നഴ്‌സുമാരുടെ പുതുക്കിയ ശമ്പള പരിഷ്‌കരണം സ്‌റ്റേ ചെയ്യണമെന്ന് ആവശ്യപ്പെട്ട് മാനേജ്‌മെന്റുകള്‍ നല്‍കിയ ഹര്‍ജിയില്‍ വാദം പുരോഗമിക്കവേ ശമ്പള പരിഷ്‌ക്കരണം വൈകിപ്പി്ക്കാന്‍ സ്വകാര്യ ആശുപത്രികളുടെ ശ്രമം. സര്‍ക്കാര്‍ പുറത്തിറക്കിയ ഉത്തരവ് പ്രകാരം ആശുപത്രികള്‍ നഴ്‌സുമാര്‍ക്ക് ശമ്പളം വര്‍ദ്ധിപ്പിക്കേണ്ട സമയായെങ്കിലും സര്‍ക്കാര്‍ തീരുമാനം നടപ്പിലാക്കുന്നില്ലെന്ന് കാണിച്ച് ലേബര്‍ ഓഫീസര്‍മാര്‍ക്ക് നഴ്‌സുമാര്‍ പരാതി നല്‍കിയാല്‍ അതില്‍ ഉടനടി നടപടി എടുക്കേണ്ടെന്ന നിര്‍ദ്ദേശമാണ് തൊഴില്‍ വകുപ്പ് നല്‍കിയിരിക്കുന്നത്. ഇത് ആശുപത്രി മുതലാളിമാരുടെ താല്‍പ്പര്യം സംരക്ഷിക്കുന്നതിന് വേണ്ടിയാണെന്ന ആക്ഷേപവുമുണ്ട്. നഴ്‌സുമാരുടെ ശമ്പള വര്‍ദ്ധനവ് സംബന്ധിച്ച സര്‍ക്കാര്‍ പുറത്തിറക്കിയ ഉത്തരവ് നടപ്പിലാക്കാതെ സര്‍ക്കാര്‍ തന്നെ ഒളിച്ചുകളിക്കുന്നതിന് തെളിവാണിത്. സര്‍ക്കാറിന്റെ മെല്ലപ്പോക്ക് നയം കാരണെ ഉത്തരവ് റദ്ദാക്കണമെന്ന് കാണിച്ച് ആശുപത്രി മാനേജ്‌മെന്റുകള്‍ നല്‍കിയ ഹര്‍ജിയില്‍ കോടതി അന്തിമ വിധി പറയാനിരിക്കേയാണ്. ഉത്തരവ് റദ്ദ് ചെയ്യാന്‍ സാധിക്കില്ലെന്ന് കോടതി വാദത്തിന്റെ വേളയില്‍ പറഞ്ഞത് നഴ്‌സുമാര്‍ക്ക് ആശ്വാസമായിട്ടുണ്ട്. ഇപ്പോഴത്തെ നിലയില്‍ ആശുപത്രി മാനേജ്‌മെന്റുകള്‍ നല്‍കിയ ഹര്‍ജി തള്ളിക്കളയാനുള്ള സാധ്യത കൂടുതലാണ്. വെട്ടിചുരുക്കിയ അവന്‍സുകള്‍ പുനഃസ്ഥാപിക്കണമെന്നാവശ്യപ്പെട്ട ഹര്‍ജിയും നാളെ കോടതിയുടെ പരിഗണനയില്‍ വരുന്നുണ്ട്. ഈ രണ്ട് കേസിലും സര്‍ക്കാറും, യുഎന്‍എയും മാത്രമാണ് കക്ഷി ചേര്‍ന്നിട്ടുള്ളത്. 

നഴ്‌സുമാര്‍ക്ക് ഇരുപതിനായിരം രൂപ മിനിമം ശമ്പളം നല്‍കണമെന്ന സുപ്രീംകോടതി ഉത്തരവ് നിലവിലുണ്ട്. ഇത് കൂടാതെ നഴ്‌സുമാര്‍ക്ക് മാന്യമായ ശമ്പളം നല്‍കണമെന്ന കേന്ദ്രസര്‍ക്കാറിന്റെ നിര്‍ദ്ദേശവും നിലവില്‍ക്കുന്നുണ്ട്. ഈ സാഹചര്യത്തില്‍ കാര്യങ്ങള്‍ തങ്ങള്‍ക്ക് അനുകൂലമായി മാറുമെന്നാണ് യുഎന്‍എയും കരുതുന്നത്. കേന്ദ്രസര്‍ക്കാറിന്റെ നിലപാടും അറ്റോര്‍ണി ജനറലും തങ്ങളുടെ ന്യായമായ ആവശ്യങ്ങള്‍ക്ക് ഒപ്പം നില്‍ക്കുമെന്നാണ് കരുതുന്നത്. കേന്ദ്രസര്‍ക്കാറിനെ വിഷയത്തില്‍ കക്ഷി ചേര്‍ക്കണമെന്ന് വാദിക്കാനാണ് യുഎന്‍എയുടെ നീക്കം. അങ്ങനെ വരുമ്പോള്‍ അത് നഴ്‌സുമാര്‍ക്ക് അനുകൂലമായി മാറാനാണ് സാധ്യത

അതേസമയം പുതുക്കിയ ശമ്പളം നല്‍കാതിരിക്കാന്‍ കടുംപിടുത്തവുമായി നീങ്ങാനാണ് സ്വകാര്യ ആശുപത്രികളുടെ നീക്കം. ഏപ്രില്‍ 23 ന് ആണ് സംസ്ഥാനത്തെ സ്വകാര്യ ആശുപത്രികളിലെ നഴ്‌സുമാരുടെ ശമ്പളപരിഷ്‌കരണ ഉത്തരവ് സര്‍ക്കാര്‍ പുറത്തിറക്കിയത്. കുറഞ്ഞ ശമ്പളം 20000 രൂപയാക്കി ഉയര്‍ത്തിയായിരുന്നു ഉത്തരവ്. എന്നാല്‍ ആശുപത്രി മാനേജ്‌മെന്റുകള്‍ ഉത്തരവ് അട്ടിമറിക്കാന്‍ ശ്രമിക്കുന്നുവെന്നാണ് യുഎന്‍എ യുടെ ആരോപണം.

സര്‍ക്കാര്‍ ഉത്തരവിനെതിരെ ആശുപത്രി മാനേജ്‌മെന്റുകള്‍ സുപ്രീംകോടതിയെ സമീപിച്ചിട്ടുണ്ട്. ഉത്തരവ് കോടതി സ്‌റ്റേ ചെയ്താല്‍ നഴ്‌സുമാരെ അണിനിരത്തി തിരുവനന്തപുരത്തേക്ക് ലോങ് മാര്‍ച്ച് നടത്തും. ചേര്‍ത്തല കെവി എം ആശുപത്രിയിലെ സമരം ഒത്തുതീര്‍പ്പാക്കാന്‍ മുന്‍കയ്യെടുക്കുന്ന മുന്നണിയെ ചെങ്ങന്നൂര്‍ ഉപതിരഞ്ഞെടുപ്പില്‍ സഹായിക്കുമെന്നും ജാസ്മിന്‍ ഷാ വ്യക്തമാക്കി. ആരും സഹായിച്ചില്ലെങ്കില്‍ തിരഞ്ഞെടുപ്പില്‍ നോട്ടയ്ക്ക് വോട്ട് ചെയ്യാനാണ് യുഎന്‍എ യുടെ ആഹ്വാനം.

വിജ്ഞാപനം അനുസരിച്ചുള്ള ശമ്പളം നല്‍കുന്നത് അപ്രായോഗികമാണെന്നും അതിനാല്‍ സ്‌റ്റേ ചെയ്യണമെന്നമാകും സുപ്രീംകോടതിയിലും നഴ്‌സുമാരുടെ വാദം. സര്‍ക്കാര്‍ പുറത്തിറക്കിയ പുതിയ വിജ്ഞാപനം അനുസരിച്ച് നഴ്‌സുമാരുടെ ശമ്പളം ഇങ്ങനെ: 50 കിടക്കകള്‍ വരെയുള്ള ആശുപത്രികളില്‍ 20000 രൂപ, 50 മുതല്‍ 100 കിടക്കള്‍ വരെ 24400 രൂപ, 100 മുതല്‍ 200 കിടക്കകള്‍ വരെ 29400 രൂപ, 200ന് മുകളില്‍ കിടക്കകളുള്ള ആശുപത്രികളില്‍ 32400 രൂപ എന്നിങ്ങനെയാണ് പുതുക്കിയ ശമ്പളം. വിജ്ഞാപനപ്രകാരം എല്ലാ സ്വകാര്യ ആശുപത്രികളിലെയും നഴ്‌സുമാര്‍ക്ക് 20,000 രൂപയാണ് അടിസ്ഥാന ശന്പളം. ജനറല്‍, ബിഎസ്സി നഴ്‌സുമാര്‍ക്ക് ഈ ശമ്പളം ലഭിക്കും. പത്തു വര്‍ഷം സര്‍വീസുള്ള എഎന്‍എം നഴ്‌സുമാര്‍ക്കും 20,000 രൂപ വേതനമായി ലഭിക്കും.