കോണ്‍ഗ്രസുകാര്‍ക്ക് ആര്‍ക്കും വേണ്ടത്തയാളായി മാറുന്നു ശശി തരൂര്‍. കേന്ദ്രത്തില്‍ നിന്നും നേരിട്ടവതരിച്ച ശശി തരൂരിനെ വെട്ടാന്‍ പലവട്ടം കേരളത്തിലെ കോണ്‍ഗ്രസ് നേതാക്കള്‍ക്ക് അവസരം ലഭിച്ചതാണ്. എന്നാല്‍ കേന്ദ്രത്തിന്റെ സപ്പോര്‍ട്ടോടെ ശശി തരൂര്‍ വീണ്ടും വന്നു. അതോടെ തിരുവനന്തപുരം സ്വപ്നം കണ്ടിരുന്ന സീറ്റ് മോഹികള്‍ മൗനത്തിലായി. അവര്‍ വീണ്ടും ഒരവസരത്തിനായി കാത്തിരുന്നു. നരേന്ദ്ര മോഡിയെ പുകഴ്ത്തി ശശി തരൂര്‍ ദേശീയ ശ്രദ്ധ നേടിയപ്പോള്‍ തരൂരിനെതിരെ ഒളിഞ്ഞും തെളിഞ്ഞും പ്രവര്‍ത്തിക്കുന്നവര്‍ രംഗത്തെത്തി. കെപിസിസി പ്രസിഡന്റ് വിഎം സുധീരന്‍, രമേശ് ചെന്നിത്തല, വിഡി സതീശന്‍, എംഎം ഹസന്‍ അങ്ങനെ സാദാ കോണ്‍ഗ്രസുകാര്‍ പോലും ശശി തരൂരിനെതിരെ രംഗത്തെത്തി.
ഇപ്പോള്‍ കോണ്‍ഗ്രസ് മുഖപത്രമായ വീക്ഷണവും ശശി തരൂരിനെതിരെ ആഞ്ഞടിക്കുകയാണ്. ശശി തരൂരിന്റെ പേരെടുത്ത് പറയാതെയാണ് എഡിറ്റോറിയല്‍. എന്നാല്‍ ആ പറഞ്ഞത് ശശി തരൂരിനെ തന്നെയാണെന്നാണ് മാനേജിംഗ് എഡിറ്റര്‍ പറയുന്നത്. ഒരു തെരഞ്ഞെടുപ്പ് തോല്‍വി താങ്ങാന്‍ കെല്‍പ്പില്ലാത്ത ഇത്തരം വിശുദ്ധ പശുക്കള്‍ എത്രനാള്‍ കോണ്‍ഗ്രസിന് കൂടെയുണ്ടാകുമെന്നാണ് വീക്ഷണത്തിന്റെ ചോദ്യം. ജാരന് അടുക്കള വാതില്‍ തുറന്നു കൊടുക്കുന്നതിലും അന്തസ്സ് ഉമ്മറവാതിലിലൂടെ ജാരനൊപ്പം പോകുന്നതാണെന്നും പുരയ്ക്ക് മീതെ ചാഞ്ഞാല്‍ പൊന്മരവും വെട്ടണമെന്നുമാണ് വീക്ഷണം പറയുന്നത്.
കോണ്‍ഗ്രസിനുണ്ടായ വേനലും വറുതിയും കണ്ടു നിരാശരായ അവരെ ബിജെപി പക്ഷത്തെ സമൃദ്ധിയും ഭരണവും മോഹിപ്പിക്കുന്നുണ്ടാവാം. അനുകൂല കാലാവസ്ഥ തേടിയെത്തുന്ന ഇത്തരം സൈബീരിയന്‍ കൊക്കുകള്‍ക്ക് ചില്ലയും കൂടും നല്‍കിയ കോണ്‍ഗ്രസ് പ്രവര്‍ത്തകരെയാണ് ഇവര്‍ വഞ്ചിക്കുന്നത്. വിദേശ പാണ്ഡിത്യത്തിന്റെ അവസാനവാക്ക് തങ്ങളാണ് എന്ന് ധരിക്കുന്ന ഇവര്‍ കോണ്‍ഗ്രസിലിരുന്ന് ബിജെപിയുടെ ക്യാംപസ് സെലക്ഷന് ശ്രമിക്കുന്നത് വിശ്വാസ വഞ്ചനയാണ്‌വീക്ഷണം പറയുന്നു.
മോഡിക്ക് വേണ്ടി പ്രണയ ഗീതങ്ങള്‍ രചിക്കുകയും എഡിറ്റ് പേജുകളില്‍ മോഡിക്ക് മംഗള പത്രം എഴുത്തുന്നവരുടെ ചോറ് ഇങ്ങും കൂറ് അങ്ങുമാണെന്ന് വ്യക്തമാക്കപ്പെട്ടിരിക്കുന്നു. പൊന്മരമായാലും പുരയ്ക്ക് മീതെ ചാഞ്ഞാല്‍ വെട്ടിമാറ്റണം. അല്ലെങ്കില്‍ കമ്പിയിട്ട് കെട്ടണം. വാഴ്ചയില്‍ അടുപ്പം കാണിക്കുകയും വീഴ്ച്ചയില്‍ അകലുകയും ചെയ്യുന്ന സൗഹാര്‍ദ്ദം സംശയിക്കേണ്ടതാണ്. പറ്റിയ പിഴവുകള്‍ തിരുത്തുന്നില്ലെങ്കില്‍ പുരനിറഞ്ഞു നില്‍ക്കുന്ന ഇത്തരക്കാരെ കെട്ടിച്ചയക്കുന്നതാവും ഉചിതമെന്നും വീക്ഷണം വിശദീകരിക്കുന്നു.                                          അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha