ഇല്ലാത്ത ബാര്ക്കോഴയുടെ ഭൂതം തുറന്ന് വിട്ട്, കെ.എം മാണിയെ അപമാനിച്ചവര് അവസാനം പാലായിലെ വീട്ടില് ചെന്ന് കാലുപിടിച്ചു. യു.ഡി.എഫിലേക്ക് കേരളാ കോണ്ഗ്രസിന് പരവതാനിയും വിരിച്ചു, രാജ്യസഭാ സീറ്റും നല്കി. അപ്പോഴേക്കും കോണ്ഗ്രസ് പാളയത്തില് പടപ്പുറപ്പാട് തുടങ്ങി
ശനിദോഷം മാറി കെ.എം മാണിക്ക് ശുക്രദശ ഉദിച്ചിരിക്കുന്നു. കേരളാകോണ്ഗ്രസിന് കേരള രാഷ്ട്രീയത്തില് നിര്ണായക സ്വാധീനമുണ്ടെന്ന് വീണ്ടും തെളിയിച്ചിരിക്കുകയാണ് അധ്വാനവര്ഗ സൈദ്ധാന്തിക നേതാവ്. ഒരിക്കല് അപമാനിച്ചവര് പാലായിലെ വീട്ടില് വന്ന് കാലില് വീണു. വീണ്ടും യു.ഡി.എഫിലേക്ക് വരാന് പരവതാനി വിരിച്ചു, സമ്മാനമായി രാജ്യസഭാ സീറ്റും നല്കി. അപ്പോഴേക്കും കോണ്ഗ്രസിന്റെ പാളയത്തില് പടയായി. അതെല്ലാം കണ്ട് കെ.എം മാണി ഊറിച്ചിരിക്കുകയാണ്. കൊടുത്താല് കോണ്ഗ്രസിനും പണികിട്ടും. ഉമ്മന്ചാണ്ടിയെ മാറ്റി മുഖ്യമന്ത്രി കസേരയിലെത്താന് അരയും തലയും മുറുക്കിയിറങ്ങിയ കോണ്ഗ്രസ് നേതാവിന്റെ ഇംഗിതത്തിന് കെ.എം മാണി വഴങ്ങിയില്ല. അതിനുള്ള പ്രതികാരമായി ധനമന്ത്രിയായിരുന്ന കെ.എം മാണിയെ ബാര്ക്കോഴയില് കുരുക്കി.
ചതിപ്രയോഗത്തിലൂടെ രാഷ്ട്രീയ കേരളത്തിന് മുന്നില് കെ.എം മാണിയെ അപമാനിച്ചു. സത്യമെന്തെന്ന് മനസിലാക്കാന് ബ്രേക്കിംഗ് ന്യൂസുകള്ക്കും റേറ്റിംഗിനും പിന്നാലെ പാഞ്ഞ ചാനല് ചാത്തന്മാരും ശ്രമിച്ചില്ല. അവസാനം എല്ലാം കലങ്ങിത്തെളിഞ്ഞിട്ടും കോഴ മാണി എന്ന് പലരും കളിയാക്കി. അത് മാണിയെ ഭയന്നായിരുന്നു. യു.ഡി.എഫ് വിട്ട മാണി എല്.ഡി.എഫില് വരുന്നത് സി.പി.ഐ ഭയന്നു. കേരളാ കോണ്ഗ്രസ് വന്നാല് തങ്ങളുടെ പ്രാധാന്യം കുറയുമെന്ന് കാനത്തിനും സംഘത്തിനും നന്നായി അറിയാമായിരുന്നു. അതിനാല് മന്ത്രം ഉരുവിടും പോലെ ഇടയ്ക്കിടെ ബാര്ക്കോഴ, അഴിമതി എന്നൊക്കെ കാനം ഉരുവിട്ടുകൊണ്ടിരുന്നു. ചെങ്ങന്നൂരില് മാണിയുടെ വോട്ട് വേണ്ടെന്ന് കാനം പറഞ്ഞിട്ടും സ്ഥാനാര്ത്ഥിയായിരുന്ന സജി ചെറിയാന് കെ.എം മാണിയുടെ അനുഗ്രഹവും വോട്ടും തേടിയെത്തി. അതോടെ കാര്യങ്ങള് കൈവിട്ടുപോവുകയാണെന്ന് കോണ്ഗ്രസിനും ലീഗിനും മനസിലായി.
മാണിയെ കൈവിട്ടാല് മധ്യതിരുവിതാംകൂറില് കോണ്ഗ്രസിന് പച്ച തൊടാനാവില്ലെന്ന് ഉമ്മന്ചാണ്ടിക്കും ചെന്നിത്തലയ്ക്കും മനസിലായി. ചെങ്ങന്നൂരിന് പിന്നാലെ ലോക്സഭാ തെരഞ്ഞെടുപ്പും വരുന്നുണ്ട്. അതെല്ലാം മുന്കൂട്ടി കണ്ട് മുസ്്ലിംലീഗ് ദേശീയ ജനറല് സെക്രട്ടറി പി.കെ കുഞ്ഞിലിക്കുട്ടി ജോസ് കെ.മാണിയുമാസി സംസാരിച്ചു. ശേഷം കോണ്ഗ്രസ് അധ്യക്ഷന് രാഹുല് ഗാന്ധിയുമായി കൂടിക്കാഴ്ച നടത്തി. അവിടെ മഞ്ഞുരുകി. കേരളാ കോണ്ഗ്രസിന് രാജ്യസഭാ സീറ്റ് നല്കാമെന്ന് ഉമ്മന്ചാണ്ടിയും ചെന്നിത്തലയും ഹസനും അതിന് മുമ്പ് വാഗ്ദാനം നല്കിയിരുന്നു. രാജ്യസഭാ സീറ്റിന്റെ കാര്യം ജോസ് കെ. മാണി മുന്നോട്ട് വെച്ചപ്പോള് രാഹുല് ഗാന്ധി പോസിറ്റീവായാണ് പ്രതികരിച്ചത്. അടുത്തതവണ കേന്ദ്രത്തില് അധികാരത്തിലെത്തണമെങ്കില് കേരളാ കോണ്ഗ്രസിന്റെ അടക്കം പിന്തുണവേണമെന്ന് രാഹുല് ഗാന്ധിക്ക് അറിയാം.
കേരളാ കോണ്ഗ്രസിന് രാജ്യസഭാ സീറ്റ് നല്കിയതോടെ ഒരു കൂട്ടം നേതാക്കളും പ്രവര്ത്തകരും ഹാലിളകി നടക്കുകയാണ്. അടുത്ത ലോക്സഭാ തെരഞ്ഞെടുപ്പില് അവര് പക വീട്ടുമെന്ന് കെ.എം മാണിക്ക് നന്നായി അറിയാം. അതുകൊണ്ടാണ് കോട്ടയം എം.പിയായ ജോസ് കെ.മാണിയെ രാജിവെപ്പിച്ച് രാജ്യസഭയിലേക്ക് വിട്ടത്. പണി പാലുംവെള്ളത്തില് കിട്ടിയ കോണ്ഗ്രസ് നേതൃത്വം എന്ത് ചെയ്യണമെന്നറിയാതെ അന്തംവിട്ട് കുന്തം വിഴുങ്ങിയ പോലെ നില്ക്കുകയാണ്. കേരളത്തിലെ പ്രശ്നങ്ങള് പരിഹരിച്ചില്ലെങ്കില് ഇടപെടുമെന്ന് ഹൈക്കമാന്ഡും വാളോങ്ങി.
https://www.facebook.com/Malayalivartha
