രാസലഹരി ഉപയോഗിക്കുന്നവരെ ഉള്പ്പെടെ കുടുക്കാന് ഉറച്ച് എക്സൈസ് വകുപ്പ്
തൂഫാന് പദ്ധതിയുടെ ഭാഗമായി സംസ്ഥാനത്തു ലഹരി വിരുദ്ധ പരിശോധനകള് ശക്തമാകുമ്പോള് രാസലഹരി ഉപയോഗിക്കുന്നവരെ ഉള്പ്പെടെ കുടുക്കാന് ഉറച്ച് എക്സൈസ് വകുപ്പ്. മദ്യം, കഞ്ചാവ് തുടങ്ങിയവയില്നിന്ന് മാഫിയകള് രാസലഹരിയിലേക്കു ചുവടുമാറുമ്പോള് പരിശോധനകളും കാലാനുസൃതവും ശാസ്ത്രീയവുമാക്കാനുള്ള നീക്കമാണ് എക്സൈസ് നടത്തുന്നത്. രാസലഹരി ഉപയോഗിക്കുന്നവരെ വലയിലാക്കാനായി മൂന്നു പ്രത്യേകതരം പരിശോധനാ കിറ്റുകളാണ് തയാറാക്കിയിരിക്കുന്നതെന്ന് എക്സൈസ് കമ്മിഷണര് എസ്.സാംബശിവറാവു പറഞ്ഞു. 1500ല് പരം ഡിറ്റക്ഷന് കിറ്റുകളാണ് എന്ഫോഴ്സ്മെന്റ് ഓഫിസുകള്ക്കായി വിതരണം ചെയ്തിരിക്കുന്നത്. എക്സൈസ് മന്ത്രി എം.ലിജുവാണ് കിറ്റുകള് വിതരണം ചെയ്തത്.
1. നാര്ക്കോട്ടിക് ഡ്രഗ് ഡിറ്റക്ഷന് കിറ്റ്
അനധികൃതമായി കടത്തുകയോ കൈവശം വയ്ക്കുകയോ ചെയ്യുന്ന വസ്തുക്കളില് ലഹരി ഘടകങ്ങളുടെ സാന്നിധ്യം പ്രാഥമികമായി തിരിച്ചറിയുന്നതിനായി ഉപയോഗിക്കുന്നതാണ് ഈ കിറ്റ്. വിവിധ മയക്കുമരുന്ന് വിഭാഗങ്ങള് കണ്ടെത്തുന്നതിനും കേസുകളുടെ പ്രാഥമിക പരിശോധനകള് കൂടുതല് വേഗത്തിലും കൃത്യതയോടെയും നടത്തുന്നതിനും ഇത് എന്ഫോഴ്സസ്മെന്റ് ഉദ്യോഗസ്ഥരെ സഹായിക്കും. കേസുകള് കണ്ടെത്തുന്ന വേളയില് പിടിച്ചെടുക്കുന്ന നിരോധിത വസ്തുക്കളില് കൊക്കെയ്ന്, മെത്താംഫെറ്റമിന്, ഒപ്യം, മോര്ഫിന്, കോഡീന്, ഹെറോയിന്, മെസ്കലൈന്, ഹാഷിഷ് ഓയില്, മെത്താക്വലോണ്, തുടങ്ങിയ വിവിധ ലഹരിമരുന്നുകളുടെ സാന്നിധ്യം തിരിച്ചറിയാന് ഇതു സഹായിക്കും.
2. പ്രീകഴ്സര് ഡിറ്റക്ഷന് കിറ്റ്
ലഹരി നിര്മാണത്തിന് ഉപയോഗിക്കപ്പെടാന് സാധ്യതയുള്ള രാസവസ്തുക്കളായ പ്രീകഴ്സര് കെമിക്കലുകളുടെ സാന്നിധ്യം കണ്ടെത്തുന്നതിനായാണ് കിറ്റ് ഉപയോഗിക്കുന്നത്. അനധികൃത ലഹരി നിര്മ്മാണ ശൃംഖലകളെ കണ്ടെത്തുന്നതിനും ലഹരി ഉല്പാദനത്തിന് മുമ്പുള്ള ഘട്ടങ്ങളില് തന്നെ ഇടപെടുന്നതിനും ഈ സംവിധാനം സഹായകരമാകും.
3. കെറ്റാമൈന് ഡിറ്റക്ഷന് കിറ്റ്
കെറ്റാമൈന് എന്ന നിരോധിത ലഹരി വസ്തുവിന്റെ സാന്നിധ്യം പ്രത്യേകമായി തിരിച്ചറിയുന്നതിനായുള്ളതാണ് ഈ കിറ്റ്. കെറ്റാമൈന് ഉള്പ്പെടെയുള്ള പുതിയ തലമുറ ലഹരി വസ്തുക്കളുടെ വ്യാപനം പ്രവര്ത്തനങ്ങള്ക്ക് ഇത് സഹായകമാകും. ഉമിനീര് അധിഷ്ഠിതമായ 8ഇന്1 മള്ട്ടിഡ്രഗ് റാപിഡ് ടെസ്റ്റ് കിറ്റാണിത്. എംഡിഎംഎ, കൊക്കെയ്ന്, കഞ്ചാവ്, കെറ്റാമിന്, ആംഫെറ്റാമിനുകള് എന്നിവ ഉള്പ്പെടെയുള്ള വിവിധ മയക്കുമരുന്നുകളുടെ സമീപകാല ഉപയോഗം അതിവേഗത്തില് കണ്ടെത്താന് കിറ്റ് സഹായിക്കും. സംശയിക്കപ്പെടുന്ന വ്യക്തി ലഹരിവസ്തുക്കള് ഉപയോഗിച്ചിട്ടുണ്ടോ എന്ന് ഉമിനീര് പരിശോധനയിലൂടെ വേഗത്തില് തിരിച്ചറിയുന്നതിനുള്ള സംവിധാനമാണ് ഇത്.
https://www.facebook.com/Malayalivartha
