നടുക്കടലില്‍ അകപ്പെട്ടുപോയ മത്സ്യത്തൊഴിലാളികളെ മണിക്കൂറുകള്‍ നീണ്ട പ്രയത്‌നത്തിനൊടുവില്‍ രക്ഷപ്പെടുത്തി. പുതിയാപ്പ ഫിഷിങ് ഹാര്‍ബറില്‍നിന്ന് മീന്‍പിടിക്കാന്‍ പോയ ചീമ്പാളി ബോട്ടിലെ പത്ത് മത്സ്യത്തൊഴിലാളികളെയാണ് മറ്റൊരു ബോട്ടിലെ മത്സ്യത്തൊഴിലാളികള്‍ മണിക്കൂറുകള്‍ നീണ്ട പ്രയത്‌നത്തിലൊടുവില്‍ രക്ഷപ്പെടുത്തിയത്.
യന്ത്രത്തകരാറുമൂലം 20 നോട്ടിക്കല്‍ മൈല്‍ അകലെ വ്യാഴാഴ്ച രാത്രി കുടുങ്ങുകയായിരുന്നു തൊഴിലാളികള്‍. ഇതിനിടെ കടല്‍ക്ഷോഭം ശക്തമായയോടെ ബോട്ട് നിയന്ത്രണം വിട്ട് ഒഴുകാന്‍ തുടങ്ങി. രാത്രി രണ്ടുമണിയോടെ മൊബൈലില്‍ സിഗ്‌നല്‍ കിട്ടിയതിനെ തുടര്‍ന്ന് ബോട്ടുടമയെ ബന്ധപ്പെടുകയും അപകടാവസ്ഥ അറിയിക്കുകയുമായിരുന്നു.
ഉടനെ കോസ്റ്റ് ഗാര്‍ഡിനെ വിവരമറിയിച്ചെങ്കിലും രക്ഷാപ്രവര്‍ത്തനത്തിനുള്ള സൗകര്യങ്ങളോ ബോട്ടുകളോ ഇല്ലെന്നും മറൈന്‍ എന്‍ഫോഴ്‌സ്‌മെന്റുമായി ബന്ധപ്പെടാന്‍ ആവശ്യപ്പെട്ടതായും ബോട്ടുടമ രാമചന്ദ്രനും മറ്റ് മത്സ്യത്തൊഴിലാളികളും പറയുന്നു. രാവിലെ ഒമ്പതുവരെയും കടലിലുണ്ടായിരുന്ന മറ്റ് ബോട്ടുകളുമായി ബന്ധപ്പെടാനും സാധ്യമായില്ല. രാവിലെ ഒമ്പതിനുശേഷമാണ് കടലിലുണ്ടായിരുന്ന ദാസ് ബോട്ടലിലെ ജീവനക്കാരെ ബന്ധപ്പെടാന്‍ കഴിഞ്ഞത്. പയ്യോളി വെള്ളിയാങ്കല്‍ ഭാഗത്തുനിന്ന് രക്ഷപ്പെടുത്തിയ ബോട്ട് വൈകീട്ട് മൂന്നു മണിയോടെ സുരക്ഷിതമായി പുതിയാപ്പ തീരത്ത് എത്തിച്ചു.
കണ്‍ട്രോള്‍ റൂമില്‍ വിവരം കിട്ടിയ ഉടന്‍ രക്ഷാപ്രവര്‍ത്തനത്തിന് ഗോള്‍ഡന്‍ എന്ന രക്ഷാപ്രവര്‍ത്തന ബോട്ട് പുറപ്പെട്ടെങ്കിലും കാലാവസ്ഥ പ്രശ്‌നം കാരണം ബോട്ടിനടുത്ത് എത്താന്‍ സാധിച്ചിരുന്നില്ലെന്നാണ് അധികൃതരുടെ വിശദീകരണം. സ്രാങ്ക് എടക്കര താഴത്തില്‍പീടിക സിദ്ധാര്‍ഥിന്റെ മനോധൈര്യമാണ് തങ്ങളുടെ ജീവന്‍ തിരിച്ചുകിട്ടാന്‍ കാരണമായതെന്ന് രക്ഷപ്പെട്ട ബൈജു, മോഹന്‍ദാസ്, സുഗുണന്‍, ബാബു, കിഷോര്‍ എന്നിവര്‍ പറയുന്നു.