രാജ്യസഭയിലേക്ക് മാണി ഗ്രൂപ്പില്‍ നിന്ന് ആരാവും സ്ഥാനാര്‍ത്ഥി എന്നതാണ് എല്ലാവരും ഉറ്റുനോക്കുന്നത്. ഹരിച്ചാലും ഗുണിച്ചാലും നേട്ടം മാണിക്കാവുമെന്നാണ് രാഷ്ട്രീയ നിരീക്ഷകര്‍ കണക്കു കൂട്ടുന്നത്. ഇനിയുള്ള കാലം രാജ്യസഭയിലേക്ക് പോയി സ്വസ്ഥം വിശ്രമമാകാനാണ് കെ.എം. മാണി ആഗ്രഹിക്കുന്നത്. മാണിക്ക് ഇനിയൊരു തെരഞ്ഞെടുപ്പില്‍ പയറ്റാനുള്ള താത്പര്യവുമില്ല. അതേസമയം കെ.എം. മാണിയെ കേരള രാഷ്ട്രീയത്തില്‍ സജീവമാക്കാനാണ് ശ്രമിക്കുന്നത്. അതിനായി മാണി രാജി വയ്ക്കുന്ന സീറ്റില്‍ ജോസ് കെ. മാണിയെ മത്സരിപ്പിക്കും. അതോടെ അടുത്ത തെരഞ്ഞെടുപ്പില്‍ യുഡിഎഫ് ജയിച്ചാല്‍ ജോസ് കെ മാണിക്ക് ഈസിയായി മന്ത്രിയാകാം. 

സീറ്റിന്റെ പേരില്‍ പല ഫോര്‍മുലകളാണ് ഉയര്‍ന്നു വരുന്നത്. പാര്‍ട്ടി ചെയര്‍മാന്‍ കെ.എം. മാണിയുടെ പേര് പോലും തള്ളിക്കളയാനാവില്ലെന്നാണ് ഉന്നത നേതാക്കള്‍ പറയുന്നത്. എം.പി. വീരേന്ദ്രകുമാറിന് രാജ്യസഭാംഗമാകാമെങ്കില്‍ അതിലും ആരോഗ്യമുള്ള കെ.എം. മാണിക്കും ആകാം. രാജ്യസഭയിലേക്ക് ജോസ് കെ. മാണി എം.പിയുടെ സാദ്ധ്യതയും തള്ളുന്നില്ല. ലോക്‌സഭാ തിരഞ്ഞെടുപ്പിന് ഒരു വര്‍ഷത്തില്‍ താഴെ കാലാവധിയേ ഉള്ളൂ. 

രാജ്യസഭാ എം.പി എന്ന നിലയില്‍ ആറു വര്‍ഷ കാലാവധിയും ലഭിക്കും. യു.പി.എ അധികാരത്തില്‍ വന്നാല്‍ കേന്ദ്ര മന്ത്രിയുമാകാം. കെ.എം. മാണി, ജോസ് കെ. മാണി എന്നീ പേരുകള്‍ പരിഗണിച്ച ശേഷമേ മറ്റു പേരുകള്‍ പരിഗണിക്കുകയുള്ളൂ. അതല്ലെങ്കില്‍ ജോയ് എബ്രഹാമിന് ഒരു തവണ കൂടി അവസരം ലഭിക്കാം. ഇന്ന് രാവിലെ 10.30ന് തിരുവനന്തപുരം എം.എല്‍.എ ക്വാര്‍ട്ടേഴ്‌സില്‍ ചേരുന്ന മാണിഗ്രൂപ്പ് യോഗത്തില്‍ സ്ഥാനാര്‍ത്ഥിയെ പ്രഖ്യാപിക്കും.