ലോക്കപ്പ് മരണത്തിലും വിലക്കയറ്റത്തിലും സര്‍ക്കാരിനെതിരെ ജനരോഷം ശക്തമാകുമ്പോള്‍ ചെങ്ങന്നൂര്‍ ഉപതെരഞ്ഞെടുപ്പില്‍ മുഖംരക്ഷിക്കാന്‍ ആലുവാ റൂറല്‍ എസ്.പിയായിരുന്ന എ.വി ജോര്‍ജ്ജിനെ മുഖ്യമന്ത്രി പിണറായി വിജയന്‍ സസ്‌പെന്‍ഡ് ചെയ്തു. ഇത് പൊലീസ് തലപ്പത്ത് വലിയ അമര്‍ഷമാണ് ഉണ്ടാക്കിയിരിക്കുന്നത്. പൊലീസ് അസേസിയേഷന്റെ സമ്മേളനങ്ങള്‍ രാഷ്ട്രിയ പാര്‍ട്ടികളുടെ ശൈലി സ്വീകരിക്കുന്നെന്ന ഇന്റലിജന്‍സ് റിപ്പോര്‍ട്ടും പുറത്ത് വന്നതോടെ സാധാരണ പൊലീസുകാരും സര്‍ക്കാരിനെതിരെ തിരിഞ്ഞിരിക്കുകയാണ്. സി.പി.എമ്മിന്റെ അടുപ്പാക്കാരനായിരുന്നു എ.വി ജോര്‍ജ്ജ്. പക്ഷെ, കാര്യങ്ങള്‍ കൈവിട്ട് പോയതോടെ വരാപ്പുഴ കസ്റ്റഡിമരണക്കേസില്‍ അദ്ദേഹത്തെ പാര്‍ട്ടിക്ക് കയ്യൊഴിവേണ്ടിവന്നു. 

പാര്‍ട്ടിയെ സഹായിച്ച എസ്.പിയെ സസ്‌പെന്റ് ചെയ്യുകയും വകുപ്പ്തല അന്വേഷണത്തിന് ഉത്തരവിടുകയും ചെയ്തത് ശരിയായില്ലെന്ന് ഐ.പി.എസ് ഉദ്യോഗസ്ഥര്‍ക്കിടയില്‍ സംസാരമുണ്ട്. പിണറായിയെ ഭയന്ന് പലരും അത് പരസ്യമാക്കുന്നില്ലെന്ന് മാത്രം. അതേസമയം വകുപ്പ്തല നടപടി വെറും പ്രഹസനം മാത്രമാണെന്നും അറിയുന്നു. ചെങ്ങന്നൂര്‍ ഉപതെരഞ്ഞെടുപ്പ് കഴിയുന്നതോടെ കാര്യങ്ങള്‍ ശാന്തമാകും. അതോടെ പ്രശ്‌നങ്ങള്‍ പരിഹരിക്കുമെന്നാണ് അറിയുന്നത്. എറണാകുളത്തെ സി.പി.എം നേതാക്കളില്‍ ചിലരുടെ നിര്‍ദ്ദേശപ്രകാരമാണ് ശ്രീജിത്തിനെയും സംഘത്തെയും റൂറല്‍ എസ്.പി ആയിരുന്ന എ.വി ജോര്‍ജ്ജിന്റെ കീഴിലുള്ള കടുവാ സംഘം കസ്റ്റഡിയിലെടുത്തതെന്ന് വ്യാപകമായ ആരോപണമുണ്ട്. പ്രതിപക്ഷനേതാവ് രമേശ് ചെന്നിത്തലയടക്കം ഇക്കാര്യം ചൂണ്ടിക്കാട്ടിയിരുന്നു.

തുടക്കത്തില്‍ എ.വി ജോര്‍ജ്ജിനെ സംരക്ഷിക്കുന്ന നിലപാടാണ് സര്‍ക്കാര്‍ സ്വീകരിച്ചത്. എന്നാല്‍ എസ്.പിയുടെ പങ്ക് അന്വേഷിക്കണമെന്ന ആവശ്യം ശ്രീജിത്തിന്റെ വീട്ടുകാരും പൊതുസമൂഹവും ആവശ്യപ്പെട്ടു, ചെങ്ങന്നൂര്‍ ഉപതെരഞ്ഞെടുപ്പും അടുത്തു. ഇതോടെ സര്‍്ക്കാര്‍ സമ്മര്‍ദ്ദത്തിലായി. എസ്.പിയെ ചോദ്യം ചെയ്‌തെങ്കിലും പിന്നീട് വിട്ടയച്ചിരുന്നു. എ.വി ജോര്‍ജ്ജും അന്വേഷ ഉദ്യോഗസ്ഥനായ ഐ.ജി ശ്രീജിത്തും തമ്മില്‍ അടുത്തബന്ധമാണെന്ന് ശ്രീജിത്തിന്റെ കുടുംബം ആരോപിച്ചു. ശ്രീജിത്ത് സംവിധാനം ചെയ്ത സിനിമയുടെ പൂജാ ചടങ്ങില്‍ എ.വി ജോര്‍ജ്ജ് പങ്കെടുത്ത വീഡിയോയും അവര്‍ പുറത്ത് വിട്ടു. സി.ബി.ഐ അന്വേഷണം ആവശ്യപ്പെട്ട് ഹൈക്കോടതിയെ സമീപിക്കാനും തീരുമാനിച്ചു. ഇപ്പോഴത്തെ രാഷ്ട്രീയ സാഹചര്യത്തില്‍ സി.ബി.ഐ വന്നാല്‍ കാര്യങ്ങള്‍ കൈവിട്ട് പോകുമെന്ന് മനസിലാക്കിയ സി.പി.എമ്മും സര്‍ക്കാരും എ.വി ജോര്‍ജ്ജിനെ അന്വേഷണ വിധേയമായി സസ്‌പെന്റ് ചെയ്യുകയായിരുന്നു.

സി.പി.എമ്മിന് വേണ്ടിയാണ് വരാപ്പുഴയില്‍ ശ്രീജിത്തിനെ കൊന്നതെന്ന് തുടക്കം മുതലേ ആക്ഷേപം ഉണ്ടായിരുന്നു. സി.പി.എം ശക്തികേന്ദ്രമായിരുന്ന വരാപ്പുഴ ദേവസ്വംപാടത്ത് കഴിഞ്ഞ പഞ്ചായത്ത് തെരഞ്ഞെടുപ്പില്‍ ബി.ജെ.പി കരുത്ത് തെളിയിച്ചു. അടുത്തകാലത്ത് യുവമോര്‍ച്ചയില്‍ ചേര്‍ന്ന ശ്രീജിത്തും സംഘവുമായിരുന്നു ഇതിന് പിന്നില്‍. ഇതോടെയാണ് ശ്രീജിത്തിനെ കൊലപ്പെടുത്താന്‍ സി.പി.എം തീരുമാനിച്ചതെന്ന് ബി.ജെ.പി ആരോപിച്ചിരുന്നു. ഇത് ശരിവയ്ക്കും വിധമാണ് ശ്രീജിത്തിന്റെ അമ്മ ശ്യാമള ഇന്നലെ നടത്തിയ വെളിപ്പെടുത്തല്‍ സി.പി.എമ്മിനെ കൂടുതല്‍ പ്രതിരോധത്തിലാക്കി. യുവമോര്‍ച്ച പ്രവര്‍ത്തകനായത് കൊണ്ടാണ് മുഖ്യമന്ത്രി വരാപ്പുഴയില്‍ എത്തിയിട്ടും ശ്രീജിത്തിന്റെ വീട് സന്ദര്‍ശിക്കാതിരുന്നെന്നും ആക്ഷേപമുണ്ട്. അതേസമയം മാഹിയില്‍ മരിച്ച സി.പി.എം പ്രവര്‍ത്തകന്‍ ബാബുവിന്റെ വീട്ടില്‍ സന്ദര്‍ശനം നടത്തുന്നുമുണ്ട്.