ബാലകൃഷ്ണപിള്ള, വീരേന്ദ്രകുമാര്, കെ.എം മാണി എന്നീ ഘടകക്ഷി നേതാക്കളെ നാണംകെടുത്തിയ കോണ്ഗ്രസ്, കാല്ച്ചുവട്ടിലെ മണ്ണൊലിക്കുന്നത് കണ്ട് എല്ലാവര്ക്കും പരവതാനി വിരിക്കുന്നു
കോണ്ഗ്രസിന്റെ ഒതുക്കലും ചവിട്ടിമെതിക്കലും ചതിയും കാരണം യു.ഡി.എഫ് വിട്ട ഘടകക്ഷികളെ കോണ്ഗ്രസ് നേതാക്കള് പരവതാനി വിരിച്ച് സ്വീകരിക്കുന്നു. ഇതൊരു സുപ്രഭാതത്തില് പെട്ടെന്നെടുത്ത തീരുമാനമല്ല. സ്വന്തം കാലിനടിയിലെ മണ്ണൊലിച്ച് പോകുന്നത് തടയാനുള്ള തത്രപ്പാടിന്റെ ഭാഗമായാണിത്. ബാര്ക്കോഴ കേസില് കെ.എം മാണിയെ കുടുക്കി, അദ്ദേഹത്തെ രാജിവെപ്പിച്ചത് കോണ്ഗ്രസ് നേതാക്കള് തന്നെയാണെന്ന് അദ്ദേഹം തന്നെ പറഞ്ഞിട്ടുണ്ട്. ആ മാണിയുടെ പാലായിലെ വീട്ടില് ചെന്ന് കാല് പിടിച്ച് അദ്ദേഹത്തെ കൂട്ടിക്കൊണ്ട് വരേണ്ട ഗതികേടില് കോണ്ഗ്രസ് നേതാക്കളെത്തി. ഇതാണ് കാലത്തിന്റെ കാവ്യനീതി. ധനമന്ത്രിയായിരുന്ന കെ.എം മാണിയെ ബാര് മുതലാളി ബിജുരമേശിനെ കൂട്ടിപിടിച്ചാണ് ചില കോണ്ഗ്രസ് നേതാക്കള് പൊതുസമൂഹത്തിന് മുന്നില് അഴിമതിക്കാരനാക്കിയത്.
എല്.ഡി.എഫിലെ ആട്ടും തുപ്പും സഹിക്കവയ്യാതെയാണ് വീരേന്ദ്രകുമാറിന്റെ നേതൃത്വത്തിലുള്ള ജനാതദള് യു.ഡി.എഫിലേക്ക് ചേക്കേറിയത്. എന്നാല് പട പേടിച്ച് പന്തളത്ത് ചെന്ന അവസ്ഥയിലായി വീരനും മകന് ശ്രേയാംസ്കുമാറും കൂട്ടരും. അങ്ങനെയാണ് യു.ഡി.എഫ് എം.എല്.എമാരുടെ വോട്ട് കൊണ്ട് വിജയിച്ച് രാജ്യസഭാ എം.പി സ്ഥാനം വരെ രാജിവെച്ച് വീരേന്ദ്രകുമാര്, പണ്ട് തന്നെ ആട്ടിപ്പായിച്ച പിണറായി വിജയന്റെ കാല്ക്കല് വീണത്. മുന്നണിയില് എടുത്തെങ്കിലും വീരന് വന്നുടനെ സി.പി.എം രാജ്യസഭാ സീറ്റ് നല്കിയാണ് സ്വീകരിച്ചത്. അതുകൊണ്ട് കേരളാ കോണ്ഗ്രസിനെ വീണ്ടും മുന്നണിയില് എടുക്കും മുന്പ് രാജ്യസഭാ സീറ്റ് നല്കിയെന്ന് ഒരുപറ്റം കോണ്ഗ്രസ് നേതാക്കള് ആക്രോശിക്കുന്നത് കൊണ്ട് വലിയ കാര്യമില്ല.
ആര്. ബാലകൃഷ്ണപിള്ള യു.ഡി.എഫ് ഉണ്ടാക്കാന് മുന്നില് നിന്ന പ്രധാന നേതാവാണ്. ഉമ്മന്ചാണ്ടിയുടെ തന്പോരിമയും അവഗണനയും മടുത്താണ് അദ്ദേത്തിന്റെ കേരളാ കോണ്ഗ്രസ് (ബി) യു.ഡി.എഫ് വിട്ടത്. ബാലകൃഷ്ണപിള്ളയുടെ പാര്ട്ടിക്ക് ആകെയുണ്ടായിരുന്ന മന്ത്രിയായിരുന്നു ഗണേഷ്കുമാര്. ദാമ്പത്യപ്രശ്നം വിവാദമായതിനെ തുടര്ന്ന് ഗണേഷ് കുമാര് മന്ത്രിസ്ഥാനം ഒഴിഞ്ഞു. പിന്നീട് കേസെല്ലാം തീര്ന്ന ശേഷം മന്ത്രിസഭയിലേക്ക് മടങ്ങിവരാന് ഗണേഷ് കുമാര് തയ്യാറായി. ബാലകൃഷ്ണപിള്ള യു.ഡി.എഫ് യോഗത്തില് ഇക്കാര്യം ആവശ്യപ്പെട്ടു. എന്നാല് നിഷേധാത്മക സമീപനമാണ് ഉമ്മന്ചാണ്ടിയുടെ നേതൃത്വത്തിലുള്ള കോണ്ഗ്രസ് തീരുമാനിച്ചത്. അതോടെ അവരും യു.ഡി.എഫ് വിട്ടു.
ഷിബുബേബി ജോണ് ചവറയില് തോറ്റതോടെ ആര്.എസ്.പി (ബി)യെയും കോണ്ഗ്രസ് അവഗണിക്കാന് തുടങ്ങി. കഴിഞ്ഞ യു.ഡി.എഫ് സര്ക്കാരിന്റെ കാലത്ത് ഉമ്മന്ചാണ്ടി ഭൂപക്ഷമില്ലാതെ ആടിയുലഞ്ഞ് നിന്നപ്പോള്, എല്.ഡി.എഫിനൊപ്പമുണ്ടായിരുന്ന ആര്.എസ്.പിയിലെ എ.എ അസീസ് എം.എല്.എയും സംഘവും യു.ഡി.എഫിലേക്ക് വരുകയായിരുന്നു. ഘടകക്ഷികളോട് ഇത്തരത്തില് പെരുമാറുന്ന കോണ്ഗ്രസിന്റെ സമീപനം കേരളത്തില് മാത്രമല്ല കര്ണാടകത്തിലും ഉണ്ടായിരുന്നു. കര്ണാടക മുഖ്യമന്ത്രി കുമാരസ്വാമിയുടെ ജനതാദള് മുമ്പ് കോണ്ഗ്രസിന്റെ ഘടകക്ഷിയായിരുന്നു. കോണ്ഗ്രസിന്റെ കയ്യിലിരിപ്പുകൊണ്ടാണ് അവര് ബി.ജെ.പിക്കൊപ്പം പോയത്. ഇപ്പോള് ഗതിയില്ലാതെ കോണ്ഗ്രസ് കുമാരസ്വാമിയെ മുഖ്യമന്ത്രിയാക്കുകയും ചെയ്തു.
വീഡിയോ കാണാം.....
https://www.facebook.com/Malayalivartha
