പാട്നയിൽ കാമുകിയെ കാണാൻ രാത്രിയിൽ ഓടിളക്കി വീട്ടിലെത്തിയ സൈനികനെ മോഷ്​ടാവെന്ന് തെറ്റിദ്ധരിച്ച് നാട്ടുകാർ പിടികൂടി. എന്നാൽ നാട്ടുകാരുടെ ഇടപെടലിൽ കമിതാക്കളുടെ കള്ളി വെളിച്ചത്തായതോടെ ഇരുവർക്കും മംഗല്യസൗഭാഗ്യം.

ബിഹാറിലെ റോഹ്​താസ്​ ജില്ലയിലാണ്​ സംഭവം​. മഹാരാജ്​ ഗഞ്ച്​ സ്വദേശിയായ തേജു എന്ന വിശാൽ സിങ്​ ബന്ധുവി​​ന്റെ മകളായ ലക്ഷ്​മിന കുമാരിയുമായി അഞ്ചു വർഷത്തോളമായി പ്രണയത്തിലായിരുന്നു. സൈന്യത്തിൽ ക്ലാർക്കായ വിശാൽ ഏതാനും ദിവസങ്ങൾക്കു മുമ്പ്​ അവധിക്ക്​ നാട്ടിലെത്തി.

രാത്രിയിൽ കാമുകിയെ കാണണമെന്ന ആഗ്രഹം തോന്നിയ വിശാൽ ബുധനാഴ്​ച വീട്ടിലെ മറ്റംഗങ്ങൾ ഉറങ്ങിയെന്ന്​ ഉറപ്പാക്കിയ ശേഷം ഒാടിളക്കി കാമുകിയുടെ മുറിയിൽ കടക്കുകയായിരുന്നു. എന്നാൽ പെട്ടെന്ന്​ വീട്ടുകാർ ഉറക്കമുണരുകയും കള്ളൻ വന്നതായി ഉറക്കെ വിളിച്ചു പറയുകയും ചെയ്​തു.

ശബ്​ദം കേട്ട്​ ഒാടിക്കുടിയ നാട്ടുകാർ അക്രമാസക്​തമായതോടെ കാമുകീ കാമുകൻമാർക്ക്​ കാര്യങ്ങൾ തുറന്നു പറയുകയല്ലാതെ വഴിയില്ലെന്നായി. വിശാലിനെ അകത്തിട്ട്​ പൂട്ടിയ നാട്ടുകാർ പൊലീസിനെ വിവരമറിയിച്ചു. അതിനിടെ വിശാലി​ന്റെ മുത്തച്ഛനും മൂൻ സർപാഞ്ചുമായ പഞ്ചു യാദവ്​ സ്​ഥലത്തെത്തി നാട്ടുകാരുമായി സംസാരിച്ചു. ഇരുവർക്കും പ്രായപൂർത്തിയായതിനാലും ഇരു കുടുംബവും യാദവ വിഭാഗത്തിലായതിനാലും വിശാലിന്റെയും ലക്ഷ്​മിയുടേയും കുടുംബങ്ങൾ വിവാഹത്തിന്​ സമ്മതം മൂളിയതോടെ ഇരുവരുടേയും വിവാഹം സഫലമാവുകയായിരുന്നു.