ചങ്ങരംകുളത്തെ സിനിമാ തിയറ്ററില്‍ പത്തുവയസ്സുകാരിയെ ഉപദ്രവിക്കാന്‍ ഒത്താശ ചെയ്തത് കൂടെയുണ്ടായിരുന്ന അമ്മയെന്ന് പോലീസ്. രണ്ടര മണിക്കൂര്‍ നേരം കുട്ടിയെ പാലക്കാട് തൃത്താല സ്വദേശി മൊയ്തീന്‍കുട്ടി പീഡിപ്പിച്ചു. കഴിഞ്ഞ മാസം നടന്ന സംഭവത്തില്‍ തിയറ്റര്‍ ഉടമകളും ചൈല്‍ഡ് ലൈന്‍ പ്രവര്‍ത്തകരും പരാതി നല്‍കിയിട്ടും കേസെടുത്തില്ല. ചാനല്‍ പുറത്തുവിട്ടതോടെയാണ് കേസെടുത്തത്.

ഏപ്രില്‍ എട്ടിനാണ് കുട്ടിയെ ഉപദ്രവിച്ചത്. സ്ത്രീയും കുട്ടിയും തിയറ്ററിലെത്തിയ ശേഷമാണ് പ്രതി ബെന്‍സില്‍ എത്തിയത്. തുടര്‍ന്ന് കുട്ടിയുടെയും അമ്മയുടേയും നടുവിലിരുന്ന പ്രതി കുട്ടിയെ ഉപദ്രവിക്കുകയായിരുന്നു.

സ്ത്രീ പ്രതികരിക്കുന്നില്ലെന്നത് സംശയത്തിനിടയാക്കി. കസ്റ്റഡിയിലെടുത്ത പ്രതിയെ ചോദ്യം ചെയ്തപ്പോള്‍ 40 വയസ്സു തോന്നുന്ന സ്ത്രീ കുട്ടിയുടെ അമ്മയാണെന്ന് മനസിലായത്. ഇവരുടെ ഒത്താശയോടെയാണ് പീഡനം നടന്നത്. മുമ്പും കുട്ടി പീഡനത്തിനിരയായിട്ടുണ്ടോ എന്ന് കണ്ടെത്താന്‍ കൂടുതല്‍ പരിശോധന നടത്തുമെന്ന് പോലീസ് വ്യക്തമാക്കി.

പ്രതിയെ ഇന്ന് പൊന്നാനി കോടതിയില്‍ ഹാജരാക്കും. തൃത്താലയിലെ പ്രമുഖ വ്യവസായി ആയ മൊയ്തീന്‍ കുട്ടിയെ ഇന്നലെ പൊലീസ് അറസ്റ്റ് ചെയ്തിരുന്നു. ചൈല്‍ഡ് ലൈന്‍ പ്രവര്‍ത്തകര്‍ ദൃശ്യങ്ങളടക്കം പരാതി നല്‍കിയിട്ടും കേസെടുക്കാനോ പ്രതിയെ പിടികൂടാനോ പൊലീസ് തയ്യാറായിരുന്നില്ല. 

സിസിടിവി ദൃശ്യങ്ങള്‍ മാധ്യമങ്ങള്‍ പുറത്തുവിട്ടതിന് പിന്നാലെ മാത്രമാണ് അറസ്റ്റുണ്ടായത്. ഗുരുതരമായ വീഴ്ച വരുത്തിയ ചങ്ങരംകുളം എസ്.ഐ ബേബിയെ അന്വേഷണ വിധേയമായി തൃശൂര്‍ റേഞ്ച് ഐ.ജി. എം.ആര്‍ അജിത്ത് കുമാര്‍ സസ്‌പെന്റ് ചെയ്തിട്ടുണ്ട്.

മലപ്പുറം ഡി.സി.ആര്‍.ബി ഡിവൈഎസ്പി യുടെ നേതൃത്വത്തിലുള്ള പ്രത്യേക സംഘമാണ് കേസ് അന്വേഷിക്കുന്നത്. കേസെടുക്കാന്‍ പൊലീസ് വൈകിയതില്‍ പ്രതിഷേധിച്ച് യൂത്ത് കോണ്‍ഗ്രസ് ഇന്നലെ ചങ്ങരംകുളം പൊലീസ് സ്‌റ്റേഷന്‍ ഉപരോധിച്ചു.