അവിശ്വാസ പ്രമേയത്തിൽ ബി.ജെ.പിയെ പിന്തുണക്കുമെന്ന ഉറപ്പ്​ നൽകിയിരുന്നില്ലെന്ന​ വെളിപ്പെടുത്തലുമായി ശിവസേന. അവിശ്വാസ പ്രമേയത്തി​​ന്റെ രണ്ടു ദിവസം മുമ്പ്​ അമിത്​ ഷാ നിരവധി തവണ താക്കറെയെ വിളിച്ചുവെന്നത്​ ശരിയാണ്​. അഞ്ചു തവണയോളം ഫോണിൽ ബന്ധപ്പെടാൻ ബി.ജെ.പി അധ്യക്ഷൻ ശ്രമിച്ചിരുന്നു. ഒരു തവണ പാർലമന്റററി കമ്മറ്റി ഒാഫീസിൽ നിന്നാണ്​ വിളിച്ചത്​. എന്നാൽ ഉദ്ദവ്​ താക്കറെ ഫോൺ കാൾ സ്വീകരിക്കുകയോ അദ്ദേഹവുമായി സംസാരിക്കുകയോ ചെയ്​തിട്ടില്ലെന്ന്​ ശിവസേന വൃത്തങ്ങൾ വ്യക്തമാക്കി.

ശിവസേനയുടെ സാമ്​നയുടെ മുഖപ്രസംഗത്തിലും കേന്ദ്രസർക്കാറിനെതിരെ ശക്തമായ വിമർശനമാണ്​ ഉയർത്തിയത്​. ‘ബി.ജെ.പി എണ്ണം തികച്ചിരിക്കുന്നു. അവിശ്വാസപ്രമേയത്തിന്​ സർക്കാറിനെ താഴെയിറക്കാൻ കഴിഞ്ഞില്ല. സർക്കാറിന്​ വീണ്ടും പബ്ലിസിറ്റിയുണ്ടാവുകയാണ്​ ചെയ്​തത്​. പാർട്ടി ഭൂരിപക്ഷം നേടിയിരിക്കുന്നത്​ പണമൊഴുക്കികൊണ്ടാണ്​. പണം, ആൾബലം, വോട്ടിങ്​ മെഷീനിലെ തിരിമറി എന്നിവയാണ്​ ബി.ജെ.പിയുടെ വിജയമന്ത്രം. രാജ്യത്ത്​ വ്യാജ ജനാധിപത്യമാണ്​ പുലരുന്നതെന്നും’ സാമ്​നയുടെ മുഖപ്രസംഗത്തിൽ പറയുന്നു.