ചു. ജയിച്ചില്ലെങ്കിലും വിഷ്ണുനാഥിനെ തോല്‍പ്പിക്കുക എന്ന ലക്ഷ്യം കൈവരിച്ചു. 

ചെങ്ങന്നൂര്‍ ഉപതെരഞ്ഞെടുപ്പ് അടുത്തതോടെ സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ ഉള്‍പ്പെടെ ശോഭനയെ കണ്ട് ചര്‍ച്ച നടത്തി. അങ്ങനെയാണ് ഇടത് മുന്നണിക്ക് വേണ്ടി ശോഭനാ ജോര്‍ജ്ജ് തെരഞ്ഞെടുപ്പ് പ്രചരണത്തിനിറങ്ങിയത്. അടുത്തവര്‍ഷം നടക്കുന്ന പാര്‍ലമെന്റ് തെരഞ്ഞെടുപ്പില്‍ പത്തനംതിട്ട മണ്ഡലത്തില്‍ നിന്ന് ശോഭനയെ മല്‍സരിപ്പിക്കാമെന്ന് സി.പി.എം ഉറപ്പ് നല്‍കിയിട്ടുണ്ടെന്നാണ് അറിയുന്നത്. ക്രിസ്ത്യന്‍ ഭൂരിപക്ഷമേഖലയായ പത്തനംതിട്ടയില്‍ ശോഭനയ്ക്ക് നിര്‍ണായക സ്വാധീനവും ഉണ്ട്.