തട്ടിപ്പുകാരുടെ സ്വന്തം കേന്ദ്രസര്‍ക്കാര്‍. അനില്‍ അംബാനിയുടെ റിലയന്‍സ് എനര്‍ജിയെ അദാനി ഗ്രൂപ്പ് ഏറ്റെടുത്തുവെങ്കിലും, റിലയന്‍സ് കുടിശ്ശികയിനത്തില്‍ സര്‍ക്കാരിലേക്ക് അടയ്‌ക്കേണ്ട 2000 കോടി രൂപ ആര് നല്‍കുമെന്ന കാര്യത്തില്‍ ഇതുവരെ വ്യക്തതയില്ല. മഹാരാഷ്ട്ര ഭരിക്കുന്ന ബിജെപി സര്‍ക്കാരും അവരുടെ ഇഷ്ടക്കാരായ റിലയന്‍സിനെ പിണക്കാന്‍ ഒരുക്കവുമല്ല. അതു കൊണ്ടു തന്നെ ഈ തുക തിരിച്ചു പിടിക്കുന്നതില്‍ അനിശ്ചിതത്വം.
33 ലക്ഷം വരുന്ന ഉപഭോക്താക്കളില്‍ നിന്ന് പിരിച്ചെടുത്ത വൈദ്യുതി ചാര്‍ജും മറ്റു നികുതികളും അടക്കം 2000 കോടിയോളം രൂപയാണ് റിലയന്‍സ് എനര്‍ജി അടയ്ക്കാനുളളത്. തുക ഉപഭോക്താക്കളില്‍ നിന്നും കമ്പനി പിരിച്ചെടുത്തെങ്കിലും സര്‍ക്കാരില്‍ അടയ്ക്കാതെയാണ് കമ്പനിയെ അദാനിയ്ക്ക് കൈമാറിയത്. വിവരവകാശത്തിലൂടെ അനില്‍ ഗല്‍ഗാലി എന്ന ഫ്രീലാന്‍സ് ജേര്‍ണലിസ്‌ററാണ് ഈ വിവരം പുറത്തു കൊണ്ടുവന്നത്.
നികുതി അടക്കുന്നതില്‍ റിലയന്‍സ് വരുത്തിയ വീഴ്ച വൈദ്യുതി ഇന്‍സ്‌പെക്ടര്‍ മനപൂര്‍വ്വം അവഗണിച്ചു എന്നാണ് ഗല്‍ഗാലി ആരോപിക്കുന്നത്. വൈദ്യുതി ഇന്‍സ്‌പെക്ടറെ സസ്‌പെന്‍ഡ് ചെയ്യാന്‍ ആവശ്യപ്പെട്ടുകൊണ്ട് മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നാവിസിന് ഗല്‍ഗാലി എഴുതിയിട്ടുണ്ട്. നികുതി അടവില്‍ കുടിശിക വരുത്തിയ റിലയന്‍സിനെതിരെ കേസെടുക്കണമെന്നും അദ്ദേഹം കത്തില്‍ ആവശ്യപ്പെടുന്നു. 2017 ജൂണ്‍ മുതല്‍ 2017 ഒക്ടോബര്‍ വരെ മഹാരാഷ്ട്രയിലെ സാന്തക്രൂസ് ഡിവിഷനില്‍ നിന്ന് 591,50,53,500 രൂപയാണ് ഇലക്രിക് ഡ്യൂറ്റി, ഇലക്ടിക് നികുതി തുടങ്ങിയ ഇനങ്ങളില്‍ ഇവര്‍ പിരിച്ചിരിക്കുന്നത്. മുംബൈ സെന്ററല്‍ ഡിവിഷനില്‍ നിന്ന് 2016 ഒക്ടോബര്‍ മുതല്‍ 2017 മെയ് വരെ 860,18,61,700 രൂപയാണ് ഉപഭോക്താക്കളില്‍ നിന്നും അംബാനിക്ക് ലഭിച്ചത്. ഇതില്‍ ഒരു രൂപ പോലും കമ്പനി സര്‍ക്കാരിലേക്ക് അടച്ചിട്ടില്ല.