നിയമസഭാ തിരഞ്ഞെടുപ്പിന് ഒരുങ്ങുന്ന രാജസ്ഥാനില്‍ തിരഞ്ഞെടുപ്പു പ്രചാരണത്തിനു തുടക്കം കുറിച്ചു പ്രശസ്തമായ ഗോവിന്ദ്‌ദേവ്ജി ക്ഷേത്രം സന്ദര്‍ശിച്ച കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയെ പരിഹസിച്ചു കേന്ദ്ര കായികമന്ത്രി രാജ്യവര്‍ധന്‍ സിങ് റാത്തോഡ് രംഗത്ത്. കഷ്ടകാലം വരുമ്പോള്‍ ആളുകള്‍ അമ്പലത്തില്‍ പോകുന്നതു സാധാരണമാണെന്നാണ് റാത്തോഡ് പറഞ്ഞത്

ജയ്പുരിലെ ജവഹര്‍ കലാകേന്ദ്രയില്‍ കേന്ദ്രസര്‍ക്കാരിന്റെ ഭരണ നേട്ടങ്ങള്‍ വിവരിക്കുന്ന എക്‌സിബിഷന്‍ ഉദ്ഘാടനം ചെയ്യാനെത്തിയതായിരുന്നു റാത്തോഡ്. ഈ വര്‍ഷം അവസാനമാണ് രാജസ്ഥാനില്‍ നിയമസഭാ തിരഞ്ഞെടുപ്പു നടക്കുക. വിനോദസഞ്ചാരത്തിനു പേരുകേട്ട രാജസ്ഥാന്‍, കോണ്‍ഗ്രസ് പ്രസിഡന്റ് സന്ദര്‍ശിക്കുന്നതു നല്ലതാണെന്നും റാത്തോഡ് പരിഹസിച്ചു. ഇത്രയേറെ സുന്ദരവും വിനോദസഞ്ചാരത്തിനു പ്രശസ്തവുമായ സംസ്ഥാനത്ത് അദ്ദേഹം വന്നത് നല്ല കാര്യം റാത്തോഡ് പറഞ്ഞു. ദീര്‍ഘകാലമായി ബിജെപിക്കു പിന്നില്‍ അടിയുറച്ചു നില്‍ക്കുന്നവരാണ് രാജസ്ഥാന്‍കാരെന്നും മന്ത്രി അവകാശപ്പെട്ടു. ഇന്ത്യയിലെ 20 സംസ്ഥാനങ്ങളില്‍ ബിജെപി ഇതിനകം സര്‍ക്കാര്‍ രൂപീകരിച്ചു കഴിഞ്ഞതായി അദ്ദേഹം ചൂണ്ടിക്കാട്ടി. പ്രധാനമന്ത്രി നരേന്ദ്രമോദിയുടെ പ്രവര്‍ത്തന മികവും നാം കാണുന്നതാണെന്നും അദ്ദേഹം വിലയിരുത്തി. അദ്ദേഹത്തിന്റെ നേതൃത്വത്തില്‍ രാജ്യത്തിന്റെ വികസനവും വളര്‍ച്ചയുമാണ് ബിജെപി ലക്ഷ്യമിടുന്നത് റാത്തോഡ് കൂട്ടിച്ചേര്‍ത്തു.