മലപ്പുറത്ത് തിയേറ്ററിനുള്ളില്‍ പത്ത് വയസുകാരിയെ ഉപദ്രവിക്കാന്‍ ഒത്താശ ചെയ്തത് കൂടെയുണ്ടായിരുന്ന അമ്മയാണെന്ന് പൊലീസ്. രണ്ടര മണിക്കൂര്‍ നേരമാണ് കുട്ടിയെ പ്രതിയായ പാലക്കാട് തൃത്താല സ്വദേശിയായ മൊയ്തീന്‍കുട്ടി ഉപദ്രവിച്ചത്. കഴിഞ്ഞ മാസം നടന്ന സംഭവത്തില്‍ തിയേറ്റര്‍ ഉടമകളും ചൈല്‍ഡ് ലൈന്‍ പ്രവര്‍ത്തകരും പരാതിപ്പെട്ടെങ്കിലും കേസെടുത്തിരുന്നില്ല. സംഭവം വിവാദമായതോടെ പൊലീസ് തിടുക്കത്തില്‍ കേസെടുക്കുകയായിരുന്നു. ഇതിനെതിരെ പ്രതിഷേധം ശക്തമാണ്.

ഏപ്രില്‍ എട്ടിനാണ് കുട്ടിയെ ഉപദ്രവിച്ച സംഭവം നടന്നത്. സ്ത്രീയും കുട്ടിയും തീയേറ്ററില്‍ എത്തിയ ശേഷമാണ് പ്രതി ബെന്‍സ് കാറിലെത്തിയത്. തുടര്‍ന്ന് കുട്ടിയുടെയും അമ്മയുടെയും നടുവിലായി ഇരുന്ന പ്രതി കുട്ടിയെ ഉപദ്രവിക്കുകയായിരുന്നു.

എന്നാല്‍ കുട്ടിയെ ഇയാള്‍ പീഡിപ്പിക്കുന്നത് മനസിലായെങ്കിലും സ്ത്രീ പ്രതികരിക്കാതിരിക്കുന്നത് സംശയത്തിന് ഇടയാക്കി. കസ്റ്റഡിയിലെടുത്ത പ്രതിയെ വിശദമായി ചോദ്യം ചെയ്തപ്പോഴാണ് 40 വയസ് പ്രായം തോന്നിക്കുന്ന സ്ത്രീ പെണ്‍കുട്ടിയുടെ അമ്മയാണെന്ന് മനസിലായത്. ഇവരുടെ ഒത്താശയോടെയാണ് കുട്ടിയെ ഇയാള്‍ ഉപദ്രവിച്ചത്. കുട്ടി ഇതിന് മുമ്ബും പീഡനത്തിന് ഇരയായിട്ടുണ്ടോ എന്ന് കണ്ടെത്താന്‍ കൂടുതല്‍ പരിശോധനകള്‍ നടത്തുമെന്നും പൊലീസ് വ്യക്തമാക്കി.