കോണ്‍ഗ്രസില്‍ കൈവിട്ടു പോയ കലാപത്തിന്റെ മുറിവ് ഉണക്കാനുളള തീവ്ര ശ്രമത്തിലാണ് കോണ്‍ഗ്രസിലെ മൂന്നുപേര്‍ അടങ്ങുന്ന സംഘം. ഒരു ഒത്തൊരുമ അത്യാവശ്യമായ സാഹചര്യത്തില്‍ അനുനയ നീക്കവുമായി പി ജെ കുര്യനെ ചെന്നിത്തല സന്ദര്‍ശിച്ചു. ഉമ്മന്‍ ചാണ്ടിക്കും ചെന്നിത്തലയ്ക്കും പിന്നാലെ രാജ്യസഭാ സീറ്റ് വിട്ടു നല്‍കിയതിനെ ന്യായീകരിച്ച് എം എം ഹസനും വാര്‍ത്താ സമ്മേളനം നടത്തിയിരുന്നു.

അടുത്ത് നടക്കാനിരിക്കുന്ന കെ പി സി സി നേതൃയോഗത്തിന് മുമ്പ് പ്രതിഷേധ തീവ്രത കുറയ്ക്കാനുളള തീവ്ര ശ്രമത്തിലാണ് ഉമ്മന്‍ ചാണ്ടിയും രമേശ് ചെന്നിത്തലയും എം എം ഹസനും. ഉമ്മന്‍ ചാണ്ടി കോണ്‍ഗ്രസ് പ്രസിഡന്റ് രാഹുല്‍ ഗാന്ധിയെ തെറ്റിദ്ധരിപ്പിച്ചെന്ന പി ജെ കുര്യന്റെ പരാമര്‍ശം അടിസ്ഥാന രഹിതമാണെന്ന് കാണിച്ച് ഹസനും ചെന്നിത്തലയും ചേര്‍ന്ന് വാര്‍ത്താക്കുറിപ്പും ഇറക്കി.

ഉമ്മന്‍ ചാണ്ടിക്കെതിരെ പരസ്യ വിമര്‍ശങ്ങളാണ് പിജെ കുര്യന്‍ തൊടുത്തുവിട്ടുകൊണ്ടിരിക്കുന്നത്. ഈ സാഹചര്യത്തില്‍ പി ജെ കുര്യനെ അനുനയിപ്പിക്കുന്നതിന്റെ ഭാഗമായി ചെന്നിത്തലയും അദ്ദേഹത്തെ സന്ദര്‍ശിച്ചു. ഇനി ആര്‍ക്കും മറുപടി പറയാനില്ലെന്നായിരുന്നു ഉമ്മന്‍ ചാണ്ടിയുടെ പ്രതികരണം. എങ്കിലും ഇപ്പോഴും കോണ്‍ഗ്രസിലെ പടലപ്പിണക്കങ്ങള്‍ക്ക ഒരു തരത്തിലും ശമനമായിട്ടില്ലെന്നത് പകല്‍ പോലെ വ്യക്തമാണെങ്കിലും പുറമെ ഈ മൂവര്‍ സംഘം എല്ലാവരെയും ഒപ്പംകൂട്ടാമെന്ന അത്മവിശ്വായത്തിലാണ്.