മുന്‍ ഗതാഗത മന്ത്രി തോമസ്ചാണ്ടിക്കെതിരെ വിജിലൻസിന്റെ പ്രഥമികാന്വേഷണം. റിസോർട്ടിലേക്ക് റോഡ് നിർമ്മിച്ചതുമായി ബന്ധപ്പെട്ട മുൻ കളക്ടർ പത്മകുമാർ ഒന്നാം പ്രതിയായും തോമസ് ചാണ്ടി മൂന്നാംപ്രതിയുമായി നൽകിയ പരാതിയിലാണ് കോട്ടയം വിജിലൻസ് കോടതിയുടെ ഉത്തരവ്.

ലേക്ക് പാലസ് റിസോര്‍ട്ടിലേക്ക് എംപി ഫണ്ട് ഉപോയോഗിച്ച്‌ നിലം നികത്തി നിര്‍മിച്ച റോഡ് കലക്ടര്‍ നിയമവിരുദ്ധമായി സാധൂകരിച്ച്‌ നല്‍കിയെന്നാണ് കേസ്. നെൽവയൽ തണ്ണീർതടനിയമം ലംഘിച്ച് നിർമ്മിച്ച റോഡിന് മുൻകളക്ട‍ർ എൻ പത്മകുമാർ അനുമതി നൽകിയെന്നായിരുന്നു പരാതി. ഈ റോഡ് പൂർവ്വസ്ഥിതിയിലാക്കണമെന്ന് ആ‍ർഡിഒയുടെ റിപ്പോർട്ട് കളക്ടർ തള്ളി.

നികത്തിയ 30 സെന്റിൽ പാർക്കിംഗ് ഏര്യയും നിർമ്മിച്ചു. പത്മകുമാർ ഒന്നാം പ്രതിയും തോമസ് ചാണ്ടി മൂന്നാം പ്രതിയുമായി നൽകിയിരിക്കുന്ന പരാതിയിൽ ആർഡിഒ പ്രിൻസിപ്പൾ കൃഷി ഓഫീസർ ഏക്സിക്യൂട്ടീവ് എൻജിനീയർ തുടങ്ങിയവരെയും പ്രതി ചേർത്തിട്ടുണ്ട്. മൂന്ന് മാസത്തിനകം റിപ്പോർട്ട് നൽകണമെന്നാണ് വിജിലൻസ് കോടതിയുടെ ഉത്തരവ്.