നിപ രോഗികളെ പരിചരിച്ച നഴ്‌സുമാരെ പുറത്താക്കിയെന്ന് ആരോപിച്ച് ബേബി മെമ്മോറിയല്‍ ആശുപത്രിയില്‍ നഴ്‌സിംഗ് സമരം. നിപ വൈറസ് ബാധിച്ചവരെ പരിചരിച്ച നഴ്‌സുമാരെ ഉള്‍പ്പെടെ മൂന്നുപേരെ കഴിഞ്ഞ ദിവസം പിരിച്ചുവിട്ടിരുന്നു. ഇവരെ തിരിച്ചെടുക്കുക, പുതിയ ശമ്പള പരിഷ്‌ക്കരണം നടപ്പിലാക്കുക, നഴിസിംഗ് ചൂഷണം അവസാനിപ്പിക്കുക എന്നീ ആവശ്യങ്ങളുന്നയിച്ച് യുണൈറ്റഡ് നഴ്‌സസ് അസോസിയേഷന്റെ നേതൃത്വത്തിലാണ് സമരം. 

വ്യാഴാഴ്ച ഉച്ചയോടെയാണ് സമരം ആരംഭിച്ചത്. അന്ന് തന്നെ മാനേജ്‌മെന്റുമായി ചര്‍ച്ച നടത്തിയെങ്കിലും പരാചയപ്പെട്ടു. ഇതോടെ നഴ്‌സുമാര്‍ സമരം തുടങ്ങിയിരുന്നു. സമാധനമായി സമരം ചെയ്തവരെ രാത്രി രണ്ടര മണിയോടെ പോലീസിനെ ഉപയോഗിച്ച് അറസ്റ്റ് ചെയ്ത് നീക്കിയെന്ന് സമരക്കാര്‍ പറഞ്ഞു. ഇന്നലെ രാവിലെ മുതല്‍ സമരം തുടരാനെത്തിയ നഴ്‌സുമാരോട് ചര്‍ച്ചയക്ക് തയ്യാറാകണമെന്ന് മാനേജ്‌മെന്റ് ആവശ്യപ്പെട്ടു. ഇതിന്റെ അടിസ്ഥാനത്തില്‍ നഴ്‌സുമാര്‍ ജോലിക്ക് കയറുകയും ചെയ്തു. എന്നാല്‍ ചര്‍ച്ച പരാജയപ്പെട്ടതോടെ സമരം ശക്തമാക്കുകയായിരുന്നു. നഴ്‌സുമാര്‍ ജോലി ബഹിഷ്‌കരിച്ച് ആശുപത്രിക്ക് മുന്നില്‍ കുത്തിയിരുപ്പ് സമരം തുടരുകയാണ്. 800 കിടക്കകളുള്ള ആശുപത്രിയിലെ നഴ്‌സുമാര്‍ക്ക് സര്‍ക്കാരിന്റെ പുതിയ ഓര്‍ഡിനന്‍സ് പ്രകാരം 28,000 രൂപ ശമ്പളം നല്‍കണമെന്നത് രണ്ട് മാസമായിട്ടും ആശുപത്രിയില്‍ നടപ്പിലായില്ലെന്ന് നഴ്‌സുമാര്‍ പറയുന്നു. ഇതേ ആവശ്യമുന്നയിച്ചതിനാണ് നിപ്പ ബാധിതരെ ചികിത്സിച്ച രണ്ട് നഴ്‌സുമാരെ ഉള്‍പ്പെടെ മൂന്നുപേരെ മികവ് കുറവെന്ന പേരില്‍ പിരിച്ചുവിട്ടത്. സോഷ്യല്‍ മീഡിയയിലെ പോസ്റ്റില്‍ ലൈക്ക് ചെയ്തു എന്നാരോപിച്ചാണ് ഒരാളെ രാത്രിയില്‍ വിളിച്ചുവരുത്തി പിരിച്ചുവിട്ടുകൊണ്ടുള്ള കത്ത് നല്‍കിയതെന്നും സമരക്കാര്‍ പറഞ്ഞു. യശലേ പുറത്താക്കപ്പെട്ടവര്‍ക്ക് പുതിയ അപ്ലിക്കേഷന്‍ കൊടുക്കാമെന്നും
ഒഴിവുവരുകയാണെങ്കില്‍ ഇവരുടെ കാര്യം പരിഗണിക്കാമെന്നും നിപയെന്നല്ല ഏത് രോഗത്തെ ചികിത്സിച്ചാലും കൂടുതലൊന്നും പ്രതീക്ഷിക്കണ്ടായെന്നുമായിരുന്നു മാനേജ്മന്റിന്റെ മറുപടിയെന്നും യുഎന്‍എ നേതാക്കള്‍ പറഞ്ഞു. 

നഴ്‌സുമാരുടെ സംഘടനകള്‍ ആരോപിക്കുന്ന കാര്യങ്ങള്‍ അടിസ്ഥാന രഹിതമെന്ന് ബേബി മെമ്മോറിയല്‍ ആശുപത്രി അധികൃതര്‍ പറഞ്ഞുസമൂഹ മാധ്യമങ്ങളിലൂടെ സ്ഥാപനത്തിന്റെ അധികാരികള്‍ക്കെതിരെ മോശം പ്രചരണം നടത്തിയതിനാണ് പുരുഷ ട്രെയിനീ നഴ്‌സിനെതിരെ അച്ചടക്ക നടപടി സ്വീകരിച്ചത്. എന്നാണ് മാനേജ്‌മെന്റ് വാദം