ഈദ് ഗാഹുകള് സംഘടിപ്പിച്ച് ഇന്ന് വിശ്വാസികള് ബലിപെരുന്നാള് ആഘോഷിച്ചു
ഇബ്രാഹിം നബിയുടെയും മകന് ഇസ്മായിലിന്റെയും ത്യാഗസ്മരണയുമായി ത്യാഗത്തിന്റേയും സമര്പ്പണത്തിന്റേയും സന്ദേശം വിളിച്ചോതി വിശ്വാസികള് ഇന്ന് ബലിപെരുന്നാള് ആഘോഷിച്ചു. ബലിപ്പെരുന്നാളിനോടനുബന്ധിച്ച് സംസ്ഥാനത്തിന്റെ വിവിധ ഭാഗങ്ങളില് ഈദ് ഗാഹുകള് സംഘടിപ്പിച്ചു. പതിനായിരക്കണക്കിന് വിശ്വാസികളാണ് ഈദ് ഗാഹുകളില് രാവിലെ നടന്ന നമസ്കാരത്തില് പങ്കെടുത്തത്.
ഇബ്രാഹിം നബിയുടെ കുടുംബത്തിലൂടെ ഖുര് ആന് പറഞ്ഞു വച്ചത് പകരം വയ്ക്കാനാവാത്ത ത്യാഗത്തെക്കുറിച്ചായിരുന്നു. മകന്റെ ബലിയായിരുന്നു അല്ലാഹുവിന്റെ കല്പന. എല്ലാറ്റിന്റേയും ഉടയോന് കൊടുക്കാന് ഇത്രമാത്രമേയുള്ളൂ എന്നതായിരുന്നു ഇബ്രാഹിമിന്റെ ദുഖം. ബലിത്തറയില് പിന്നെ കണ്ടത് പരമകാരുണ്യവാന്റെ സ്നേഹവായ്പിന്റെ അത്യുന്നതങ്ങള്. ഈ ത്യാഗ സ്മരണയാണ് ബലിപെരുന്നാള്.
ഇന്നലെയായിരുന്നു ഗള്ഫ് രാജ്യങ്ങളില് പെരുന്നാള് ആഘോഷങ്ങള്. എല്ലാം മറന്നുള്ള അനുസരണ, ദാനം ചെയ്യുന്നവന് ഇഹത്തെയും പരത്തെയും നേടുന്നുവെന്ന് ഈ പെരുനാളും സാക്ഷ്യപ്പെടുത്തുന്നു. പാളയത്തെ പ്രാര്ഥനാ ചടങ്ങുകള്ക്ക് ഇമാം യൂഫസ് മുഹമ്മദ് നഖ്വി നേതൃത്വം നല്കി. കൊച്ചി കലൂര് രാജ്യാന്തര സ്റ്റേഡിയത്തില് ഈദ് നമസ്കാരത്തില് നടന് മമ്മൂട്ടിയുള്പ്പെടുള്ള പ്രമുഖര് പങ്കെടുത്തു. സംസ്ഥാനത്തെ ഭൂരിഭാഗം കേന്ദ്രങ്ങളിലും മഹല്ലുകള് കേന്ദ്രീകരിച്ച് മൃഗബലി നടത്താനും മാംസ വിതരണത്തിനും സജീകരണമൊരുക്കിയിരുന്നു.
https://www.facebook.com/Malayalivartha
