രാജ്യസഭാ തിരഞ്ഞെടുപ്പില്‍ വിവാദത്തിന്റെ നടുവിലാണ് കോണ്‍ഗ്രസ്. രാജ്യസഭാ തിരഞ്ഞെടുപ്പില്‍ യു ഡി എഫ്‌ സ്ഥാനാര്‍ഥി ജോസ് കെ മാണിക്ക് വോട്ട് ചെയ്യുമെന്ന് തൃത്താല എംഎല്‍എ വി ടി ബല്‍റാം പ്രഖ്യാപിച്ചു. പരസ്യമായി അഭിപ്രായം പറയുന്നവര്‍ക്കെതിരെ വിമര്‍ശനങ്ങള്‍ വരാറുണ്ട്. ഇക്കാര്യങ്ങള്‍ പാര്‍ട്ടി കമ്മറ്റിയില്‍ പറഞ്ഞാല്‍ പോരെ എന്ന് ചോദിക്കും. എന്നാല്‍ അങ്ങനെയൊരിടം ഇല്ലാതാകുന്നുവെന്നും ബല്‍റാം പറഞ്ഞു.രാജ്യസഭാ സീറ്റ് കേരള കോണ്‍ഗ്രസിന് നല്‍കിയതിന്റെ പശ്ചാത്തില്‍ കോണ്‍ഗ്രസില്‍ നേതൃമാറ്റം വേണമെന്ന് വി.ടി ബല്‍റാം അടക്കമുള്ള നേതാക്കള്‍ ആവശ്യപ്പെട്ടിരുന്നു. മുന്ന് പേര്‍ ചേര്‍ന്ന് എടുത്ത തീരുമാനം എങ്ങനെ കോണ്‍ഗ്രസിന്റെ ഔദ്യോഗിക തീരുമാനം ആകുന്നുവെന്ന് അറിയില്ല. കേരളത്തിലെ കോണ്‍ഗ്രസിന് കുറച്ചുകൂടി മെച്ചപ്പെട്ട നേതൃത്വത്തെ അര്‍ഹിക്കുന്നുവെന്നും ബല്‍റാം പറഞ്ഞു.

കോണ്‍ഗ്രസിന് ലഭിക്കേണ്ട രാജ്യസഭാ സീറ്റ് യു.ഡി.എഫിനെ വഞ്ചിച്ച്‌ പുറത്ത് പോയ, കോട്ടയം ജില്ലാ പഞ്ചായത്തിലടക്കം ഇന്നലെ വൈകുന്നേരം വരെ സി.പി.എമ്മിനെ പിന്തുണച്ചിരുന്ന, ബത്തേരിയില്‍ ഇപ്പോഴും സി.പി.എമ്മിനെ പിന്തുണയ്ക്കുന്ന കേരള കോണ്‍ഗ്രസ് എന്ന പാര്‍ട്ടിക്ക് നല്‍കാനുള്ള തീരുമാനം കോണ്‍ഗ്രസ് പ്രസ്ഥാനത്തെ സ്‌നേഹിക്കുന്നവര്‍ക്ക് അപമാനകരമാണെന്ന് ആവര്‍ത്തിക്കുന്നുവെന്നും ബല്‍റാം പറഞ്ഞുലോക്‌സഭയില്‍ ഒരു വര്‍ഷം കൂടി കാലാവധി ബാക്കിയുള്ള ഒരാളെയാണ് ആ പാര്‍ട്ടി രാജ്യസഭാ സ്ഥാനാര്‍ത്ഥിയായി നിശ്ചയിച്ചതെന്നത് അതിനേക്കാള്‍ കഷ്ടമാണ്. കോട്ടയം പാര്‍ലമെന്റ് സീറ്റില്‍ ഇപ്പോള്‍ ഉപതെരഞ്ഞെടുപ്പ് ഉണ്ടായേക്കില്ല. എന്നാല്‍ ഒരു വര്‍ഷത്തോളം അവിടെ ഒരു ജനപ്രതിനിധിയുടെ അഭാവം സൃഷ്ടിക്കുന്ന ബുദ്ധിമുട്ടുകളെക്കുറിച്ച്‌ വിശദീകരിക്കേണ്ട അധിക ബാധ്യത കൂടി യു.ഡി.എഫിന് വന്നുചേര്‍ന്നിരിക്കുകയാണെന്നും ബല്‍റാം പറഞ്ഞു.