രാജസ്ഥാനില്‍ ഏഴുവസ്സുകാരിയെ പീഡിപ്പിച്ച കുറ്റത്തിന് പത്തൊമ്ബതുകാരന് വധശിക്ഷ. രാജസ്ഥാനിലെ ലക്‌സ്മാനഗറിലാണ് സംഭവം. 12വയസിന് താഴെയുള്ള പെണ്‍കുട്ടികളെ പീഡിപ്പിക്കുന്നവര്‍ക്ക് വധശിക്ഷ നല്‍കുന്നതിനുള്ള നിയമഭേദഗതി രാജസ്ഥാന്‍ കഴിഞ്ഞ മാര്‍ച്ചില്‍ പാസാക്കിയിരുന്നു. ഇതിന് ശേഷം ഇതാദ്യമായാണ് ഒരാള്‍ക്ക് പരമാവധി ശിക്ഷ വിധിക്കുന്നത്. രാജ്യത്ത് ഈ നിയമം പാസാക്കിയ രണ്ടാമത്തെ സംസ്ഥാനമാണ് രാജസ്ഥാന്‍. കഴിഞ്ഞ ഡിസംബറില്‍ മദ്ധ്യപ്രദേശും 12 വയസിന് താഴെയുള്ള പെണ്‍കുട്ടികളെ പീഡിപ്പിക്കുന്നവര്‍ക്ക് വധശിക്ഷ നല്‍കുന്ന നിയമം പാസാക്കിയിരുന്നു.

കഴിഞ്ഞ മേയിലാണ് കേസിനാസ്പദമായ സംഭവം. മാതാപിതാക്കള്‍ ഇല്ലാതിരുന്ന സമയത്ത് ബന്ധുവിനൊപ്പം കളിക്കുകയായിരുന്ന കുട്ടിയെ തട്ടിക്കൊണ്ട് പോയി പീഡിപ്പിച്ചുവെന്നാണ് കേസ്. കുട്ടിയെ കാണാത്തതിനെ തുടര്‍ന്ന് അന്വേഷണം ആരംഭിച്ച മാതാപിതാക്കള്‍ സംഭവസ്ഥലത്ത് നിന്നും 20 കിലോമീറ്റര്‍ അകലെ ലക്‌സ്മാനഗറിസലെ ഫുട്‌ബോള്‍ ഗ്രൗണ്ടില്‍ നിന്നും കുട്ടിയെ കണ്ടെത്തുകയായിരുന്നു. 20 ദിവസം അല്‍വാറിലെ ആശുപത്രിയില്‍ കുട്ടി ചികിത്സയിലായിരുന്നു.

വൈദ്യപരിശോധനയിലാണ് പെണ്‍കുട്ടി പീഡനത്തിന് ഇരയായെന്ന് വ്യക്തമായത്. അതിവേഗ കോടതിയിലാണ് കേസിന്റെ വിചാരണ നടന്നത്. തുടര്‍ച്ചയായ ദിവസം വാദം കേട്ട കോടതി എഴുപത് ദിവസത്തിനുള്ളില്‍ വിചാരണ പൂര്‍ത്തിയാക്കി.